Soffía Árnadóttir sýnir í Ketilhúsinu

Í SKUGGA TÁKNSTAFANNA

Ketilhús 6. apríl – 12. maí

Soffía Árnadóttir

 

Laugardaginn 6. apríl kl. 15 verður opnuð í Ketilhúsinu á Akureyri sýning á verkum eftir Soffíu Árnadóttur.  Á þessari fyrstu yfirlitssýningu á verkum hennar kennir margra grasa en Soffía er vel þekktur grafískur hönnuður og einn helsti leturmeistari landsins. Tungumálið mótar skilning okkar á tilverunni að stærstu leyti og táknmerkingar stafanna eru þeir járnbrautarteinar sem flest mannleg samskipti fara eftir. Þeir birta okkur sýnir og sjónarhorn, umvefja skilning okkar og skynjun á hlutveruleikanum og mynda þar með hina stafrænu matrixu. Það er þetta skuggaspil táknmerkjanna sem Soffía gerir sér mat úr. Letrið er hennar ær og kýr og vinnur hún það í ýmis efni, s.s. vatnsliti, blaðgyllingu, skinn, keramik, stein, gler, stál og tré, en áhugi hennar á því felst þó fyrst og fremst í formgerðum bókstafanna, sjónrænum möguleikum þeirra og útfærslu.

Sýningin stendur til 12. maí og er opið alla daga nema mánudaga og þriðjudaga kl. 13-17. Aðgangur er ókeypis.

Hekla Björt og Sara Björg opna sýningu í Deiglunni

TRIANGULUS

DEIGLAN 6. apríl – 21. apríl

Hekla Björt og Sara Björg

Í sýningarsalnum Deiglunni sem staðsett er í Listagilinu á Akureyri verður laugardaginn 23. mars kl. 15 opnuð sýning á verkum eftir listakonurnar Heklu Björt (f. 1985) og Söru Björgu (f. 1988). Þríhyrndar formsmíðar er það sem þær gera að yrkisefni sínu á sýningunni Triangulus. Óðurinn til þríhyrningsins er einskonar sameiningartákn: þær tvær og sköpunin, ástin, listin og heimurinn, þú og ég og geimurinn, eða hverskonar þrenna sem er.

Ásdís Arnardóttir sellóleikari með fyrirlestur í VMA

 

Velkomin á fyrirlestur á föstudaginn kl. 14:30 í stofu M01 í Verkmenntaskólanum á Akureyri. 

Ásdís Arnardóttir sellóleikari verður með fyrirlesturinn sem hún nefnir: Tækifæri í tónlist - Sýn á möguleika. Hún ásamt gítarleikaranum Matti Saarinen hefja leikinn á því að spila ólík tóndæmi en síðan mun Ásdís tala um starf sitt sem hljóðfæraleikari, tónlistarstofnanir og styrkjaumhverfi.

Þetta er þriðji fyrirlesturinn á þessari önn í röð fyrirlestra sem listnámsbraut VMA og Sjónlistamiðstöðin standa fyrir og hafa gert í fjölda ára. Hann er öllum opinn og ókeypis.

Freyja Reynisdóttir sýnir í gallerí Ískáp

Nánar á:

http://www.samlagid.portfoliobox.me/

Opnar laugardaginn 30. mars kl. 14:00 og stendur til 6. april.  Allir eru hjartanlega velkomnir.                         

-sýningastjórar (Freyja Reynisdóttir, Karólína Baldvinsdóttir og Gunnhildur Helgadóttir)

HVAR? Gallerí Ískápur / Gallery Fridge (Kaupvangsstræti 12. Listasafnshúsið/gengið inn úr portinu fyrir ofan, baka til)

Gunnhildur Þórðardóttir opnar sýningu í Flóru og gefur út ljóðabók

Gunnhildur Þórðardóttir
Minningar í kössum/Boxed Memories
30. mars - 4. maí 2013
Opnun laugardaginn 30. mars kl. 14
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Laugardaginn 30. mars kl. 14 opnar Gunnhildur Þórðardóttir sýningu sem nefnist „Minningar í kössum/Boxed Memories” í Flóru í Hafnarstræti 90 á Akureyri.

Á sýningunni eru ný verk, textaverk, innsetning og skúlptúrar sem fjalla um minningar en við geymum minningar oft í eins konar hólfum í heilanum sem við getum lokað og opnað. Minningar sem slíkar eru ekki endilega áreiðanlegar heimildir en þær hafa eitthvað með fortíðina að gera og mynda heild í huga manns. Minningar fólks eru eins konar vitneskja um liðna atburði oft sveipaðar fortíðarþrá. Á sýningunni verður hægt að létta af hjarta sínu eða að taka þátt í listaverkinu með því að skrifa niður nafnlausar minningar og setja í kassa. Listaverk Gunnhildar fjalla oft um heimspekileg fyrirbæri en í listaverkum sínum túlkar hún vangaveltur sínar um lífið og tilveruna. Í tilefni alþjóðlegs dags ljóðsins 21. mars sl. gefur Gunnhildur út ljóðabókina Blóðsteina/Bloodstones og verður hún fáanleg í Flóru.

Gunnhildur lauk BA (Honours) í listasögu og fagurlistum frá Listaháskólanum í Cambridge árið 2003 og MA í liststjórnun frá sama skóla árið 2006. Hún hefur haldið nokkrar einkasýningar meðal annars Fráhvörf í SÍM salnum og sýninguna Losun í sal Íslenskrar grafíkur á síðasta ári auk þess að taka þátt í samsýningum í 002 gallerí og í myndbandsgjörningi í Tate Britain einnig í fyrra. Þetta er hennar tólfta einkasýning þá hefur Gunnhildur tekið þátt í fjölda samsýninga bæði hér heima og erlendis.

Sýningin er öllum opin á opnunartíma Flóru mánudaga til föstudaga kl. 11-13 og 16-18 og laugardaga kl. 13-16 og stendur til laugardagsins 4. maí 2013.

Sjá einnig: http://www.gunnhildurthordardottir.com, http://www.umm.is/UMMIS/Listamenn/Listamadur/722 og http://www.saatchi-gallery.co.uk

Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður. Menningardagskrá Flóru hlaut styrk úr Menningarsjóði Akureyrar.

Þorsteinn Gíslason og Kristján Pétur Sig­­urðsson sýna í Populus tremula

Laugardaginn 30. mars kl. tvö til fimm opna þeir Þorsteinn Gíslason og Kristján Pétur Sig­­urðsson sýninguna In mute / Í mjúti í Populus tremula.

Sýningin er hugleiðing þeirra fél­aga um hinar ýmsu birtingarmyndir þagnar.

Það er sérstakt fagnaðarefni að við opnun verður Þagnar-Freyja Kristjáns Péturs, sem stóð svo keik um árabil fyrir utan glugga Populus tremula, af­hjúpuð upprisin (þetta er sá tími) í splunkunýrri blárri kápu.

Sýningin verður einnig opin á páskadag og annan í páskum frá tvö til fimm. Aðeins þessi eina helgi.

Aron Freyr Heimisson sýnir í gallerí Ískáp

 

Sýningin KÖFF skoðar þá ævagömlu list að spá í bolla. Kínverjar og aðrar þjóðir austurlanda hafa lengi vel spáð í tebolla og einnig eru heimildir fyrir því að Rómverjar og Grikkir hafi spáð í dreggjar víns til forna. Talið er að hver bolli spái mánuð fram í tímann og gerir listamaðurinn með þessum hætti tilraun til skrásetningar ævisögu. Spáðu í bolla - spáðu í mig.

Listamaður: Aron Freyr Heimisson

Opnar laugardaginn 23. mars kl. 14:00 og stendur til 30. mars. Allir eru hjartanlega velkomnir.          

Sýningastjórar (Freyja Reynisdóttir, Karólína Baldvinsdóttir og Gunnhildur Helgadóttir)

Gallerí Ískápur / Gallery Fridge (Kaupvangsstræti 12. Listasafnshúsið/gengið inn úr portinu fyrir ofan, baka til)

http://samlagid.portfoliobox.me

Ólafur Sveinsson opnar sýningu í Sal Myndlistarfélagsins

Ólafur Sveinsson opnar sýningu á blýantsteikningum og tréskúlptúrum, ásamt einni  mótorhjóla-innsetningu, laugardaginn 23. mars, kl. 14.00 í Sal Myndlistarfélagsins í Listagilinu á Akureyri.
Teikningarnar  hafa sumar verið sýndar áður,  bæði hér og erlendis en tré skúlptúrarnir hafa eigi verið opinberaðir fyrr en nú.
Innsetningin er túlkun á gömlu norðlensku slangri  „ Old Hondas never die they just go to Akureyris „
 
Verkin eru öll saga um tímann, manninn og ferðalag sem hófst fyrir löngu og stendur enn. Sjón er sögu ríkari og sagan rík af myndum.  Hér um að ræða sýningu sem er allt í senn rokk og ról, blues og huglægar túlkanir á fagurfræðilegum staðreyndum, minningum sem við eigum öll og hughrifum þeim sem verkin kunna að kveikja.  Eignastu augnablik í þessari örsýningu með því einu að mæta og sjá, upplifa og líka eður ei!
Sýningin er aðeins opinn þessa einu helgi, 23.-24. mars 2013 frá kl. 14.00- 17.00 báða dagana.

Joris Rademaker sýnir í Kompunni, Alþýðuhúsinu á Siglufirði

Á laugardaginn kemur, 23. mars opnar Joris Rademaker sýninguna Hringrás í Kompunni, Alþýðuhúsinu á Siglufirði.
Joris er Hollendingur sem hefur verið búsettur á Akureyri undanfarin 20 ár. Samhliða listsköpun kennir hann við Brekkuskóla á Akureyri.
Joris er fjölhæfur listamaður með næmt auga fyrir efni og orku hlutanna. Á sýningunni í Kompunni teflir hann fram nýjum verkum unnum úr fundnum efnum og gúmmíi. Opnunin er kl. 14.00 - 17.00 og eru allir velkomnir.

Eyþing, Fjallabyggð og Fiskbúð Siglufjarðar styrkir sýninguna.

Allar nánari upplýsingar hjá Aðalheiði í síma 865-5091

Innlönd í Bókasafni Háskólans á Akureyri

Guðmundur Ármann sýnir þrjár vatnslitamyndir og sex olíumálverk í Bókasafni Háskólans á Akureyri. Sýningin hefst fimmtudaginn 21. mars kl. 16 og lýkur 30. apríl 2013. Bókasafnið er opið mánudaga, miðvikudaga og föstudaga frá kl. 8.00 – 16.00, þriðjudaga og fimmtudaga frá kl. 8.00 – 18.00. Vatnslitamyndirnar eru rannsókn á línum, litum og formum sem birtast okkur í náttúrunni og eru þær kveikjan að sex olíumálverkum sem eru einskonar innra landslag. Allir eru velkomnir á opnunina fimmtudaginn 21. mars kl. 16-18.
Guðmundur Ármann útskrifaðist úr Myndlista- og handíðaskóla Íslands 1966 og frá grafíkdeild Konsthögskolan Valand í Svíþjóð 1972. Hann lauk meistaranámi í kennslufræðum  við Háskólann á Akureyri og starfar sem kennari við listnámsbraut Verkmenntaskólans á Akureyri. Fyrsta einkasýning Guðmundar Ármanns var á Mokkakaffi í Reykjavík 1962 og sýndi hann þar blek, kol- og pastelteikningar; nú fylla einkasýningarnar rúma tvo tugi. Hann hefur tekið þátt í fjölda samsýninga hér heima og erlendis.