Georg Óskar Manúelsson sýnir í Populus Tremula

Laugardaginn 18. desember kl. 14:00 opnar Georg Óskar Manúelsson myndlistarsýn­inguna „This moment is nothing special about nothing – only me and Claude Debussy“ í Populus Tremula, í Listagilinu á Akureyri.

Sýning Georgs Óskars samanstendur af málverkum, teikningum, textum og kroti. Verkin fjalla um að festa niður vangaveltur líðandi stundar, líkt og að halda dagbók.

Sýningin er einnig opin sunnudaginn 19. desember kl 14:00-17:00. Aðeins þessi eina helgi.

Síðasta sýningarhelgi Portrett Nú! í Listasafninu á Akureyri

Nú er komið að síðustu sýningarhelgi Portrett Nú! í Listasafninu á Akureyri. Sýningin er unnin í samstarfi við Fredriksborgarsafn í Danmörku, en hér er á ferðinni samnorræn portrettsýning sem fyrst var sett upp árið 2008. Á sýningunni PortrettNú! er að finna verk frá öllum Norðurlöndunum og er öllum birtingarformum portrettlistarinnar gert jafn hátt undir höfði.

Að sýningu lokinni á Akureyri mun Portrett Nú! halda ferðalagi sínu áfram um Norðurlönd. Í janúar 2011 verður hún sett upp í Tikanojas konsthem í Vaasa í Finlandi. Þá taka Norðmenn við þar sem sýningin verður sett upp í Norsk Folkemuseum í Osló í apríl 2011.

Listasafnið á Akureyri er opið á laugardag og sunnudag frá klukkan 12 til 17.

Þann 15 janúar 2011 opnar safnið á ný með samsýningu listamannanna Sigtryggs Baldvinssonar og Þorra Hringssonar.

Frekari upplýsingar veitir Örlygur Hnefill Örlygsson safnfulltrúi í síma 848 7600.

UMSÓKN UM ÞÁTTTÖKU Á LISTASUMRI Á AKUREYRI 19. JÚNÍ – 27. ÁGÚST 2011

Menningarmiðstöðin í Listagili á Akureyri auglýsir eftir umsóknum um þátttöku á Listasumri á Akureyri 2011. Umsóknarfrestur er til 20. desember 2010.

Umsóknareyðublöð og upplýsingar um skilmála fyrir þátttakendur er að finna á vefsíðunni www.listagil.akureyri.is
Umsækjendur eru hvattir til að kynna sér skilmálana.

Nánari upplýsingar hjá Menningarmiðstöðinni í Listagili í síma 466-2609 eða í netpósti [e-mail] og/eða [e-mail]

Umsóknir og fylgigögn skulu send á neðanskráð póstfang, póststimplað fyrir 20. desember 2010:

Menningarmiðstöðin í Listagili
Ketilhúsið
Pósthólf 115
602 Akureyri

 

Salur Myndlistarfélagsins Gallery BOX laus til umsóknar fyrir 1. janúar 2011

Sýningarnefnd Myndlistarfélagsins óskar eftir umsóknum um myndlistasýningar í Sal Myndlistarfélagsins Gallery BOX fyrir tímabilið mars 2011 - janúar 2012. Áhugasamir fylli út umsóknareyðublað og sendi til Myndlistarfélagsins á Akureyri ásamt ferilskrá, myndum af verkum og greinargóðri lýsingu á fyrirhugaðri sýningu. Umsóknarfrestur er til 1. janúar 2011.

Umsóknir sendist til:

Myndlistarfélagið

Pósthólf  235

600 Akureyri

Eða í netfangið: [e-mail]

 

 

Með bestu kveðju f.h. sýningarnefndar

Dagrún Matthíasdóttir

Sýningarými í Listagili til leigu

Sýningarými í Listagili.

Laust er til umsóknar 72 fm. sýningarými í Listagili, Akureyri sem losnar 1. janúar 2011.

Áhugasamir sendi inn skriflegar umsóknir á [e-mail] í síðasta lagi 10. desember 2010.
Í umsókninni þarf að koma fram ítarleg lýsing á þeirri starfsemi sem umsóknaraðili hyggst standa fyrir í rýminu.

Skilyrði eru fyrir opinni og lifandi þátttöku í listalífinu í Listagili.

Marjolijn van der Meij og Lind Völundardóttir opna sýningu í Boxinu, sal Myndlistarfélagsins

Marjolijn van der Meij og Lind Völundardóttir opna sýningu sína í Boxinu, sal Myndlistarfélagsins  laugardaginn 4. desember kl. 14.

Sýningin er opin frá 14-17, laugardaga og sunnudaga til 19. desember.

Allir velkomnir.

 

galleriBOX, salur Myndlistarfélgsins

Kaupvangstræti 10

600 Akureyri

Á facebook

 

Hugi Hlynsson og Júlía Runólfsdóttir opna ljósmyndasýningu á Café Karólínu

Hugi Hlynsson og Júlía Runólfsdóttir

It's like living in your own world

04.12.10 - 07.01.11

Café Karólína // Kaupvangsstræti 23 // IS 600 Akureyri // 4612755

Hugi Hlynsson og Júlía Runólfsdóttir opna sýninguna “It's like living in your own world” á Café Karólínu laugardaginn 4. desember kl. 15:00. Sýningin stendur til 8. janúar 2011 og eru allir velkomnir. Þetta er síðasta sýningin á Café Karólínu í bili en þar hafa verið reglulegar sýningar frá opnun árið 1993.
Sýningin samanstendur af svart/hvítum ljósmyndum. Myndirnar eru teknar við að hausti til við Mývatn og sýna vatnið og umhverfi þess við einstakar aðstæður. Hitinn við vatnið er rétt yfir frostmarki, það er algjör kyrrð og þoka, einstaka vatnsdropar falla á vatnið. Vatnið er spegilslétt og þögnin er nánast yfirþyrmandi, náttúran hefur öll völd.

Myndirnar voru fyrst sýndar við opnun listahátíðarinnar Jónsvöku sumarið 2010 og er þetta annað skiptið sem þær eru á sýningu.

Júlía Runólfsdóttir er 17 ára gamall nemi frá Reykjavík með ást á þríhyrningum, flæðandi formum og skuggum. Hún stundar nám við Menntaskólann við Hamrahlíð og einnig við Myndlistaskólann í Reykjavík. Júlía hefur haft áhuga á ljósmyndun síðan hún var bara barn og myndað af nokkurri alvöru síðastliðin ár. Hún tók þátt í alþjóðlegri ljósmyndabók fyrir ungmenni árið 2008 og myndir eftir hana hafa birst í ótalmörgum tímaritum og blöðum auk þess sem hún hélt sína fyrstu sýningu, með Huga Hlynssyni, í sumar.

Hugi er fæddur á Akureyri árið 1991 en fluttist tveggja ára til Þýskalands og bjó þar til átta ára aldurs þegar hann fluttist aftur til Akureyrar. Hugi hefur lengi haft áhuga á ljósmyndun og hefur á undanförnum árum reynt að marka sér beinni stefnu á áhugasviði sínu innan ljósmyndunar. Hugi er nemandi á náttúrufræðibraut VMA og stundar dulin ljóðaskrif ásamt áhuga-verkfræðimennsku til hliðar við ljósmyndunina.

Sjá einnig heimasíður Huga og Júlíu: hugihlynsson.com og juliarunolfs.com

Nánari upplýsingar veitir Hugi í síma 6633026 og í tölvupósti: [e-mail] og Júlía í síma 8694456.

Café Karólína er opin frá kl. 17 og fram eftir nóttu alla daga nema laugardaga þá er opið frá kl. 15.

Salur Myndlistarfélagsins Gallery BOX laus til umsóknar

Sýningarnefnd Myndlistarfélagsins óskar eftir umsóknum um myndlistasýningar í Sal Myndlistarfélagsins Gallery BOX fyrir tímabilið mars 2011 - janúar 2012. Áhugasamir fylli út umsóknareyðublað og sendi til Myndlistarfélagsins ásamt ferilskrá, myndum af verkum og greinargóðri lýsingu á fyrirhugaðri sýningu.

Umsóknir sendist til:

Myndlistarfélagið
Pósthólf  235
600 Akureyri
Eða í netfangið: [e-mail]

f.h. Sýningarnefndar Myndlistarfélagsins

Með bestu kveðju
Dagrún Matthíasdóttir

Aðventa í Freyjulundi

Fyrr á öldum voru íslensk börn hrædd með sögum um Jólaköttinn og var þá talað um "að fara í Jólaköttinn". 
Sú skelfilega skepna át öll þau börn (og jafnvel fullorðna) sem ekki fengu nýja flík fyrir jólin, eða tók í það minnsta jólarefinn þeirra eins og segir í Þjóðsögum Jóns Árnasonar. Jólarefurinn var það sem hver heimilismaður fékk úthlutað fyrir jólin, klæði og kjöt, og hugsanlegt var að kötturinn léti sér það nægja. Í harðindum og matarskorti kepptust því allir við að vinna sem mest og best til að húsbóndanum þóknaðist að gefa þeim einhverja leppa og bjarga þeim þannig úr gráðugum klóm Jólakattarins.



Jólakötturinn sem við þekkjum í dag á rætur sínar að rekja til þess tíma þegar kristnar þjóðir á meginlandi Evrópu trúðu ákaft á heilagan Nikulás, ekki síst Íslendingar. Hann var verndari barna og þann 6. desember ár hvert var einhver klæddur upp í líki hans og látinn dreifa gjöfum eins og arftaki hans jólasveinninn gerir í dag. Samkvæmt sögunum ferðaðist heilagur Nikulás um með púka í bandi sem skemmti fólki með kúnstum og uppátækjum. Sá hlekkjaði púki var eflaust tákn um vald kirkjunnar yfir hinu illa og tók á sig margar myndir, þar á meðal geithafur sem þekkist annars staðar á norðurlöndunum og svartur köttur í Hollandi og Þýskalandi. Margt bendir til að Jólaköttur okkar Íslendinga sé af sama stofni. Eftir siðaskiptin blönduðust og breyttust jólasiðir og heilagur Nikulás var aðskilinn frá púkanum, en báðir lifa góðu lífi enn í dag undir nýjum nöfnum.



(Guðmundur Ólafsson, í árbók Hins íslenska fornleifafélags, árið 1989)


Rósa Sigrún Jónsdóttir sýnir í Populus Tremula

 

Hvað er að konunni?

 

Laugardaginn 27. nóvember kl. 14:00 opnar Rósa Sigrún Jónsdóttir myndlistarsýningu í Populus Tremula. Rósa vinnur í ýmsa miðla en textíllinn er henni nærtækur og svo er einnig að þessu sinni.

Hvað vitum við í rauninni um fólk? Við drögum ýmsar ályktanir, meðal annars af samhenginu, en ef við raunverulega horfum á manneskjuna þá kemur efinn . . . er þessi kona sofandi eða er hún kannski dáin?

Rósa Sigrún hefur dvalið í Gestastofu Gilfélagsins nú í nóvember.

Sýningin er einnig opin sunnudaginn 28. nóvember. kl 14:00-17:00. Aðeins þessi eina helgi.

Rósa Sigrún Jónsdóttir er frá Fremstafelli í Suður Þingeyjarsýslu. Hún er kennari að mennt en söðlaði um og og útskrifaðist frá Listaháskóla Íslands árið 2001. Síðan þá hefur hún tekið þátt í margvíslegum listverkefnum innan lands sem utan. Árin 2005-2007 var hún formaður Myndhöggvarafélagsins í Reykjavík.
Rósa Sigrún vinnur í mismunandi miðla, allt eftir viðfangsefnum en þó má segja að meðferð textílefna og rýmisvinna sé henni nærtækust.

Heimasíða Rósu Sigrúnar er www.lysandi.is

Haustþing AkureyrarAkademíunnar: Menningin og monníngurinn

Haustþing AkureyrarAkademíunnar verður haldið að þessu sinni laugardaginn 27. nóvember 2010, kl. 14:00 til 17:00. Yfirskrift þess er MENNINGIN OG MONNÍNGURINN og verður rætt um hagrænt og samfélagslegt gildi menningarstarfs.

Kolbrún Halldórsdóttir, forseti Bandalags íslenskra listamanna flytur framsögu og auk hennar eru Sólveig Hulsdunk Georgsdóttir, mannfræðingur, Aðalheiður S. Eysteinsdóttir, myndlistarkona og Vilhjálmur Hjálmarsson, meistaranemi í menningarstjórnun með styttri erindi. Þau taka svo þátt í pallborðsumræðum með þátttöku gesta. Þóra Pétursdóttir, formaður AkureyrarAkademíunnar stýrir málþinginu. Nemendur af myndlistardeild Myndlistarskólans á Akureyri hafa sett upp sýningu á fjölbreyttum verkum í AkureyrarAkademíunni og munu vera með nokkra gjörninga í hléi á málþinginu og einnig verður boðið uppá sushi frá RUB23 og Kalda frá Bruggsmiðjunni.

Þetta er í fjórða árið sem AkureyrarAkademían sem er til húsa í Gamla Húsmæðraskólanum við Þórunnarstræti 99 á Akureyri stendur fyrir haustþingi en einnig eru reglulega fyrirlestar á vegum Akademíunnar.
Allir eru velkomnir og aðgangur er ókeypis.

Nánar á www.akureyrarakademian.is

Nánari upplýsingar veita Hlynur Hallsson umsjónarmaður haustþingsins í síma 6594744 og Þóra Pétursdóttir, formaður AkureyrarAkademíunnar í síma 6980902.


Dagskrá haustþingsins er hér:



Haustþing AkureyrarAkademíunnar   
 
mmm... Akureyri - menning, matur og myndlist

MENNINGIN OG MONNÍNGURINN

Haldið í AkureyrarAkademíunni, Þórunnarstræti 99
laugardaginn 27. nóvember 2010 kl.14:00 – 17:00

14:00     Opnun sýningar myndlistarnema og örstutt ávarp
    - Hlynur Hallsson, myndlistarmaður

14:10    Setning fundarstjóra   
    - Þóra Pétursdóttir, formaður AkureyrarAkademíunnar

14:20    Hagrænt gildi menningar
    - Kolbrún Halldórsdóttir, forseti Bandalags íslenskra listamanna

14:50    Hlé - Gjörningar - Veitingar
    - Nemendur Myndlistarskólans á Akureyri 
 
15:15      Menningararfur og erfingjar hans
    - Sólveig Hulsdunk Georgsdóttir, mannfræðingur

15:30    Til hvers? - hugleiðing um lífið og listina
    - Aðalheiður S. Eysteinsdóttir, myndlistarkona
 
15:45    Mál & menning – hvernig er hægt að mæla hagræn og samfélagsleg áhrif menningarstarfs?
    - Vilhjálmur Hjálmarsson, meistaranemi í menningarstjórnun

16:00    Pallborð með þátttöku fyrirlesara og fyrirspurnir úr sal

16:50    Lokaorð

Listasjóður Dungal auglýsir eftir umsóknum um styrki

Hægt er að nálgast umsóknareyðublað hér.

Myndlistasýning á Vinnustofunni í Kaupangi

 

Opnun á myndlistasýningu á Vinnustofunni í Kaupangi, á Akureyri, laugardaginn 20. nóv. kl. 14
Sýningin stendur yfir dagana 20.-21. og 27.-28. nóvember frá kl. 14-17.
Listakonurnar sem sýna eru Gulla, Ásta Bára, Telma Brim og Borghildur Guðmunds.

Jóhann Sigurjónsson trérennismiður með fyrirlestur í Ketilhúsinu

Jóhann Sigurjónsson trérennismiður og fyrrverandi menntaskólakennari verður með fyrirlestur í Ketilhúsinu í Listagili á Akureyri föstudaginn 19. nóvember kl. 14:50 sem ber heitið Trérennismíði handverk eða list? Þar fjallar hann um þróun rennismíði undanfarin 30 ár í tengslum við sýningu sem hann er að opna í Ketilhúsinu.

Fyrirlesturinn er hluti af röð fyrirlestra sem sem hafa til margra ára verið skipulagðir af listnámsbraut Verkmenntaskólans á Akureyri í samvinnu við Listasafnið á Akureyri og Menningarmiðstöðina í Listagili.

Aðgangur ókeypis og allir velkomnir


Nánari upplýsingar gefur Björg Eiríksdóttir s.691 6681

Málþing Myndlistarfélagsins: ERU SKÓLARNIR SKAPANDI?

ERU SKÓLARNIR SKAPANDI?

Málþing Myndlistarfélagsins verður haldið á RUB í Kaupvangstræti á Akureyri, laugardaginn 20. nóvember kl.14:00-17:00.

Framsögumenn verða Kristinn G Jóhannsson, Kristín Dýrfjörð, Ragnheiður Þórsdóttir, Guðmundur Ármann Sigurjónsson og Þorvaldur Þorsteinsson einnig mun Ivar Hollanders tala um upplifun sína af skólakerfinu.  Fundarstjóri verður Ingibjörg Auðunsdóttir.


Stjórn Myndlistarfélagsins telur þetta þarfa umræðu að öll skólastigin mætist og velti fyrir sér tilgangi myndlistarkennslu og hvernig henni er háttað í dag.

Málþingið verður  á Alþjóðadegi barna og mun Myndlistarfélagið  jafnframt standa fyrir sýningu á verkum barna í Sal Myndlistarfélagsins.

Vinsamlegast skráið þátttöku á netfang: [e-mail] fyrir 15. nóv.
Allir velkomnir!

Kristján Eldjárn opnar sýningu í Jónas Viðar Gallery

OPNUN

Laugardaginn 20. nóvember kl. 15.00 opnar
Kristján Eldjárn málverkasýningu í
Jónas Viðar Gallery listagilinu á Akureyri

þér og þínum er boðið


______________________________________________

Jónas Viðar
sími: 8665021
Heimasíða: http://www.jvs.is
Jónas Viðar Gallery: http://www.jvs.is/jvgallery.htm

Rögnvaldur Bragi sýnir í Populus Tremula

Laugardaginn 13. nóvember kl. 14:00 opnar Rögnvaldur Bragi Rögnvaldsson (alias Rögnvaldur gáfaði ) myndlistalistasýningu í Populus Tremula.

Rögnvaldur, sem er landsþekktur tónlistarmaður, sýnir hér á sér splunkunýja hlið sem málari með akrýl á striga.

Sýningin er einnig opin sunnudaginn 14.11. kl 14:00-17:00. Aðeins þessi eina helgi.

Kjartan Sigtryggsson opnar sýningu í Gallerí +

Kjartan Sigtryggsson opnar myndlistarsýninguna Tilraunir í Gallerí +,
Brekkugötu 35 á Akureyri, laugardaginn 13. nóvember kl. 14.00. Kjartan sýnir
veggverk og teikningar. Allir eru velkomnir.
Sýningin stendur til 27. nóvember og er opin laugar- og sunnudaga frá kl.
14-17 og eftir samkomulagi við galleríhaldarana í síma 462 7818.

Um sýninguna segir Kjartan:
Ég útskrifaðist úr Listaháskóla Íslands 2006 en þar áður var ég í
fornámsdeild myndlistarskólans á Akureyri 1999 til 2000.
Ég hef einbeitt mér að teikningum og einstaka sinnum málverki. Ég blanda
oft saman myndlist og hönnun eða "illustration" sem tengist oftar en ekki
verkum mínum.

http://www.behance.net/kjartansigtryggsson

Hrefna Harðardóttir sýnir Grýlukerti hjá Handverk og hönnun

 

Opnuð verður sýningin GRÝLUKERTI, Á skörinni, föstudaginn 12. nóvember kl. 16-18.

Á sýningunni má sjá margnota leirverk, innblásin af grýlukertum. 

Grýla og grýlukerti eru forvitnileg hugtök sem hafa ýmsar merkingar í hugum bæði barna og fullorðinna. 

Hrefna skoðar þær merkingar sem og notagildi hlutarins og hefur handgert leirverk útfrá þeim pælingum.

Hrefna Harðardóttir stundaði nám á myndlistarbraut MA og útskrifaðist frá Leirlistardeild MHÍ eftir nám árin 1992-1995. Hún hefur sótt mörg námskeið í grafík, ljósmyndun og leirlist í Frakklandi, Ítalíu, Ungverjaland, Danmörku og Englandi og haldið einkasýningar og tekið þátt í mörgum samsýningum víða um land og erlendis. Hún er félagi í Sambandi Íslenskra Myndlistarmanna, Myndlistarfélaginu og Leirlistarfélagi Íslands og starfar á eigin verkstæði í Listagilinu á Akureyri.

Hrefna H: sími 862-5640 og tölvupóstur [e-mail]. 

Á Skörinni, er á efri hæð í Fógetahúsinu/Kraum Aðalstræti 10, í miðbæ Reykjavíkur. 

Sýningin stendur til 1. desember 2010. 

Opnunartími er alla virka daga frá kl. 9-18 og um helgar frá kl. 12-17.

Upplýsingar í síma 551 7595, í tölvupósti : [e-mail]

Guðrún Hadda Bjarnadóttir opnar sýningu á Café Karólínu

Guðrún H. Bjarnadóttir

Snagar línur á vegg

06.11.10 - 03.12.10

Café Karólína // Kaupvangsstræti 23 // IS 600 Akureyri // 4612755

Guðrún Hadda Bjarnadóttir opnar sýninguna “Snagar línur á vegg” á Café Karólínu laugardaginn 6. nóvember kl. 15:00. Sýningin stendur til 3. desember og eru allir velkomnir.
Guðrún Hadda nam vefnað við KomVox í Svíþjóð 1981-83 og við Eskilstuna folkshöskola 1986-87. Hún stundaði nám í málunardeild Myndlistarskólans á Akureyri 1987-91 og í kennaradeild Listaháskóla Íslands 2006-07.
Hún hefur rekið ásamt öðrum vinnustofur og gallerí og tekið þátt í fjölda samsýninga og einkasýninga í gegn um árin. Hún segir um sýninguna á Karólínu: 
"Herðatré breytast í snaga sem mynda línur á vegg. Línuteikning, handverk, nytjalist, list eða endurnýting? Gestir hanga á veitingahúsi eftir að hafa hengt yfirhöf á snaga."

Nánari upplýsingar veitir Guðrún Hadda í síma 899-8770 og í tölvupósti: [e-mail]

Café Karólína er opin frá kl. 17 og fram eftir nóttu alla daga nema laugardaga þá er opið frá kl. 15.

Næsta sýning á Café Karólínu:           

04.12.10 - 07.01.11        Hugi Hlynsson og Júlía Runólfsdóttir