Teikningar eftir Arne Bellstorf á Bókasafni Háskólans á Akureyri

Baby‘s in Black
Arne Bellstorf
Bókasafn Háskólans á Akureyri

Mánudaginn 16. apríl opnaði sýning á Bókasafni Háskólans á Akureyri á teikningum úr myndasögunni Baby‘s in Black eftir þýska myndasöguhöfundinn Arne Bellstorf.
Sýningin samanstendur af myndum úr fyrsta kafla bókarinnar. Sagan, sem er ævisöguleg, gerist í Hamborg við upphaf sjöunda áratugarins. Hún fjallar um kynni þýska ljósmyndarans Astrid Kirchherr og „fimmta Bítilsins“ Stuarts Sutcliffe. Verkið lýsir sambandi þeirra jafnframt því að draga upp mynd af lífi ungmenna í Hamborg á þessum tíma. Sagan segir frá trúlofun þeirra og sambúð allt til sviplegs dauða Sutcliffes í apríl 1962. Nafn bókarinnar er dregið af lagi sem John Lennon og Paul MacCartney sömdu, að því er segir, um Astrid í kjölfar dauða Stuarts.
Bókin byggir á samtölum Bellstorfs við Astrid Kirchherr, sem býr enn í Hamborg.
Arne Bellstorf, fæddur 1979, er myndasöguhöfundur, grafískur hönnuður og rithöfundur. Myndirnar á sýningunni  eru á þýsku en ensk þýðing kom út 2010.
Sýningin er samstarfsverkefni Borgarbókasafnsins í Reykjavík og Goethe-Institut í Kaupmannahöfn.
Sýningin stendur til 18. maí og er opin mánudaga og miðvikudaga frá kl. 8.00 – 16.00 og þriðjudaga og fimmtudaga frá kl. 8.00 – 18.00.

Bókasafn Háskólans á Akureyri
v/Norðurslóð
600 Akureyri
sími 460 8060 / 460 8050
fax [phone]
e-mail [e-mail]

Guðrún Pálína sýnir í Populus Tremula

Sýningin Móðurást opnar í Populus Tremula laugardaginn 21. apríl kl. 14-17. Opið er á sama tíma á sunnudeginum 22. aprí­l.

Móðurástin (þörfin fyrir að vernda og næra afkvæmi sín þar til þau verða sjálfbjarga) og kynhvötin (að fjölga sér og viðhalda kynstofninum) ásamt því að afla sér fæðu eru sterkustu hvatir manns og dýra. Jörðin oft nefnd “Móðir jörð”er sameiginlegur bústaður okkar. Hvernig við umgöngumst hana hefur ekki bara áhrif á okkur sjálf heldur komandi kynslóðir og allt vistkerfið.
Titill sýningarinnar “Móðurást” er tvíþættur, annars vegar vísar hann til umönnunar afkvæmanna og hins vegar til sömu kennda sem mannkynið ætti að hafa til jarðarinnar.
Guðrún Pálína skoðar hér formæður/feður sína í móðurmóðurlegg  til og með 8. kynslóðar. Vill hún með því varpa ljósi á góða umgengni þeirra við umhverfið og afkvæmin og hvernig maður fram af manni þarf að gera hvoru tveggja til að viðhalda lífinu. Í dag lifum við í samfélagi ofgnóttar og alsnægta á þann hátt sem formæður/feður okkar gátu ekki látið sig dreyma um. Sem dæmi um stöðu nútíma konunnar andstætt horfnum kynslóðum formæðra bendir Guðrún Pálína á að hún hafi um ævina átt fleiri kjóla og pils en allar þær formæður samanlagt sem myndgerðar eru á sýningunni. Er það einn af mörgum þáttum sem táknrænn er fyrir þá breytingu sem orðið hefur á lífsháttunum síðustu áratungina.
Í dag búum við og lifum í meiri alsnægtum en kynslóðir þeirra sem myndgerðir eru á sýningunni gátu látið sig dreyma um.

Sýningin samanstendur af bókverki og seríu akrylmynda á pappír. Þar eru dregnar upp myndskissur sem minna á grímur af fornum kynslóðum Guðrúnar Pálínu til og með 8. ættliðar frá móðurömmu hennar. Hver einstaklingur er myndgerður eftir tilfinningu listakonunnar en ekki út frá ljósmyndum eða mannlýsingum.


Guðrún Pálína er fædd og búsett á Akureyri.
Hún nam myndlist í Svíþjóð (KV-listaskólinn í Gautaborg) og í Hollandi (AKI í Enschede og Jan van Eyck akademían í Maastricht).

Útskriftarnemar VMA sýna í Verksmiðjunni á Hjalteyri

Föstudaginn 20. apríl munu nemendur á Listnámsbraut Verkmenntaskólanns à Akureyri opna sýninguna "Áfangi" í Verksmiðjunni á Hjalteyri þar sem þau munu sýna lokaverkefni sín.

Sýningin opnar kl. 20:00 á föstudag og verður hún opin aðeins þessa einu helgi, laugardag og sunnudag (21/22)  milli 14:00 - 17:00.

Þetta er 1. samsýning 17 manna hóps á Myndlistarkjörsviði og Textílkjörsviði.

Frekari upplýsingar veitir Aldís Dagmar Erlingsdóttir, [e-mail] sími: 7751554

Jónborg Stórborg í Mjólkurbúðinni, Listagili

Jónborg (Jonna) Sigurðardóttir opnar málverkasýninguna Jónborg Stórborg í Mjólkurbúðinni Listagili laugardaginn 21.apríl kl.15.
 
Á sýningunni Jónborg Stórborg sýnir Jónborg akrylmálverk og er viðfangsefnið fjallið Súlur. Fjallið Súlur gnæfir yfir Akureyri og setur tignarlegan svip á landslagið þar.
 
Jónborg (Jonna) er fædd 1966 og útskrifaðist úr málunardeild Myndlistarskólans á Akureyri vorið 1995 og lærði fatahönnun í Danmörku og útskrifaðist þaðan um vetur 2011. Jonna hefur tekið þátt í fjölda samsýninga og haldið nokkrar einkasýningar. Jonna hefur unnið með margvísleg efni í listsköpun sinni og að þessu sinni málar Jónborg með akrýl á striga.
 
Sýningin Jónborg Stórborg stendur til 29.apríl og eru allir velkomnir.
Mjólkurbúðin er opin laugardaga og sunnudaga kl.15-18 meðan sýningin Jónborg Stórborg prýðir salinn.
 
Jónborg Sigurðardóttir [e-mail]
Mjólkurbúðin [e-mail]
Mjólkurbúðin er á facebook - Vertu vinur

Arna Valsdóttir sýnir í Gerðubergi

Arna Valsdóttir sýnir í Gerðubergi - verið velkomin á opnun sýningarinnar laugardaginn 14. apríl kl. 14.


Margrét Baldursdóttir
Verkefnastjóri
Menningarmiðstöðin Gerðuberg
Gerðubergi 3-5
111 Reykjavík
www.gerduberg.is
Sími: 575 7717

HÖFUÐVERK í Gallerí Boxi

Samsýningarhópurinn HÖFUÐVERK opnar sýninguna “Til minnis” í Gallerí Boxi listagili, laugardaginn 14 apríl kl 15.

â€¨â€¨Í áreiti og hraða nútímans er gott að staldrað við og hugleiða hvað skiptir mann máli, ylja sér við minningar, ilm blóma, lífið, arf forfeðra, barnið í sjálfum sér og hvað við höfum það í raun og veru gott á margan hátt, þó stutt sé í deilur, dægurþras, fordóma og fáfengileika þeirra.


Sýningin samanstendur af verkum sjö myndlistarmanna sem eru hluti hópsins „Höfuðverk“ þeir sem sýna að þessu sinni eru: Áslaug Anna Jónsdóttir, Ásta Bára Pétursdóttir,
Eygló Antonsdóttir, Hrafnhildur Ýr Vilbertsdóttir (Krumma),
Margét Buhl, Telma Brimdís Þorleifsdóttir og
Gulla Sigurðardóttir
Höfuðverk er  hópur samnemenda úr Myndlistaskóla Akureyrar, allar hafa þær haldið einkasýningar en þetta er í Þriðja sinn sem hópurinn sýnir saman.
Þema sýningarinnar er um hluti eða minningar sem skiptir hverja og eina máli og nálgast myndlistarkonurnar viðfangsefnið hver á sinn hátt.

Birgir Sigurðsson sýnir í Pop­ulus Tremula

JÖRÐ ÁN HREYFINGAR
BIRGIR SIGURÐSSON
MYNDLISTARSÝNING

Laugardaginn 7. apríl kl. 14.00 mun Birgir Sigurðsson opna myndlistarsýninguna Jörð án hreyfingar í Pop­ulus Tremula.

Sýnir Birgir þar ljósinnsetningu þar sem unnið er með þá gömlu staðhæfingu að jörin sé flöt.

Opið út páskahelgina kl. 14.00-17.00. Aðeins þessi eina helgi.

Rut Ingólfsdóttir opnar sýningu í Mjólkurbúðinni

Rut Ingólfsdóttir opnar sýninguna GÚBBAR í Mjólkurbúðinni Listagili á skírdag, fimmtudaginn  5.apríl kl.17 og eru allir velkomnir.

"Þetta er í fyrsta skipti sem Gúbbarnir koma til Akureyrar og þeir eru yfir sig spenntir að hitta norðlendinga "segir í tilkynningu. Rut Ingólfsdóttir leirlistakona skapar Gúbbana en Rut stundaði nám í Aarhus Kunstakademi á árunum 2004-2008 og hefur haldið bæði einka- og samsýningar víðsvegar, bæði hér heima og erlendis. 

 

Rut Ingólfsdóttir um Gúbbana:

 

Gúbbarnir eru gifsskúlptúrar búnir til úr allskyns efnivið eins og t.d trjágreinum, blöðrum, vírum, grjóti og gifsi. Gúbbarnir urðu til við Meðalfellsvatn í Kjós, fyrir mistök, ætlunin var að fara upp í bústað og búa til fugla, sem urðu svo ljótir greyin að ætlunin var að henda þeim, byrjaði að rífa þá í sundur en ákvað að taka pásu til að fá mér kaffi og klára svo málið. En þegar út var komið stóð fyrsti gúbbinn þar og bauð góðan daginn. Ég vil því meina að þeir hafi skapað sig sjálfir. Síðan þá hefur gúbbaættin stækkað og sýnt sig og séð aðra t.d í Keflavík, Reykjavík og á Ísafirði, og nú eru þeir mikið spenntir að komast norður, allir á fullu að þrífa og strauja sokkna sína...
það sem gerir þá svo einstaka er að hver og einn hefur sinn karakter, sumir feimnir, aðrir kokhraustir, sumir einbeittir, aðrir sveimhuga, hver og einn með sína sögu en allir vilja þeir veita og varðveita gleði, sem er þeirra tilgangur að eigin sögn...

Sýningin stendur aðeins yfir páskahelgina og er opið:
Skírdag, fimmtudag 5.apríl kl.17-20

Föstudaginn langa 6.apríl opið 14-20
laugardaginn 7.apríl opið 14-20
Páskadag, sunnudagur 8.apríl opið 12-15

 

Rut Ingólfsdóttir s.8461874 [e-mail]

 

ALLIR VELKOMNIR

Mjólkurbúðin Listagilinu á Akureyri

Dagrún s.8957173 [e-mail]

Petra Korte opnar sýningu í Pop­ulus Tremula

 

Laugardaginn 31. mars kl. 14.00 mun þýska listakonan Petra Korte opna myndlistarsýninguna Ice Books í Pop­ulus Tremula.

Korte, sem dvelur um þessar mundir í Gestavinnustofu Gilfél­agsins, á fjölda sýninga að baki. Innblástur í verkin sem hún sýnir nú sækir hún m.a. til Íslendinga­sagna, íslenskrar náttúru og sagna um álfa og huldufólk.

Sýningin verður opin daglega til og með miðvikudeginum 4. apríl kl. 14.00-17.00. 

Sýningin 30 dagar, framlengd

ÁLFkonur opnuðu um síðustu helgi,
ljósmyndasýninguna 30 DAGAR á Langa-Gangi í Listagilinu á Akureyri.
Vegna fjölda áskorana og mikillar aðsóknar hefur verið ákveðið að  
framlengja og hafa opið um næstu helgi:
laugardag 31. mars og sunnudag 1. apríl milli kl. 13 - 17. Allir  
velkomnir.

Sýningin er á veggjum á LANGA-GANGI sem er á annarri hæð í  
Kaupvangsstræti 10,
(gengið inn sama inngang og í Populus Tremula og Sal  
Myndlistarfélagsins-Boxið).


ÁLFkonur er félagskapur kvenna (ÁhugaLjósmyndaraFélag fyrir konur á  
Eyjafjarðarsvæðinu) sem hafa ljósmyndun að áhugamáli og er þessi  
sýning afrakstur þátttöku í 30 daga áskorun sem fólst í því að taka  
eina mynd á dag í einn mánuð. Þemað var fyrirfram ákveðið og hérmeð  
birtist útkoman.

Þetta er fimmta samsýning hópsins en þátttakendur að þessu sinni eru;
Agnes H. Skúladóttir, Berglind H. Helgadóttir, Ester Guðbjörnsdóttir,  
Díana Bryndís, Gunnlaug Friðriksdóttir, Halla S. Gunnlaugsdóttir,  
Helga H. Gunnlaugsdóttir, Hrefna Harðardóttir, Lilja Guðmundsdóttir,  
Linda Ólafsdóttir og Margrét Elfa Jónsdóttir.

 

Guðrún Pálína með listamannsspjall í Flóru

Fimmtudagskvöldið 29. mars kl. 20-21 verður Guðrún Pálína Guðmundsdóttir með listamannsspjall í Flóru og allir eru velkomnir.

Sýning Guðrúnar Pálínu í Flóru byggir á hugmyndum tengdum hlutverki og stöðu  föðursins. Vonast er til að hún varpi fram spurningum til áhorfandans og vangaveltum. Sýningin byggir á ættfræðirannsóknum en þær eru ein leið til að skilja erfðafræðilega stöðu einstaklingsins. Á sýningunni notar Guðrún Pálína ættfræði föður síns í karllegg og býr til sjónræna framsetningu andlita. Ættirnar rekur hún til og með 8. liðar. Andlitin minna á grímur sem forfeðurnir/mæðurnar  skýla sér á bakvið. Þau minna jafnvel á grímur frumstæðra ættbálka. Andlitin koma fram í svartnættinu og skapa nánast þrívíddaráhrif eða einhverskonar sjónhverfingu. Það má segja að þau séu eins og skuggar fortíðarinnar. Einhverjar óljósar hugmyndir um hvernig menn hefðu getað birst eða litið út. Andarnir minna á sig, þeir lifa áfram í okkur gegnum erfðafræðina, ekki bara efnið heldur líka andinn og hugsunin. Er efnishyggja okkar í dag hugsanlega afleiðing langvarinnar vosbúðar, kulda og fátæktar forfeðranna? Getur hluti af okkar þrá eftir efnislegu öryggi, frelsi til menntunnar og vali á búsetu verið gamlir draumar forfeðranna?  Sýningin á ekki endilega að svara neinum spurningum, frekar að vekja þær.

Nánar um sýninguna á http://mynd.blog.is/blog/mynd/entry/1230155

Nánari upplýsingar er hægt að fá á heimasíðunni: www.palinagudmundsdottir.blog.is

Sýning Guðrúnar Pálínu í Flóru stendur til laugardagsins 14. apríl 2012.

Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Listrænn ráðunautur staðarins er Hlynur Hallsson, myndlistarmaður. Áður hafa Arna Vals, Þórarinn Blöndal, Snorri Ásmundsson og Guðrún Þórsdóttir sett upp sýningar í Flóru.

 

Guðrún Pálína Guðmundsdóttir
Faðirinn
24. mars - 14. apríl 2012
Flóra, Listagilinu á Akureyri, Kaupvangsstræti 23, 600 Akureyri, s. 6610168
http://floraflora.is
https://www.facebook.com/flora.akureyri

Njörður P. Njarðvík með erindi í Ketilhúsinu

Njörður P. Njarðvík heldur erindi í Sjónlistamiðstöðinni (Ketilhúsi) í Listagili á Akureyri föstudaginn 23. mars.

Erindi sitt kallar Njörður Hvað er ljóð? og ætlar hann að lýsa hvernig ljóð aðgreinir sig frá annarri tjáningu tungumálsins.

Njörður P. Njarðvík er prófessor emeritus í íslenskum bókmenntum og ritlist við Háskóla Íslands og er rithöfundur og ljóðskáld.
Erindið hefst kl 15.00 og er opið öllum áhugasömum og er aðgangur ókeypis.

Þessi viðburður er skipulagður af kennurum á listnámsbraut VMA í samvinnu við Sjónlistamiðstöðina.

Helga Sigríður sýnir í Pop­ulus Tremula

Laugardaginn 24. mars kl. 14.00 mun Helga Sigríður Valdimarsdóttir opna málverka­sýningu í Pop­ulus Tremula.

Helga Sigríður notar Áttablaðarósina sem grunn í málverkin á sýningunni. Áttablaðarósin hefur lengi verið algeng í íslenskum hannyrðum. Hún byggir á fornu mynstri sem minnir um margt á frostrósir. Þetta forna mynstur færir Helga Sigríður í nýjan búning með því að mála það á striga í björtum litum.

Einnig opið sunnudaginn 25. mars kl. 14.00-17.00.
Aðeins þessi eina helgi.

Stefán Boulter opnar sýningu í Sal Myndlistarfélagsins

Á laugardaginn 24/3 opnar Stefán Boulter sýninguna Neptune í Sal Myndlistarfélagsins.
Stefán Boulter sýnir nýleg málverk og steinþrykk í anda ljóðræns raunsæis. Á þessari sýningu veltir Stefán fyrir sér m.a. hafinu og hlutverki vatnsins sem táknmynd í eigin lífi og listaverkum. Þar skipar innsæið, tilfinningar, minningar og draumar ríkan þátt. Stefán hefur verið virkur þáttakandi í Kitsch hreyfingunni, þetta er hópur málara víðs vegar úr heiminum sem hafa skapað nýjan heimspekilegan grundvöll fyrir listsköpun sinni.
Sýningin opnar kl 15:00 en sýningin verður annars opin um helgar milli 14:00 og 17:00
Sjá má sýnishorn af verkum Stefáns á stefanboulter.com

Kristinn E. Hrafnsson sýnir í Listasafninu á Akureyri

Laugardaginn 24. mars klukkan 15 opnar Kristinn E. Hrafnsson myndlistarmaður einkasýninguna MISVÍSUN í Listasafninu á Akureyri á vegum Sjónlistamiðstöðvarinnar.
 
MISVÍSUN er lýsandi orð fyrir það sem má kalla stöðuga óvissu eða sífellda hreyfingu allra hluta. Sem yfirskrift sýningar má túlka það sem svo að sýningin, eða verkin á henni, feli í sér ákveðnar mótsagnir og að hún sé ekki öll þar sem hún er séð. Verkin eigi sér að minnsta kosti tvær hliðar. 
 
Á sýningunni Misvísun finnur Kristinn hugmyndum sínum efnislegt form í skúlptúrum, pappírsverkum og innsetningum. Verkin eru ólík að stærð og gerð en þau fjalla öll að einhverju leiti um heiminn og viðleitni mannsins til þess að staðsetja sig í honum. Stærsta verk sýningarinnar er 100 metra langt járnrör sem skrúfað var upp í gríðarstóran gorm sem umlykur allt safnið. Sýningargestir verða þannig þátttakendur í verkinu og geta upplifað það með því að ganga í gegn um það eða horfa á það utan frá. Í minnsta verki sýningarinnar býr mikil nálægð. Verkið er samsett úr áttavita og leiðarsteini (magnetite). Með smáan steininn í hendi sér geta sýningargestir snúið áttavitanum eins og þeim sýnist og fundið þá miklu krafta sem eru allt í kring um okkur. Sýningin er þannig ákveðin myndlíking fyrir lífið sjálft þar sem sýningargestir leitast við að staðsetja sig, skoða, njóta, taka afstöðu og jafnvel skapa eigin misvísun.
 
Kristinn er fæddur á Ólafsfirði árið 1960 og stundaði myndlistarnám við Myndlistaskólann á Akureyri 1982–1983. Hann útskrifaðist úr Myndlista– og handíðaskóla Íslands árið 1986 og stundaði framhaldsnám í Akademie der Bildenden Künste í München í Þýskalandi á árunum 1986–1990. Kristinn hefur haldið 17 einkasýningar og tekið þátt í um 50 samsýningum heima og erlendis. Hann á verk í öllum helstu listasöfnum á Íslandi og einkasöfnum á Íslandi og erlendis. Hann á einnig verk í fjölda opinberra stofnana og í almenningsrými víða um land.

Sýningin stendur yfir frá 24. mars – 13. maí og er opin miðvikudaga til sunnudaga frá kl. 13-17.

Guðrún Pálína opnar sýningu í Flóru

Guðrún Pálína Guðmundsdóttir
Faðirinn
24. mars - 14. apríl 2012
Flóra, Listagilinu á Akureyri, Kaupvangsstræti 23, 600 Akureyri, s. 6610168

http://floraflora.is
https://www.facebook.com/flora.akureyri

Laugardaginn 24. mars kl. 14 opnar Guðrún Pálína myndlistarsýningu sem hún nefnir Faðirinn í Flóru í Listagilinu á Akureyri.

Sýning Guðrúnar Pálínu í Flóru byggir á hugmyndum tengdum hlutverki og stöðu  föðursins. Vonast er til að hún varpi fram spurningum til áhorfandans og vangaveltum. Sýningin byggir á ættfræðirannsóknum en þær eru ein leið til að skilja erfðafræðilega stöðu einstaklingsins. Á sýningunni notar Guðrún Pálína ættfræði föður síns í karllegg og býr til sjónræna framsetningu andlita. Ættirnar rekur hún til og með 8. liðar. Andlitin minna á grímur sem forfeðurnir/mæðurnar  skýla sér á bakvið. Þau minna jafnvel á grímur frumstæðra ættbálka. Andlitin koma fram í svartnættinu og skapa nánast þrívíddaráhrif eða einhverskonar sjónhverfingu. Það má segja að þau séu eins og skuggar fortíðarinnar. Einhverjar óljósar hugmyndir um hvernig menn hefðu getað birst eða litið út. Andarnir minna á sig, þeir lifa áfram í okkur gegnum erfðafræðina, ekki bara efnið heldur líka andinn og hugsunin. Er efnishyggja okkar í dag hugsanlega afleiðing langvarinnar vosbúðar, kulda og fátæktar forfeðranna? Getur hluti af okkar þrá eftir efnislegu öryggi, frelsi til menntunnar og vali á búsetu verið gamlir draumar forfeðranna?  Sýningin á ekki endilega að svara neinum spurningum, frekar að vekja þær. Bakvið hvert andlit er einn ákveðinn forfaðir/móðir Guðrúnar Pálínu en fyrir áhorfandann er jafnvel áhugaverðara að sleppa hennar  sögu en hugsa sér eign ættfræði og velta því fyrir sér hver hún er. Nema menn finni sína eigin forfeður þarna, þá horfir málið öðruvísi við. Er það von Guðrúnar Pálínu að áhorfandinn geti aukið eigin vitund um mikilvægi þess að þekkja sögu forfeðra sinna og þá samfélagsins í heild ásamt menningu þess.

Guðrún Pálína nam myndlist við AKI í Enchede og við Jan van Eyck Akademie í Maastricht í Hollandi. Hún hefur haldið fjölmargar sýningar og tekið þátt í sýningum. Hún hefur rekið ásamt eiginmanni sínum Joris Rademaker listagalleríð Gallerí+ í Brekkugötu 35, á Akureyri síðan 1996.  www.galleriplus.blog.is
Guðrún Pálína stjórnaði Listasumri á Akureyri árin 2000 og 2001 og skipulagði þá fjölda einka- og samsýninga listamanna. Hún skipulagði samsýninguna “Allt um gyðjuna” að Skeið í Svarfaðadal 2006 og Freyjumyndir samsýning 23 myndlistarmanna víðsvegar um Akureyri  2009. www.freyjumyndir.blog.is
Í samvinnu við garðyrkjufræðing Akureyrar skipulagði hún sýningu og viðburð undir heitinu “Uppskeruhátíð ræktunar og myndlistar”. Það verkefni verður endurtekið í sumar og stækkað, sýningaropnunin verður laugardaginn 30. júní og sjálfur viðburðurinn (fyrirlestrar og smökkun grænmetisuppskerunnar) verður svo á afmælishátíð bæjarins á sunnudaginn 26. ágúst við gróðrastöðina á Krókeyri í Innbæ Akureyrar.

Nú stendur yfir sýning á verkum Guðrunar Pálínu í Bókasafni Háskólans á Akureyri og nefnist hún “Maður fram af manni”og stendur til 30. mars.

Nánari upplýsingar er hægt að fá á heimasíðunni: www.palinagudmundsdottir.blog.is og í pósti [e-mail] og [e-mail]

Fimmtudagskvöldið 29. mars kl. 20-21 verður Guðrún Pálína í listamannsspjalli í Flóru.
Sýning Guðrúnar Pálínu í Flóru stendur til laugardagsins 14. apríl 2012.

Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Listrænn ráðunautur staðarins er Hlynur Hallsson, myndlistarmaður. Áður hafa Arna Vals, Þórarinn Blöndal, Snorri Ásmundsson og Guðrún Þórsdóttir sett upp sýningar í Flóru.

Flóra, Listagilinu á Akureyri, Kaupvangsstræti 23, 600 Akureyri, s. 6610168
http://floraflora.is

Aðalheiður S. Eysteinsdóttir opnar skúlptúrsýningu á Icelandair Hótel Reykjavík Natura

Miðvikudaginn 21. mars opnar Aðalheiður S. Eysteinsdóttir skúlptúrsýningu á Icelandair Hótel Reykjavík Natura. Sýningin er sú þrítugasta og sjötta í verkefninu "Réttardagur 50 sýninga röð" sem staðið hefur yfir síðan 2008. Settar verða upp 50 sýningar víða um heim á fimm ára tímabili, sem fjalla allar á einn eða annan hátt um þá menningu sem skapast útfrá íslensku sauðkindinni.

Sýningin á Icelandair Hótel Reykjavík Natura ber yfirskriftina "Bændur í borgarferð". Að fengitíma liðnum, meðan beðið er sauðburðar, gefst bændum færi á að bregða sér í borgarferð. Vinnugallinn látinn til hliðar og betri fötin tekin fram. Stigið inn í velmetinn heim þjónustu og þæginda. Úr hugarfylgsnum læðast framtíðardraumar um sveitina sem færir þeim gjöfult líf í dagsins önn. Sýningin stendur yfir á Hönnunarmars og er opin allan sólarhringinn.

TVÆR SÝNINGAR Í ARTÍMA GALLERÍ

Þann 22. mars verða opnaðar tvær nýjar sýningar í Artíma Gallerí með gleði, Reyka vodka, bjór og plötusnúðurinn Rix / Mr. Cuellar mun spila létta tóna.

Á sýningunni EINMITT AKKÚRAT verða sýnd verk eftir myndlistarmanninn GEORG ÓSKAR GIANNAKOUDAKIS. Á sýningunni HLUTIR/OBJECTS gefur að líta fylgihluti fyrir heimilið hannaðir af IHANNA HOME/INGIBJÖRGU HÖNNU og HÖLLU KRISTJÁNSDÓTTUR og er sú sýning í tengslum við Hönnunarmars 2012.

Opnun beggja sýninganna verður haldin á fimmtudaginn 22. mars kl. 20-22.

• • 22. mars klukkan 20:00 fram til 1. apríl klukkan 03:00

 

ÁLFkonur opna ljósmyndasýningu í Listagilinu á Akureyri

 

 

ÁLFkonur opna ljósmyndasýninguna 30 DAGAR

, 

á Langa-Gangi í Listagilinu á Akureyri,

laugardaginn 24. mars

kl. 13.00 sem jafnframt er GILDAGUR í Listagilinu. 

 

 

 

Sýningin stendur aðeins í 2 daga : laugardag 24. mars kl. 13 - 18 og sunnudag 25. mars kl. 13 - 17.

Sýningin er á veggjum á LANGA-GANGI sem er á annarri hæð í Kaupvangsstræti 10, 

(gengið inn sama inngang og í Populus Tremula og Sal Myndlistarfélagsins-Boxið).

ÁLFkonur er félagskapur kvenna

(ÁhugaLjósmyndaraFélag fyrir konur á Eyjafjarðarsvæðinu) sem hafa ljósmyndun að áhugamáli

 og er þessi sýning afrakstur þátttöku í 30 daga áskorun sem fólst í því að taka eina mynd á dag í einn mánuð. Þemað var fyrirfram ákveðið og hérmeð birtist útkoman.

Þetta er fimmta samsýning hópsins en þátttakendur að þessu sinni eru; 

Agnes H. Skúladóttir, Berglind H. Helgadóttir, Ester Guðbjörnsdóttir, Díana Bryndís, Gunnlaug Friðriksdóttir, Halla S. Gunnlaugsdóttir, Helga H. Gunnlaugsdóttir, Hrefna Harðardóttir, Lilja Guðmundsdóttir, Linda Ólafsdóttir og Margrét Elfa Jónsdóttir.

Upplýsingar veita :

Agnes Heiða Skúladóttir, sími : 862-2922  [e-mail]
Berglind Helgasdóttir, sími : 863-1409  [e-mail]
Linda Ólafsdóttir, sími : 867-8000    [e-mail]
Hrefna Harðardóttir, sími : 862-5642    [e-mail]

Sýningarlok í Listasafninu og Ketilhúsinu

Nú er runnin upp síðasta vika sýninga bæði í Listasafninu og Ketilhúsi. Sýningarnar tvær eru ólíkar en á milli þeirra liggja þó margvíslegir þræðir. Á báðum sýningum er teflt saman listamönnum í yngri kantinum og vangaveltum þeirra sem eru þó alls ólíkar. Það er spennandi að fá innsýn í sköpun og hugarheim ungra listamanna og sjá gróskumikla hugmyndavinnslu og skapandi anda ráða ríkjum í sölum Sjónlistamiðstöðvarinnar.

Sýningin í Listasafninu ber nafnið Rými málverksins og það er Einar Garibaldi Eiríksson sem er sýningarstjóri. Einar hefur um árabil verið prófessor við Listaháskóla Íslands og hans hugmynd var að setja saman fjölbreyttan hóp listamanna sem sýndi víðtæka nálgun á viðfangsefnið sem var að hugsa út fyrir hið hefðbundna málverk, í efnisvali, framsetningu og myndmáli. Listamennirnir tólf eiga það sammerkt að hafa allir útskrifast frá Listaháskóla Íslands á síðustu tíu árum og það er óhætt að segja að vel hefur tekist við að ná markmiðinu um víðtæka nálgun því verkin eru ákaflega ólík og unnið er með fjölbreytileg efni og útfærslur.

Sýningin í Ketilhúsi nefnist Móbergur – Rafsteinn – Sæmunkur og er samsýning þriggja ungra myndlistarmanna sem hafa unnið saman í ýmsum verkefnum síðustu árin. Bakgrunnur þeirra er ólíkur hvað varðar myndlistarmenntun og hver fyrir sig skapa þeir sinn hugmyndaheim en eiga um leið sterkan samhljóm. Þeir sækja allir innblástur sinn til annarra heima, fornra leyndardóma og trúarbragða og útkoman er kyngimagnað andrúmsloft fortíðar, nútíðar og framtíðar.

Sjónlistamiðstöðin hvetur Akureyringa og gesti bæjarins til að missa ekki af þessu tækifæri til að opna hugann fyrir myndlist út fyrir rammann.

Nánari upplýsingar veitir
Sóley Björk, safnfulltrúi
461-2610 eða 844-1555
[e-mail]

Sjónlistamiðstöðin - Listasafn
 —————————————————————————

Kaupvangsstræti 12
600 Akureyri
Sími: [phone]
GSM: [phone]