Pang Rui Yun og Jonas Rubin opna myndlistarsýningar í Hrísey

 

 

HEFURÐU SÉÐ BLEIKA HVALINN?

Opnun sýningar í Húsi Hákarla-Jörundar og Sæborg í Hrísey

 

Listamennirnir Yun og Rubin hafa dvalið í Hrísey að undanförnu í vinnustofum listamanna í Gamla grunnskólanum sem er á vegum listahópsins Norðanbál. Listamennirnir hafa síðustu vikur unnið að sköpun sinni með styrk frá hinu 150 ára afmælisbarni Akureyri. Pang Rui Yun frá Singapúr og Jonas Rubin frá Danmörku skoða í verkum sínum samspil manns og náttúru með því að nota þá orku sem býr í umhverfinu. Rýnt er í tengsl mannlegrar tilveru og náttúrunnar með því að blanda saman ýmsum hráefnum og því sem af gengur í daglegu lífi.

Sýningin ber yfirskriftina „Hefurðu séð bleika hvalinn?“ og verður opin föstudaginn 30. nóvember kl. 16-20, og laugardaginn 1. desember og sunnudaginn 2. desember frá kl. 12-16. Sýnt verður í húsi Hákarla Jörundar og Sæborg. Ferjan Sævar siglir sex sinnum á dag milli lands og eyju. Nánari upplýsingar er að finna á heimasíðunni hrisey.net.

Allir velkomnir!

Tvær ljósmyndasýningar opna í Ketilhúsinu

 

Opnun í Ketilhúsi - Sjónlistamiðstöð laugardaginn 2. des kl. 15.

Aðventa á Fjöllum

&

Ferðalangar á Fjöllum

 

Sigurjón Pétursson
Þóra Hrönn Njálsdóttir
 

Sjónlistamiðstöðin býður þér að vera við opnun tveggja ljósmyndasýninga í Ketilhúsinu laugardaginn 1. desember. kl. 15.

 

Á sýningunum eru vetrarmyndir teknar á söguslóðum Aðventu, skáldsögu Gunnars Gunnarssonar. Einnig myndir af þeim nöfnum sem timburþilið í Sæluhúsinu við Jökulsá geymir sem gestabók ferðalanga síðustu 120 árin. 

 

Sigurjón Pétursson býður upp á leiðsögn um sýningarnar sunnudagana 2.  og 16. desember kl. 15.

 

Sýningarnar standa  til 16. desember.

Opið persónulegt rými í Myndlistaskólanum á Akureyri

Fimmtudaginn 22. nóvember verður opið hús í Myndlistaskólanum á Akureyri frá 15:00 til 19:00. Opnunin er í boði nemenda af 1. 2. og 3. ári við  fagurlistardeild skólans, en undanfarnar þrjár vikur hafa nemarnir unnið undir leiðsögn listamannsins Aðalheiðar S. Eysteinsdóttur. Meginmarkmið áfangans var sjálfsskoðun og í kjölfarið unnu þau sitt eigið persónulega rými. Útkoman er í formi skúlptúra, innsetninga, ljósmynda og gjörninga, sem nemendur bjóða gestum og gangandi að virða fyrir sér og upplifa með þeim. Allir eru hjartanlega velkomnir. 


Nemendur:
Ásmundur Jón Jónsson
James Earl Ero Cisneros Tamidles
Jónína Björg Helgadóttir
Elísabet Inga Ásgrímsdóttir
Hekla Björt Helgadóttir
Margrét Kristín Karlsdóttir
Sigrún Birna Sigtryggsdóttir
Anna Elionora Olsen Rosing
Kolbrún Vídalín
Karólína Baldvinsdóttir
Sunna Björk Hreiðarsdóttir
Sandra Rebekka Dudziak
Freyja Reynisdóttir
Egill Logi Jónasson
Hildur Björnsdóttir
Ragnheiður Mekkín Ragnarsdóttir
Sigríður Jónsdóttir
Unnur Rósa Eyfjörð Ásgeirsdóttir
Gunnhildur Helgadóttir

Íris Ólöf opnar sýningu í Flóru

Íris Ólöf Sigurjónsdóttir
Drósir og draumar
24. nóvember  2012 - 13. janúar 2013
Opnun laugardaginn 24. nóvember kl. 14
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Laugardaginn 24. nóvember kl. 14 opnar Íris Ólöf Sigurjónsdóttir sýningu sem nefnist „Drósir og draumar” í Flóru í Hafnarstræti 90 á Akureyri. Þar sýnir hún textílverk og skart úr hráefni úr ýmsum áttum sem lifað hefur tímana tvenna og þrenna. Gamlir efnisbútar, perlur og prjál  eru efniviður nýrra drauma og drósir koma við sögu.

Íris Ólöf Sigurjónsdóttir er textílhönnuður og textílforvörður að mennt. Menntuð í Osló og London. Hún er safnstjóri  Byggðasafnsins á Dalvík og samfara safnastarfinu vinnur hún að textílhönnun á vinnustofu sinni í Svarfaðardal þar sem hún hefur búið sl. 10 ár. Íris Ólöf hefur tekið þátt í fjölmörgum samsýningum s.s hjá Handverki og Hönnun en sýningin í Flóru  er þriðja einkasýning Írisar.

Sýningin er öllum opin á opnunartíma Flóru mánudaga til föstudaga kl. 11-13 og 16-18 og laugardaga kl. 13-16 og stendur til laugardagsins 13. janúar 2013.
Nánari upplýsingar veitir Íris Ólöf í síma 892 1497 og Kristín í síma 661 0168.


Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður.

Ragnar Hólm Ragnarsson sýnir í Populus tremula

 

Laugardaginn 17. nóvember kl. 14.00 opnar Ragnar Hólm Ragnarsson aðra sýningu af þremur sem hann heldur nú í haust í tilefni af 5 ára afmæli dóttur sinnar, 50 ára afmæli sjálfs sín og 150 ára afmæli Akureyrarbæjar.

Að þessu sinni sýnir Ragnar í Populus tremula.

Sýningin verður einnig opin sunnudaginn 18. nóvember frá kl. 14.00-17.00. Aðeins þessi eina helgi.

Ómyndir í Deiglunni

Laugardaginn 10. nóvember opnar, á vegum Sjónlistamiðstöðvarinnar á Akureyri, sýning á verkum eftir listamennina Ástu Fanney Sigurðardóttur, Matthías Rúnar Sigurðsson og Victor Ocares. Sýningin ber yfirskriftina Ómyndir og opnar í Deiglunni í Listagili klukkan 15.
Vinnuheiti sýningarinnar var að rusla saman sýningu, því rýmið stóð autt og listamennirnir með nægan efnivið í sýningu. Þeir tefla mestmegnis fram teikningum og skissum, með hráa uppsetningu að leiðarljósi. Hjá þeim vaknaði sú spurning hvort hráleikinn væri boðlegur; hvort skissur og teikningar, hinar svokölluðu ómyndir, séu sýningarhæf verk. En mögulega skipta umgjörð og framsetning engu máli. Ómyndirnar tala sínu máli og í hverri þeirra blundar óheftur heimur listamannsins. Myndirnar vísa til drauma, veraldar ímyndunar og möguleika, sem komast hvergi annars staðar fyrir.

ÁSTA FANNEY SIGURÐARDÓTTIR
,,Svo læt ég töfrajöfra stikla milli augasteinanna, grafa vendi í enni þitt og teikna í hvel mynstur sem svæfir tímana og þú heyrir hvíslað í bæði eyrun þó enginn sé nálægur nema ómennskur hvalur á blaði“.
Ásta Fanney útskrifaðist úr myndlistardeild Listaháskóla Íslands vorið 2012.
Hún fæst einkum við blöndum ljóða og teikninga og súrrealískar samsetningar.
Ásta sér um listamannarekna sýningarrýmið Kunstschlager í félagi við fjóra aðra listamenn en það opnaði s.l. sumar á Rauðarárstíg 1, í Reykjavík. Þar gefst fólki kostur á að sjá sýningar og verk eftir unga, upprennandi listamenn.
 
MATTHÍAS RÚNAR SIGURÐSSON
 „Ég teikna mikið og hef gert frá því ég man eftir mér. Nú er það orðið
þannig að ég nota yfirleitt skrúfblýant, því á honum er oddurinn
alltaf beittur og strokleðrið, sem hægt er að skrúfa upp og niður,
nota ég líka mikið. Myndirnar sem ég geri koma úr mínum innri heim. Ég
lít á myndirnar sem gróður og hlutverk mitt er að láta hann vaxa. Ég
sæki í einbeitingu og tímaleysi og þannig líður mér best. Ég vil engan
æsing eða óþarfa flækjur. Verkin mín vekja í mér óviðjafnanlega gleði
sem ég finn hvergi fyrir annars staðar”.Matthías er á þriðja ári í myndlistardeild Listaháskóla Íslands.
 
 
VICTOR OCARES
Victor er hafsjór heilabrota og sýður saman hugmyndir úr ýmsum áttum. Hann hefur unun af því að leita svara innan heimspekinnar, vísindanna og annara fræðigreina sem hafa að geyma undarlegar ráðgátur og möguleika. Það sem hann tínir saman úr spekinni, sýður hann svo saman við hughrifin sem kvikna innan frá. Þar er heimur sem einnig geymir dularfullar gátur sem þarfnast svara og úrvinnslu. Afraksturinn gæti skilað sér í tónverki, í formi skúlptúra, teikninga eða hvernig sem honum þykir best að sýna fram á upplifun sína og heilabrot. Victor er á þriðja ári í myndlistardeild Listaháskóla Íslands.
 

Elva María Káradóttir með fyrirlestur í VMA

Föstudaginn 9. nóvember kl. 15:00 - 16:00 flytur Elva María Káradóttir fyrirlestur í Verkmenntaskólanum á Akureyri í stofu M01.


Eftir að hafa lokið stúdentsprófi frá Menntaskólanum á Akureyri hóf Elva nám við Esmod tískuskólann í París, þar sem hún nam bæði herra- og dömusníðagerð í 3 ár. Hún úskrifaðist þaðan sem " Aiguille d' or " eða gullnálin, fyrir bestu einkunn í sníðagerð.
Eftir námið hóf hún að vinna fyrir Jean Colonna sem ásamt Martin Margiela, Anne Demeulemeester og Helmut Lang höfðu djúp áhrif á þá stefnu sem tískan tók á tíunda áratugnum.

Þá tók við vinna í nokkur ár fyrir japanska fatahönnuðinn Shinichiro Arakawa sem veitti henni innsýn í japanska sníðagerð. Sá tími sem Elva vann fyrir Arakawa hafði mikil áhrif á hana sem má sjá í verkum hennar enn í dag.
Eftir þetta vann hún freelance fyrir ýmsa hönnuði um nokkurra ára skeið ásamt því að koma af stað barnafatamerkinu Pùùki.
Síðustu árin áður en Elva flutti aftur heim til Akureyrar vann hún fyrir John Galliano og Ninu Ricci.
Meðfram vinnu sinni í tískuheiminum hefur hún líka starfað bæði fyrir leikhús og óperu.


Í fyrirlestrinum mun Elva fara yfir feril sinn í máli og myndum og skoða stíla
þeirra hönnuða sem hún hefur unnið fyrir.


Fyrirlesturinn er hluti af námsefni áfanganna „Listir-Menning“ á listnámsbraut VMA en allir áhugasamir eru hjartanlega velkomnir!
Enginn aðgangseyrir.

Ragna Hermannsdóttir - Grafík og Bókverk í Listasafninu á Akureyri

Í Listasafninu á Akureyri opnar Sjónlistamiðstöðin sýningu á verkum listakonunnar Rögnu Hermannsdóttur laugardaginn 10. nóvember, kl. 15.  Verkin á sýningunni eru valin úr rausnarlegri dánargjöf Rögnu til Safnahússins á Húsavík.
Ragna var fjölhæf listakona og vann í marga miðla en á þessari sýningu er lögð áhersla á grafíkverk hennar einkanlega tréristur og bókverk en á því sviði náði hún sérstökum árangri.  Sköpun hennar er  dularfull og óræð í senn en samt er eins og að baki búi óþreyjufull löngun til að miðla, segja frá og koma ákveðnum boðskap á framfæri.  Heildaráhrifin eru afar sterk  en þó þægileg og hlý eins og Ragna var sjálf. Eftir nám í ljósmyndun á árunum 1972-1975 hóf Ragna, 55 ára að aldri, listnám sitt við Myndlista og handíðaskóla Íslands. Leið hennar lá síðan til Hollands, í Rijks-Akademie í Amsterdam og til Rochester, New York, í áframhaldandi nám.  Þegar heim var komið hóf hún heimspekinám við Háskóla Íslands þar sem hún lauk BA námi 1997, þá 73 ára að aldri. Páll Skúlason var leiðbeinandi hennar í lokaverkefninu sem fjallaði um heimskuna. Þess má einnig geta að árið 1990 dvaldi hún í Marfa, listamiðstöð Donald Judd í Texas.
Allan þennan tíma var hugur Rögnu opinn og leitandi og í verkum sínum sameinar hún þroska fullorðinnar manneskju og leitandi lærdómsþrá æskuáranna.
Á tímabilinu 1976-2003 hélt Ragna 22 einkasýningar á Íslandi og í Hollandi, og tók einnig þátt í fjölda samsýninga.
Ragna Hermannsdóttir fæddist í Bárðardal 1924 og var 87 ára að aldri er hún lést, á síðasta ári.

Málþingið "Listin og atvinnulífið" í Sal Myndlistarfélagsins

Fimmtudaginn 8.nóvember kl. 15.00 standa Myndlistarfélagið og Myndlistaskólinn á Akureyri fyrir málþingi í Sal Myndlistarfélagsins sem ber yfirskriftina „Listin og atvinnulífið“.

Um er að ræða samstarfsverkefni Myndlistarfélagsins og Myndlistaskólans sem fellur undir verkefni sem efla á þekkingu og fræðslu á sviði menningar og lista. Verkefnið hefur hlotið styrk frá Eyþingi og er markmiðið að gera listina og hlutverk hennar í atvinnulífinu og samfélaginu, aðgengilega fyrir hinn almenna borgara ásamt því að vera upplýsandi fyrir starfandi myndlistarmenn og listnema.

Helgi Vilberg skólastjóri Myndlistarskólans, Þórgnýr Dýrfjörð framkvæmdastjóri Akureyrarstofu, Hlynur Hallsson myndlistarmaður og Guðrún Harpa Örvarsdóttir formaður Myndlistarfélgasins fara með erindi á þinginu.

Málþingið er opið öllum sem áhuga hafa og vilja auka skilning sinn á myndlist í víðu samhengi og fer fram í Sal Myndlistarfélagsins að Kaupvangsstræti 10, 2.hæð.

Hlynur Helgason opnar sýninguna Patagónía í Mjólkurbúðinni

Hlynur Helgason opnar sýninguna Patagónía laugardaginn 10.nóvember kl. 15 í Mjólkurbúðinni Listagili á Akureyri.
 
Sýning Hlyns Helgasonar Patagónía samanstendur af gvassakvarellum, ljósmyndum, ljósmyndaskyggnum og myndbandsverki.

Myndefni núverandi sýningar, Patagóníu, er unnið árið 2010 í Argentínu, bæði í Buones Aires en einnig á ferð þvert yfir suðurhluta landsins, Patagóníu. Hugmyndin er að birta á Akureyri vissan fjarska sem vonast er til að tóni þó við ímynd Akureyringa og þátttöku í heiminum.
 
Viss vakning á bak við þrána sem fylgir sýningunni er fengin úr kafla Atómstöðvar Halldórs Laxness, en þar er Patagónía kynnt til sögunnar sem einskonar draumaland þar sem jafnrétti og réttlæti getur átt sér stað:
 
Hvað viltu ég geri, sagði hann, og ég skal gera það. Ég horfði á hann eins leingi og ég gat, síðan oní hnén á mér; en svarað gat ég ekki. Viltu ég afsali mér öllu, sagði hann: firmanu, kjördæminu, opin­berum trúnaðarstöðum, flokki, lagsmönnum, vinum – og verði aftur fátækur mentamaður. Aldrei aldrei gæti ég þolað þú yrðir lítillækkaður um hársbreidd vegna mín, sagði ég. Enda er ég viss um að þó þú verðir fátækur mundirðu halda áfram að vera það sem vaninn hefur gert þig, sá sem þú ert; og ég það sem ég er, sveitakrakki, vinnustúlka, alþýða; ekkert nema þráin eftir að verða að manni, kunna eitthvað, geta eitthvað sjálf, láta ekki borga fyrir mig, borga fyrir mig sjálf. Hvar ætti að vera til staður fyrir okkur bæði? Nú hlýturðu að sjá að Patagónía er ekki sem slökust hugmynd, sagði hann. Er til nokkur patagónía? sagði ég. Nú skal ég sýna þér á kortinu, sagði hann. Er það þá ekki eitthvert villimannalandið? sagði ég.
 
Hlynur Helgason á að baki rúmlega 25 ára feril sem myndlistarmaður. Á ferli sínum hefur hann sýnt víða, í Reykjavík, á Akureyri, í Þýskalandi, Tékklandi og Argentínu. Nánari upplýsingar um feril Hlyns og verk er að finna á vefsíðum hans: http://tacticalart.net og http://artinfo.is.
Hlynur útskrifaðist frá málaradeild Mynd og Handíðaskóla Íslands 1986 og lauk M.A. prófi frá Goldsmith´s Collage, Un. Of London 1994. Á síðasta ári lauk Hlynur Ph.D. prófi í Media Philosophy frá European Gratuate School.
 
Sýning Hlyns Helgasonar Patagónía stendur 10.-25.nóvember og eru allir velkomnir.
Opnunartími er laugardaga og sunnudaga kl.14-17 og eftir frekara samkomulagi.
Mjólkurbúðin Listagili s. 8957173

Síðusta sýningarhelgi SJÓNLIST 2012 í Listasafninu á Akureyri

Tilkynning um síðustu sýningarhelgi SJÓNLIST 2012 í Listasafninu á Akureyri.

Sýningin lokar sunnudaginn 4. nóvember kl.17.

Sýningin er haldin að tilefni endurreisn íslensku Sjónlistaverðlaunanna en tilnefndir listamenn að þessu sinni voru Ásmundur Ásmundsson fyrir sýninguna Hola í Listasafni Reykjavíkur – Hafnarhúsi sem haldin var árið 2009, Katrín Sigurðardóttir fyrir sýninguna Katrin Sigurdardottir at the Met sem haldin var á Metropolitan safninu í New York, 2010-2011 og Ragnar Kjartansson fyrir sýningarnar The End, sem var framlag Íslands á Feneyjartvíæringnum árið 2009, Bliss á Performa-hátíðinni í New York, 2011 og Song í Carnegie safninu í Pittsburgh árið 2011.
 
Einnig var Heiðurslistamaður Sjónlistar útnefndur og viðurkennning, Spíran, veitt ungum og upprennandi listamanni. Líkt og við fyrri verðlaunaafhendingar voru allar tilnefningar í höndum faglegrar og óháðar nefndar skipuð þremur forsvarsmönnum fyrir hönd félagasamtaka og stofnana. Ragnar Kjartansson hlaut Sjónlistarorðuna 2012, en Hildur Hákonardóttir var kjörin Heiðurslistamaður fyrir ævilangt framlag til íslenskrar myndlistar og Janette Castioni var útnefnd Spíran 2012. Hér fyrir neðan má lesa greinargerð dómnefndarinnar um þá listamenn til tilnefndir voru til Íslensku sjónlistaverðlaunanna í ár.



Hér sést Katrín Jakobsdóttir afhenda Guðrúnu Ásmundsdóttir móður Ragnars verðlaunin í fjarveru hans
 

Sýning á verkum ofangreindra listamanna líkur eins og áður sagði 4. nóvember kl. 17. í Listasafninu á Akureyri.
 

---------------------------------------------

 
 
 
Greinagerð dómnefndar fyrir Íslensku sjónlistaverðlaunin 2012
 
Það eru afar jákvæð tíðindi fyrir íslenskt myndlistarlíf að Íslensku sjónlistaverðlaunin skuli vera endurreist eftir fjögurra ára dvala. Starfi og verkefnum myndlistarmanna er nauðsynlegt að hampa og segja má að Sjónlistaverðlaunin hafi verið mikilvægur þáttur í því umhverfi þar sem litið er yfir farinn veg hvers árs fyrir sig.
Líkt og við fyrri verðlaunaafhendingar liggur að baki óháð nefnd skipuð þremur forsvarsmönnum fyrir hönd félagasamtaka og stofnana, Listaháskóla Íslands, Sambands íslenskra myndlistarmanna og Listfræðafélags Íslands. Sú nýbreytni hefur verið tekin upp að kalla eftir tillögum í viðhorfskönnun sem send var út á félaga Sambands íslenskra myndlistarmanna, Nýlistasafnsins, Listfræðafélags Íslands og Listaháskóla Íslands. Dómnefnd tók tillit til þess viðhorfs sem birtist meðal þátttakenda án þess að könnunin hafi haft mótandi áhrif á niðurstöðu nefndarinnar.
Starf dómnefndar fyrir Íslensku sjónlistaverðlaunin í ár var  sérstaklega vandasamt því ólíkt fyrri verðlaunum var, við val á tilnefndum listamönnum, í þetta sinn litið til baka á sýningarsögu íslenskra myndlistarmanna síðastliðin fjögur ár. Við þá rannsóknarvinnu og skoðanaskipti sem fram fóru á fundum nefndarinnar kom skýrt í ljós hve metnaðarfullt og fjölbreytt sýningarhald íslenskra listamanna er, bæði hérlendis og á alþjóðlegum vettvangi. Afstaða var tekin til fjölda merkra sýninga sem staðið hafa yfir á tímabilinu. Eftir krefjandi en jafnframt gefandi umræðu meðal nefndarmanna var vel ígrunduð niðurstaða dómnefndar einróma með tilliti til þeirra margþættu forsenda sem liggja að baki valinu.
 
Dómnefndin tilnefnir eftirfarandi þrjá íslenska listamenn til Íslensku sjónlistaverðlaunanna árið 2012. Þau eru: Ásmundur Ásmundsson fyrir sýninguna Hola í Listasafni Reykjavíkur – Hafnarhúsi sem haldin var árið 2009, Katrín Sigurðardóttir fyrir sýninguna Katrin Sigurdardottir at the Met sem haldin var á Metropolitan safninu í New York, 2010-2011 og Ragnar Kjartansson fyrir sýningarnar The End, framlagi Íslands á Feneyjartvíæringnum árið 2009; Bliss á Performa-hátíðinni í New York, 2011; og Song í Carnegie safninu í Pittsburgh árið 2011. Tekin var afstaða til þeirrar staðreyndar að tveir af þremur tilnefndum listamönnum í ár hafi áður verið tilnefndir til Sjónlistarverðlaunanna (Katrín Sigurðardóttir árið 2006 og Ragnar Kjartansson árið 2008). Telur dómnefnd mikilvægt að líta ekki framhjá markverðum sýningum og verkefnum listamanna sökum þess að þeir hafi áður hlotið viðurkenningu fyrir fyrri verk, enda ekki lagðar slíkar forsendur í vali dómnefndar hverju sinni.
Ásmundur Ásmundsson (f. 1971) er vel kunnur fyrir afdráttarlausa gagnrýni á samfélagið í verkum sínum. Hann hefur lagt skýrar línur með myndlistinni sem stendur sem hnífbeitt rödd til gagnrýnnar umræðu eða öllu heldur róttæks niðurrifs, þar sem jafnan eldfim málefni eru lögð til endurskoðunnar. Sýningin Hola þótti að mati dómnefndar draga þarfa mynd af því umhverfi sem íslenskt samfélag stóð andspænis árið 2009 en sýningin tilheyrði sýningarröð sem kallaði eftir því að tengja myndlistina út fyrir stofnunina. Margra tonna steypuklumpur mótaður úr holu sem ungir grunnskólanemendur grófu upp er táknrænn fyrir þá gildru sem lífshættir íslenskt samfélags hefur lagt fyrir komandi kynslóðir. Verk Ásmundar eru þó ávallt margræð þar sem fagurfræði og efnistök ávarpa einnig hugmyndafræðilegar og listsögulegar hefðir og samhengi. Í einfaldleika sínum er steypuklumpur Ásmundar einnig tilraun til afbyggingar á hugmyndafræði módernismans. Í hrárri steinsteypunni er að finna tvöfeldni sem grefur undan sjálfhverfri áherslu á listmiðilinn með því beina samtali sem listamaðurinn krefur áhorfandann til að horfast í augu við.
Sýning Katrínar Sigurðardóttur  (f. 1967), Katrin Sigurdardottir at the Met vann í samræðu við safneign Metropolitan safnsins og samanstóð af tveim innsetningum sem báru yfirskriftina Boiseries. Katrín er þekkt fyrir endurgerð og túlkun á stöðum bæði raunverulegum og ímynduðum, en innsetningarnar voru endurgerðir í fullri stærð á tveimur frönskum herbergjum frá 18. öld sem varðveittar eru í safninu. Einu frá Hôtel de Crillon (1777-80) á Place de la Concorde í París og öðru frá Hôtel de Cabris (ca. 1774) frá Grasse í Provence. Alhvítt yfirbragð innsetninganna gefur þessum stöðum fágað og hlutlaust yfirbragð og rýnir þar um leið í sögulegan bakrunn hins upprunalega staðar sem flysjaður hefur verið af stoðum sínum og yfirfærður út fyrir samhengi sitt. Það er hin hugmyndfræðilegi undirtónn verksins sem felur því merkingu sína. Margslungin samsetning um stað og upplifun er höfuðeinkenni verka Katrínar en með innsetningunum má sjá djúpa heimspekilega samræðu kallast á við þau grunnþemu.
Ragnar Kjartansson (f. 1976) hefur nýtt sér sjónarspil og bakland leikhússins sem samtvinnast við efnistök gjörningalistarinnar. Gjarnan fær hann að láni efnivið úr safni klassískra verka, hvort sem um er að ræða bókmenntir, leikhúsverk eða jafnvel staðlaðar ímyndir hins rómantíska listamanns. Á undanförnum árum hefur hann fengist við svokallaða þolgæðisgjörninga sem tilheyrðu The End, sex mánaða gjörningi á Feneyjartvíæringnum árið 2009, Bliss sem var tólf klukkustunda óperuflutningur sem fluttur var á Performa-hátíðinni í New York og Song sem var þriggja vikna gjörningur fluttur af frænkum listamannsins á Carnegie safninu í Pittsburgh árið 2011. Með þessum verkefnum hefur Ragnar sýnt fram á að hafa náð fullu valdi á viðfangi sínu. Það er á mörkum þrautseigju og uppgjafar sem virkni eða ‘pathos’ verka hans verður sýnilegt í samspili andstæðra tilfinninga sem spretta fram meðal áhorfandans.
Það er áhugavert að sjá að landfræðileg mörk þurfa ekki að hafa áhrif á störf listamanna í myndlist samtímans. Katrín Sigurðardóttir kann að starfa að mestu frá New York í Bandaríkjunum en hefur ávallt lagt upp úr því að halda sterkum tengslum við íslenskt myndlistarlíf með reglulegum sýningum og kennslu á Íslandi samfara störfum sínum á alþjóðlegum vettvangi. Ásmundur og Ragnar hafa aftur á móti starfað að mestu frá Íslandi og með því móti haft mótandi áhrif á íslenskt myndlistarumhverfi. Ásmundur hefur með verkum sínum og skrifum sérstaklega beint sjónum að íslensku samfélagi í beinum samræðum við pólitískt og menningarlegt ástand hverju sinni. En báðir listamenn hafa einnig teygt starfsemi sína út fyrir landsteinanna, eins og birtist með skýrum hætti í störfum Ragnars síðustu ár. Á þessu má sjá að gróskan í íslensku myndlistarlífi elur af sér framúrskarandi listamenn sem hafa vægi í alþjóðlegu samhengi listarinnar.
 
 
Líkt og fyrri ár er einnig veitt heiðursorða fyrir einstakt æviframlag til myndlistar á Íslandi. Í ár er það Hildur Hákonardóttir sem hlýtur heiðursorðu Íslensku sjónlistaverðlaunanna. Afstaða dómnefndar er bundin við þann virka þátt sem Hildur átti í myndlistarumhverfinu á Íslandi sem hefur haft mótandi áhrif á þær kynslóðir sem á eftir komu og það umhverfi sem við þeim blasir allt til dagsins í dag.
Hildur er fædd í Reykjavík árið 1938. Hún lauk námi frá Myndlista- og handíðaskóla Íslands árið 1968 og stundaði framhaldsnám við Edinburgh College of Art frá 1968-69. Hún var meðlimur í SÚM hópnum og tók virkan þátt í kvennabaráttunni og þeim miklu þjóðfélagshræringum sem áttu sér stað á árunum eftir stúdentabyltinguna árið 1968. Í list sinni lagði Hildur einkum fyrir sig myndvefnað sem hafði sterkar skírskotanir til atburða eða ástands í samtímanum.
Auk listsköpunar sinnti hún margskonar störfum tengdum myndlist. Meðal annars kenndi hún við Myndlista- og handíðaskóla Íslands á árunum 1969 -1982 og var síðar skólastjóri hans frá 1975-1978 og stofnaði þá hina umdeildu Nýlistadeild og einnig málaradeild. Hún var forstöðumaður Byggða- og listasafns Árnessýslu 1982-1992 og síðar Listasafns Árnesinga til ársins 1996. Þó að ekki hafi mikið farið fyrir störfum Hildar í myndlist undanfarin ár hefur innkoma hennar t.a.m. með yfirlitssýningu í Listasafni ASÍ á síðasta ári og samsýningu í Sjónlistarmiðstöðinni á Akureyri fyrr á árinu, undirstrikað mikilvægi hennar í íslensku myndlistarumhverfi. 
 
Nýr flokkur hefur verið tekinn upp til að heiðra, utan heiðurslistamanns , listamann af yngri kynslóð íslenskra listamanna, undir heitinu Spíran. Jeannette Castioni er kjörin Spíra Íslensku Sjónlistarverðlaunanna árið 2012. Hugmyndin um spíru í myndlist er afstæð og á Jeannette fremur ungan myndlistaraldur að baki sér þrátt fyrir að ferill hennar tengist störfum í myndlist til lengri tíma. Jeannette er fædd árið 1968 í Verona á Ítalíu og býr og starfar bæði þar og í Reykjavík. Hún nam forvörslu við The School of Conservations and Restoration í Flórens, Ítalíu (1990-93) og síðar málaralist við Academy of Arts, Bologna, Ítalíu (1998-2002). Hún útskrifaðist með BA- gráðu í myndlist frá Listaháskóla Íslands árið 2006 ásamt framhaldsnámi í kennslufræðum, 2007. Árið 2008 lauk hún einnig námi í ítölskum bókmenntum og heimsspeki við University of Literature and Philosophy á Ítalíu. Verk Jeannette búa yfir ákveðinni dýpt þar sem hún nýtir sinn klassíska bakgrunn til rökræðna við samtímann sem gjarnan tengjast menningarlegum eða félagslegum efa. Hún hefur með fyrri verkum fundið sinn persónulega stíl og skýran listrænan vettvang og á að baki sér sýningarferil sem vert er að taka eftir.
 
Dómnefnd Íslensku sjónlistaverðlaunanna árið 2012 er bæði ánægja og heiður að tilkynna tilnefningar til verðlaunanna og er sannfærð um að valið hafi markast af bestu vitund og samvisku.
 
Fyrir hönd dómnefndar,
Kristín Dagmar Jóhannesdóttir, formaður.
 
 
DÓMNEFND
 
Hildur Bjarnadóttir, myndlistarmaður
Fyrir hönd Listaháskóla Íslands
 
Hlynur Hallsson, myndlistarmaður
Fyrir hönd Sambands íslenskra myndlistarmanna
 
Kristín Dagmar Jóhannesdóttir, listfræðingur
Fyrir hönd Listfræðafélags Íslands

Stefán Boulter sýnir Teikningar í Populus Tremula

Viltu sýna í Deiglunni 2013?

Sjónlistamiðstöðin á Akureyri hefur nú auglýst sýningarými í Deiglunni laust til umsókna fyrir sýningarhald 2013.
Áhugasamir skulu senda umsóknir fyrir 29. október n.k. til Sjónlistamiðstöðvarinnar, Kaupvangsstræti 12-24, 600 Akureyri, merktar “Deiglan 2013” eða á neftangið [e-mail]

 

Umsókninni skulu fylgja eftirfarandi gögn:

 
Persónulegar upplýsingar


Ferilskrá  (ath. ef feillinn er stuttur eða um 1. sýningu að ræða þarf einungis að greina frá því)


Lýsing á fyrirhugaðri sýningu


Verk eftir viðkomanda.  (myndir af 5-10 verkum)



Ath. Sjónlistamiðstöðin áskilur sér rétt til að velja eða hafna öllum umsóknum.

Síðustu forvöð að sjá sýningu GÓMS í Sal Myndlistarfélagsins

Seinasta helgi til að sjá sýningu GÓMS í sal myndlistarfélagsins er helgin 19.-21. október,
GÓMS er samstarf Georg Óskar & Margeir Dire Sigurðssonar, verða þeir félagar á staðnum,
laugardaginn og sunnudaginn milli 14-17, og geta svarað spurningum ef þær eru einhverjar, sem
snúa að sýningunni og samtarfi þeirra tveggja.

opnunartími er 14-17 föstudaginn- sunnudags. 19.-21. október.
og verður opnað laugadagshvöldið 20. okt. aftur kl 20-22:00.

salur myndlistarfélagsins, kaupvangstræti 10, 600 Akureyri.

Opnar vinnustofur í Flóru á laugardag

Viðburðarstaðnum, versluninni og vinnustofu Flóru hefur undanfarnar vikur verið komið fyrir í Gamla Kaupfélagshúsinu í Hafnarstræti 90 á Akureyri, en í því húsi var verslunin Frúin í Hamborg starfrækt síðustu ár. Í tilefni af þessum umbreytingum opnar Flóra vinnustofur hússins laugardaginn 20. október kl. 15-17.
Gamla Kaupfélagshúsið á Akureyri hefur því enn á ný fengið nýtt hlutverk, en margvísleg starfsemi hefur verið í húsinu frá því að það var reist af Pöntunarfélagi Eyfirðinga (síðar Kaupfélag Eyfirðinga) í upphaflegri mynd árið 1898, en þar á meðal er prentsmiðja, ljósmyndastofa, ferðaskrifstofa, ræðisskrifstofa, tannlæknastofa, verslanir, steinasafnarar og stjórnmálastarfsemi.
Og nú er Flóra starfrækt á tveimur neðri hæðum hússins, en eins og kunnugt er þá var Flóra áður rekin í suðurhluta Listagilsins á Akureyri.
Með flutningum var starfsemi Flóru einnig víkkuð út að hluta. Jafnframt því að vera verslun sem leggur áherslu á endurunnar vörur, endurnýtingu og náttúruvörur, ásamt myndlist, tónlist og bókmenntum, hefur Flóra staðið fyrir ýmsum viðburðum svo sem myndlistasýningum, upplestrum, gjörningum og kvikmyndasýningum. Í gamla húsnæðinu í Listagili var einn aðili með vinnustofu í Flóru en nú hefur þeim fjölgað í sex, fólk sem sinnir fjölbreytilegu skapandi starfi eins og ljósmyndun, saumum, skrifum, fræðistörfum, textílþrykki og myndlist og þá er nú ekki allt upp talið. Áherslan í starfinu er enn sem fyrr á endurvinnslu og endurnýtingu.
Á opnum vinnustofum Flóru á laugardag býðst fólki að rölta um staðinn með kökubita og kaffi, kynnast þessu sögufræga húsi betur og sjá það sem verið er að vinna að. Allir velkomnir.

(Á meðfylgjandi mynd má sjá þau sem eru með vinnustofur í Flóru en það eru: Hlynur Hallsson, Sigurjón Már Svanbergsson, Kristín Þóra Kjartansdóttir, Elín Hulda Einarsdóttir, Marta Kusinska og María Franksdóttir Ellmer.)

flóra - hafnarstræti 90 - 600 akureyri - s.6810168 - http://floraflora.is 

Síðustu forvöð að sjá sýningu Unnars Arnar í Flóru

Unnar Örn
Brotabrot úr afrekssögu óeirðar á Íslandi: Fyrsti hluti
Fragments From the Deeds of Unrest in Iceland: Part One
15. september - 20. október 2012
Sýningarlok laugardaginn 20. október
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Nú eru síðustu forvöð að sjá sýningu Unnars Arnar J. Auðarsonar sem nefnist „Brotabrot úr afrekssögu óeirðar á Íslandi: Fyrsti hluti” í Flóru í Hafnarstræti 90 á Akureyri. Sýning er opin alla virka daga kl. 12-18 og lýkur laugardaginn 20. október og þá er opið kl. 12-16.

Á sýningunni í Flóru beinir Unnar Örn sjónum sínum að geymd upplýsinga tengdum viðspyrnu almennings og hvernig átök í sögu þjóðar er eytt úr sameiginlegu minni af ríkjandi valdhöfum.

Unnar Örn J. Auðarson stundaði nám við Myndlista- og handíðaskóla Íslands og framhaldsnám við Listaakademíuna í Malmö. Unnar Örn vinnur í ólíka miðla en verk hans eru yfirleitt hlutar úr stærri innsetningum þar sem hann vinnur á gagnrýninn hátt með umhverfi sitt, samfélagið og hlutverk listamannsins innan þess. Unnar hélt sýna fyrstu einkasýningu í verslunarmiðstöðinni Kringlunni sem hluti af Gallerí Gúlp árið 1996 og síðan þá hefur hann tekið þátt í yfir 50 einka- og samsýningum hérlendis og erlendis.

Heimasíða Unnars Arnar: http://unnarorn.net


Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður.

WATER/VATN dagskrá í Myndlistaskólanum á Akureyri með þátttöku fimm erlendra myndlistarskóla

Í liðinni viku komu 10 kennarar og nemendur frá fimm erlendum myndlistarskólum og tóku þátt í sjö daga námskeiði ásamt nemendum og kennurum í Myndlistaskólanum á Akureyri þar sem umfjöllunarefnið var VATN. Skólarnir sem tóku þátt í þessu verkefni eru Aarhus Art Academy, Turku University of Applied Sciences/Arts Academy, Novia University of Applied Sciences, Fine Arts department, Tartu Art College, Estonia og Myndlistaskólinn á Akureyri.

Hilda Jana hjá N4 kom og tók viðtöl og myndir sem sjá má hér: http://www.n4.is/tube/file/view/2871

Matthildur Ásta sýnir í Populus tremula

SPEGILL, SPEGILL, HERM ÞÚ MÉR ...

Laugardaginn 13. október kl. 14.00 mun Matthildur Ásta opna sýninguna Spegill, spegill, herm þú mér ... í Populus tremula. Þar sýnir hún dömulega mósaíkspegla.

Matthildur Ásta lauk námi frá Myndlistaskólanum á Akureyri síðastliðið vor og er þetta hennar fyrsta einkasýning. Verkin, sem eru unnin úr speglum og lituðu gleri, eru af ýmsum stærðum og gerðum.

Einnig opið sunnudaginn 14. október kl. 14.00-17.00 – Aðeins flessi eina helgi.

Einar Helgason 80 ára með sýningu í Festarkletti

Heimildarmyndin STEYPA sýnd í Flóru

Heimildarmyndin STEYPA eftir þau Markús Andrésson og Ragnheiði Gestsdóttur verður sýnd í Flóru fimmtudagskvöldið 11. október 2012 kl. 20
Heimildamyndin STEYPA er mynd um íslenska samtímamyndlist. Í myndinni er fylgst með sjö listamönnum um tveggja ára skeið. Þeir eru að koma undir sig fótunum heima og erlendis og tengjast hvor öðrum á ýmsan hátt. Steypa gefur innsýn í vinnuferli og viðhorf þessarar kynslóðar, sýnir hvernig hugmyndir fæðast og eru útfærðar í listaverk.

Myndin er sýnd í tilefni sýningar Unnars Arnar Auðarsonar í Flóru sem nefnist "Brotabrot úr afrekssögu óeirðar á Íslandi: Fyrsti hluti / Fragments From the Deeds of Unrest in Iceland: Part One". Ásamt Unnari fjallar STEYPA um Ásmund Ásmundsson og Katrínu Sigurðardóttur en þau sýna einmitt um þessar mundir í Listasafninu á Akureyri enda tilnefnd til Sjónlistaverðlaunanna 2012. Auk þeirra þriggja er fjallað um Gjörningaklúbbinn, Margréti H. Blöndal, Huginn Þór Arason og Gabríelu Friðriskdóttur í STEYPU.

Ásmundur hellir Pepsí í Fanta-flöskur og spyr sig „Hvað er list?“ Hann stingur upp á að það sé það sem listamaður geri. Með það til hliðsjónar er áhersla heimildamyndarinnar á það ferli sem listamennirnir ganga í gegnum áður en verk þeirra verða að veruleika. Gabríela hendir í deig og smellir á andlitið á sér, Margrét heillast af hulsum og pakkningum í Mosfellsbæ, Huginn klippir af sér hárið og lætur búa til hárkollu, Unnar stelur afleggjurum á elliheimili, Gjörningaklúbburinn endurskapar stjörnuhiminn Van Goghs úr lakkrísafgöngum, Katrín smíðar lítið hús til þess eins að henda því fram af stærra húsi. Hvað liggur að baki? Á þetta erindi við okkur hin?

STEYPA kom upphaflega út árið 2007 þegar hún ferðaðist á milli kvikmyndahátíða víða um heim, en hún var tekin á árunum 2003-06.

Myndin er með íslensku tali og enskum texta og tekur um klukkutíma í sýningu en á eftir verða umræður um myndina og um íslenska samtímalist.

STEYPA  er sýnd í Flóru í samvinnu við Kvikmyndaklúbbinn KvikYndi og Lofi Productions sem framleiðir myndina. Það er ókeypis aðgangur.

http://vimeo.com/33758581

Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri