Steinn Kristjánsson opnar sýninguna "Hugrenningar" á Café Karólínu á laugardag

Steinn Kristjánsson

Hugrenningar

02.02.08 - 29.02.08

Velkomin á opnun laugardaginn 2. febrúar 2008, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---

Laugardaginn 2. febrúar 2008, klukkan 14 opnar Steinn Kristjánsson sýninguna "Hugrenningar", á Café Karólínu á Akureyri.

Steinn Kristjánsson útskrifaðist frá fagurlistadeild Myndlistaskólans á Akureyri 2007. Hann stundar nú nám við kennaradeild Háskólans á Akureyri.  Hann segir um sýninguna á Café Karólínu:

"Umræðan í þjóðfélaginu fer fram á ólíkum stöðum. Mörgum sýnist sem hefðbundið kaffihúsaspjall sé á hröðu undanhaldi fyrir spjallrásum og bloggsíðum. Fólk er að eiga í orðaskiptum  á netinu sem það myndi ekki eiga undir fjögur augu.
Sýningin Hugrenningar er tilraun listamannsins til að færa umræðuna aftur inn á kaffihúsið undir formerkjum bloggsins. Hann setur ekki upp sýningu sem á að hanga vikum saman á staðnum. Heldur er það listamaðurinn sjálfur sem hangir á kaffihúsinu og gerir eitthvað nýtt og spennandi á hverjum degi. Í stað þess að blogga um eitthvað hengir hann upp renning, s.k. hugrenning. Á hann skrifar hann sínar hugrenningar um það sem honum liggur á hjarta hverju sinni, límir á hann teikningar, ljósmyndir og úrklippur. Öllum er heimilt að kommenta á renninginn. Í stuttu máli er þetta tilraun um mannleg samskipti. "

Nánari upplýsingar veitir Steinn í steinn52(hjá)visir.is og í síma 8490566

Sýningin á Café Karólínu stendur til 29. febrúar, 2008. Allir eru velkomnir á opnun laugardaginn 2. febrúar, klukkan 14.

Sýning Brynhildar Kristinsdóttur á Karólínu Restaurant hefur verið framlengd til 29. febrúar 2008. Þann 1. mars opnar Jón Laxdal nýja sýningu á Karólínu Restaurant.

Ásdís Arnardóttir opnar sýningu á Bókasafni Háskólans á Akureyri

Ásdís Arnardóttir opnar myndlistasýningu á Bókasafni Háskólans á Akureyri laugardaginn 2. febrúar kl. 15:00. Sýningin mun standa til 1. mars.
Ásdís nam fyrst við Myndlistaskólann á Akureyri 1995-1996, síðan í Myndlista- og handíðaskóla Íslands og lauk prófi frá málunardeild árið 1999. Auk þess hefur hún tekið ýmis námskeið í steinhöggi m.a. við Accademia di Belle Arti, Bologna og hjá Einari Má Guðvarðarsyni, myndhöggvara.
Hún hefur m.a. starfað við Menningarmiðstöðina Gerðuberg og hjá Listasafni Kópavogs, Gerðarsafni. Að undanförnu hefur hún eingöngu unnið að eigin list.
Á sýningunni á bókasafninu eru myndir málaðar með vatnslitum á hríspappír. Myndefnið sækir Ásdís í ljósmyndir frá miðjum 8. áratug síðustu aldar, sem teknar voru á Kodak Instamatic myndavél af einfaldri gerð. Í verkunum kallast á innileiki ljósmyndarinnar og sú tilfinning sem myndast við samspil pappírs og litar. Um leið segir hver mynd örsögu úr nálægri fortíð.

Bókasafn Háskólans á Akureyri er opið alla virka daga frá 8:00 – 18:00 og á laugardögum frá 12:00 – 15:00. 

Allir eru velkomnir

Bráðið vatn - Smeltevand

Sýningin Smeltevand sem er samsýning 10 norrænna listakvenna heldur áfram ferð sinni og var hún (ný og endurbætt) sett upp í sýningarsölum Menningarmiðstöðvarinnar Portalen, í Greve í Danmörku. 

Fimm íslenskar listakonur sem allar starfa að listsköpun á Akureyri eru þátttakendur: Ragnheiður Björk Þórsdóttir vefari, Hrefna Harðardóttir og Sigríður Ágústsdóttir leirlistarkonur, Anna Gunnarsdóttir textíl, Sveinbjörg Hallgrímsdóttir grafík og svo eru: Mette Strøm frá Noregi, Anette Andersen, Heidrun Sørensen, Else Marie Gert Nielsen, Inge-Lise Busacke frá Danmörku. 

 

Listsýningin er haldin í tengslum við „Alþjóðlegt heimskautaár“  sem nú stendur yfir í heiminum og reyna listakonurnar að túlka þeirra sýn á hlýnun jarðar, bráðnun jökla hækkandi sjávarstöðu m.a. í grafík, textíl- og leirverkum. Smeltevand var sett upp í Grænlandshúsinu í Kaupmannahöfn í september-nóvember s.l. og fékk bæði mjög góða blaðadóma og mikla aðsókn.  

Sýningin stendur frá 12. janúar til 24. febrúar nk. og opnunartími er:  kl. 14-17 þri-fös og kl. 13-17 lau. og kl. 11-15 sun. 

Greve er í klukkustundar lestarferð fyrir utan Kaupmannahöfn, farið út við Hundige lestarstöðina.

Sýningin í Portalen mun standa í 5 vikur en heldur þá áfram ferðalaginu og kemur til Akureyrar í júní.   Aðgangur er ókeypis.

Nánari upplýsingar : 

http://portalen.dk

skoða Gallerierne - Smeltevand

__________________________________________

Alþjóðlega heimskautaárið, International Polar Year, hófst  1. mars 2007 og lýkur í mars 2009.  Heimskautaárið stendur því í raun í tvö ár.   Þessi viðburður er hluti af sögulegri hefð, en 1/2 öld er liðin frá síðasta alþjóðlega heimskautaári.   Á heimskautaári er lögð áhersla á stór rannsóknarverkefni á öllum sviðum heimskautamála þar sem vísindamenn af ýmsum þjóðernum leggja saman krafta sína.

Fyrir áhugasama er hér tengill á heimasíðu IPY   http://www.ipy.org

Um og yfir 6.500 vísindamenn taka höndum saman frá 60 ríkjum og eru verkefnin um 200 talsins. Stóru áherslurnar eru helst á sviði loftslagsmála og veðurfarsbreytinga og þýðingu þeirra fyrir gróðurfar og dýralíf.  Eitt af því sem hvað mest verður í brennidepli á heimskautaári eru frekari rannsóknir á Grænlandsjökli og viðbrögð hans við veðurfarssveiflum.  Nú á að freista þess að leggja í afkomulíkan jökulsins, sem hlýtur að teljast vera risavaxið verkefni ekki síst þar sem lítið er um beinar mælingar á ákomu og leysingu þessa stærsta ísmassa norðurhvels.

Á fyrsta alþjóðlega heimskautaárinu 1882-1883 var megináherslan lögð á veðurathuganir og rannsóknir á norðurljósum.

Næst, eða 1932-1933 voru vísindamenn afar uppteknir af segulsviði jarðar og mælingum á hafinu.

1957-1958 gekk mikið á í margvíslegum rannsóknum jarðeðlisfræðinnar, en þá var árið reyndar kallað alþjóða jarðeðlisárið og sérstakt sjónarhorn á Suðurskautslandið. 

Einar Sveinbjörnsson Veðurfræðingur

Myndlistarfélagið stofnað

Stofnfundur Myndlistarfélagsins var haldinn í Deiglunni á Akureyri þann 26. janúar 2008. Hátt í 50 myndlistarmenn mættu á fundinn og eru stofnfélagar um 60.
Tilgangur og markmið Myndlistarfélagsins eru:

Að efla samtök myndlistarmanna og vera málsvari þeirra.
Að bæta kjör og starfsgrundvöll myndlistarmanna, gæta hagsmuna þeirra.
Að efla umræðu um myndlist og auka þekkingu og fræðslu um myndlist.
Að auka myndlist á Norðurlandi sérstaklega og koma á samstarfi við opinbera aðila á svæðinu.
Að standa fyrir sýningum á verkum félaga Myndlistarfélagsins.
Að koma á samvinnu við listamenn, erlendis sem og hér á landi.

Lög félagsins voru samþykkt og einnig ályktun um að efla beri starfslaun Akureyrarbæjar til listamanna. Umræður urðu um starfsaðstöðu myndlistarmanna og lagt til að gerð verði könnun á stöðu myndlistarmanna á svæðinu. Fjölmargar hugmyndir komu fram um starfsemi félagsins og uppbyggilegar tillögur.

Stjórn félagsins var kosin og hana skipa:
Hlynur Hallsson, formaður
Aðalheiður S. Eysteinsdóttir, varaformaður
Brynhildur Kristinsdóttir, ritari
Þórarinn Blöndal, vararitari
Gunnar Kr Jónasson, gjaldkeri
Varamenn:
Jóna Hlíf Halldórsdóttir og Jónas Viðar

LÖG MYNDLISTARFÉLAGSINS

LÖG MYNDLISTARFÉLAGSINS

samþykkt á stofnfundi 26. janúar 2008.

 
1. grein
Félagið heitir MYNDLISTARFÉLAGIÐ.


2. grein
Varnarþing er á Akureyri.


3. grein
Tilgangur og markmið Myndlistarfélagsins er:
a) að efla samtök myndlistarmanna og vera málsvari þeirra.
b) að bæta kjör og starfsgrundvöll myndlistarmanna, gæta hagsmuna þeirra.
c) að efla umræðu um myndlist og auka þekkingu og fræðslu um myndlist.
d) að auka myndlist á Norðurlandi sérstaklega og koma á samstarfi við opinbera aðila á svæðinu.
e) að standa fyrir sýningum á verkum félaga Myndlistarfélagsins.
f) að koma á samvinnu við listamenn, erlendis sem og hér á landi.


4. grein
Sameiginlegir punktar varðandi inntökuskilyrði í eftirtalin myndlistafélög:
Myndlistarfélagið, FÍM, Íslensk Grafík, Textílfélagið, Myndhöggvarafélagið, Leirlistafélagið og einstaklingsaðild að SÍM.
Félagar þurfa að hafa lokið háskólaprófi eða sambærilegri menntun í myndlist eða sýna fram á með öðrum hætti að þeir starfi að myndlist af fullri alvöru.
Að öðrum kosti þarf umsækjandi að uppfylla fjögur af neðangreindum skilyrðum.
  1. Hafa aðra menntun í myndlist (t.d. nám á framhaldsskólastigi, námskeið, einkatíma eða annað)  staðfest með yfirlýsingu viðkomandi kennara/skóla.
  2. Hafa haldið eina eða fleiri einkasýningar í viðurkenndum sýningarstöðum.
  3. Hafa tekið þátt í alþjóðlegri sýningu, samsýningu styrktri af opinberum aðilum eða ekki færri en fimm samsýningum öðrum.
  4. Hafa verið falið af dómnefnd, að vinna að listskreytingu á opinberum vettvangi.
  5. Eiga minnst eitt verk í opinberri eigu, keypt af viðkomandi safnráði eða matsnefnd.
  6. Hafa hlotið opinberan styrk eða starfslaun. 
Stjórn félagsins fjallar um umsóknir og leggur niðurstöðuna fyrir félagsfund til endanlegrar afgreiðslu.

Sætti umsækjandi sig ekki við niðurstöðu matsaðila getur hann vísað málinu til aðalfundar og ræður þar einfaldur meirihluti atkvæða.


5.  grein
Stjórn Myndlistarfélagsins skipa fimm fulltrúar, formaður, varaformaður, ritari, vararitari og gjaldkeri. Formaður skal kosinn sérstaklega til tveggja ára í senn. Meðstjórnendur eru einnig kosnir til tveggja ára og skipta þeir með sér verkum á fyrsta stjórnarfundi eftir aðalfund. Aldrei skulu fleiri en tveir meðstjórnendur ganga úr stjórninni hverju sinni. Á aðalfundi skal ennfremur kjósa tvo varamenn. Ef stjórnarmaður hættir stjórnarsetu áður en kjörtímabili hans lýkur skal varamaður skipa sæti hans. Ef aðalmaður boðar forföll skal boða varamann í hans stað. Stjórnin skal kosin á aðalfundi og eru allir fullgildir félagsmenn sambandsins kjörgengir. Þeir frambjóðendur sem flest atkvæði hljóta í kjöri meðstjórnenda taka sæti í stjórn. Sá sem næstur kemur tekur sæti varamanns. Hljóti tveir menn jafna atkvæðatölu skal varpað hlutkesti á milli þeirra.


6. grein
Aðalfund skal halda að vori ár hvert og ekki seinna en í apríllok. Fundurinn skal boðaður með tveggja vikna fyrirvara. Fundurinn er lögmætur ef 10 félagsmenn mæta. Félagsfundi skal halda þegar stjórnin telur þess þörf eða þriðjungur félagsmanna óskar þess. Félagsfundi skal boða með minnst þriggja daga fyrirvara. Formaður kallar saman stjórnarfundi þegar honum þykir þurfa eða einhver í stjórninni óskar þess, ekki færri en fjóra fundi á ári. Aðalfundur ákveður árgjald félagsins. Gjaldkeri afhendir endurskoðendum reikninga félagsins viku fyrir aðalfund.

Dagskrá aðalfundar skal vera svohljóðandi:
1.  Skýrsla stjórnar.
2.  Reikningar.
3.  Stjórnarkosning.
4.  Kosning félagslegs skoðunarmanns og endurskoðanda til eins árs.
5.  Lagabreytingar.
6.  Ákvörðun félagsgjalda.
7.  Önnur mál.

Allar samþykktir á aðalfundi verða að hljóta einfaldan meirihluta greiddra atkvæða.


7. grein
Nöfn þeirra félagsmanna sem ekki hafa greitt árgjald yfirstandandi árs, mánuði fyrir aðalfund, skulu sett á aukaskrá. Skal þeim tilkynnt þetta skriflega eða með tölvupósti þegar í stað. Félagar á aukaskrá hafa ekki atkvæðisrétt á félagsfundum né aðalfundi og ekki heldur kjörgengi í stjórn, nema þeir hafi gert upp skuld sína fyrir aðalfund.

Þeir félagsmenn, sem ekki hafa greitt árgjaldið í tvö ár samkvæmt framansögðu, falla sjálfkrafa út af félagaskrá og verða ekki félagsmenn á ný fyrr en þeir hafa greitt skuld sína.


8. grein
Breytingar á lögum Myndlistarfélagsins verða ekki gerðar nema á aðalfundi og því aðeins að 2/3 mættra fundarmanna greiði þeim atkvæði.  Allar tillögur um lagabreytingar svo og aðrar veigamiklar tillögur sem bera skal upp til atkvæða á aðalfundi skulu boðaðar í fundarboði.

9. grein
Ákvörðun um slit félags verður tekin á aðalfundi með auknum meirihluta, 2/3 og renna eignir þess til Sambands Íslenskra Myndlistarmanna.

10. grein
Lög þessi öðlast þegar gildi.

Stofnfundur Myndlistarfélagsins á laugardaginn

Laugardaginn 26. janúar 2008, klukkan 17 verður haldinn stofnfundur Myndlistarfélagsins, í Deiglunni á Akureyri.

Undirbúningsfundur að stofnun félags myndlistarfólks var haldinn í nóvember síðastliðinn í Deiglunni. Hátt í 30 myndlistarmenn mættu á fundinn. Þar voru hagsmunamál myndlistarfólks á Akureyri og nágrenni rædd og fjölmargar hugmyndir komu fram. Valin var undirbúningshópur að stofnun félagsins og rætt var um að félagið sækti um aðild að Sambandi íslenskra myndlistarmanna.
Undirbúningshópur var valinn og í honum eru: Aðalheiður S. Eysteinsdóttir, Brynhildur Kristinsdóttir, Gunnar Kr. Jónasson, Þórarinn Blöndal og Hlynur Hallsson. Varamenn eru Arna Valsdóttir, Jóna Hlíf Halldórsdóttir og Jónas Viðar.

Undirbúningshópurinn ákvað að halda úti þessari vefsíðu með upplýsingum um myndlistarviðburði á Norðurlandi og tenglum á félaga og gallerí og söfn.

Á stofnfundinum verða drög að lögum félagsins kynnt, kosin stjórn og rætt um hagsmunamál myndlistarfólks.

- Hvernig eflum við myndlist og menningu á Norðurlandi?
- Hvað á myndlistarfólk á Norðurlandi sameiginlegt?
- Hver eru hagsmunamál myndlistarmanna?
- Getum við haft meiri áhrif saman en í sitt hverju lagi?
- Hvað viljum við og hvað getum við gert?

Allt myndlistarfólk er velkomið á stofnfundinn.

Búdda er á Akureyri: Opnun í Listasafninu á Akureyri

Búdda er á Akureyri:
Oft var zen en nú er nauðzen

Laugardaginn 19. janúar kl. 15 verður opnuð í Listasafninu á Akureyri sýning sem hefur lífsspeki búddismans að leiðarljósi, en listamennirnir á henni eru Halldór Ásgeirsson, Erla Þórarinsdóttir, Finnbogi Pétursson og hinn heimskunni bandaríski vídeólistamaður Bill Viola, sem hér sýnir í fyrsta sinn á Íslandi.

Listasafnið á Akureyri hefur oft farið ótroðnar slóðir í sýningarhaldi og er þessi sýning engin undantekning frá þeirri reglu. Henni er ætlað að vera fræðandi og til þess fallin að skapa áhugaverða umræðu og jafnvel deildar meiningar. Af þeim sökum fylgir veglegt blað með henni sem hefur að geyma talsverðar upplýsingar um búddisma og þróun hans (rúmlega 26.000 orð). Til er gríðarlegt magn af efni um búddisma á öðrum tungumálum, en því miður mjög lítið á íslensku og ætti því að vera nokkur fengur að blaðinu.

Til að gera sýninguna nærtækari íslenskum áhorfendum var leitað á náðir kunnra íslenskra myndlistarmanna sem hafa tileinkað sér búddisma (Halldór Ásgeirsson), þekkja vel til hans og nota það innsæi í list sinni (Erla Þórarinsdóttir), eða virðast smellpassa í þetta tiltekna samhengi (Finnbogi Pétursson). Á henni er einnig að finna nokkra hefðbundna búddíska hluti. Sérstakur gestur sýningarinnar er Bill Viola, einn virtasti myndlistarmaður heims. Viola hefur lengi verið kenndur við búddisma og setur verk hans á sýningunni, „Lostalotning“ (Observance, 2002), hana í alþjóðlegt samhengi.

Sigurður Skúlason leikari, sem er búddisti, skrifaði fróðlegan pistil um sögu búddismans af þessu tilefni og gerði skrá yfir ýmis hugtök sem þar bregður oft fyrir. Hannes Sigurðsson, sýningarstjóri og höfundur verkefnisins, skrifar einnig ítarlega grein um búddisma og hugmyndafræði hans, einkum og sér í lagi tantrískan búddisma, og kemur víða annars staðar við á yfirreið sinni, auk þess að fjalla um listamennina og setja þá í samhengi við búddisma. Þá er í blaðinu að finna samandregna endursögn hans á tveimur af mörgum bókum indverska ólíkindatólsins Oshos (1931-1990), en þessi andlegi meistari var þyrnir í augum bandarísku alríkislögreglunnar sem vísaði honum úr landi og var honum í framhaldi meinað að stinga niður fæti í tuttugu öðrum þjóðríkjum.

Blaðið setur sýninguna í víðtækt samhengi og opnar fyrir fjölbreytilega túlkun á listaverkunum sem á henni eru. Á sýningunni geta áhorfendum einnig upplifað búddisma á eigin skinni, ef svo má segja. Boðið verður upp á ókeypis Body-Balance æfingar í safninu í samvinnu við heilsuræktina Átak, sem í þessu samhengi alveg eins mætti nefna „Art Movements“ þar sem fólk getur teygt sig og notið listarinnar á sama tíma — og ætti það að vera kjörið tækifæri til að koma stirðum skammdegiskroppum aftur á hreyfingu eftir allar jólakrásirnar. Þeir sem vilja frekar melta inntak sýningarinnar að zenbúddískum sið geta tyllt sér í hugleiðsluhorn sem útbúið hefur verið í miðsal safnsins.

Sýningin stendur frá 19. janúar til 9. mars. Opið alla daga nema mánudaga frá 12-18. Aðgangseyrir kr. 400. Ókeypis á fimmtudögum. Máttarstólpi sýningarinnar er Eymundsson. Aðrir styrktaraðilar eru: Átak, Flugfélag Ísland, Ásprent, KPMG, Securitas, Eimskip, ISS, Sparisjóður Norðlendinga, Flügger litir og Hótel Akureyri.

Nánari upplýsingar veitir Hannes Sigurðsson, forstöðumaður Listasafnsins á Akureyri, í síma 899-3386. Netfang: hannes(hjá)art.is

Þórunn Elísabet Sveinsdóttir opnar sýninguna BLÍÐLYNDI í galleriBOXi á laugardag

Ný sýning í galleriBOXi á laugardag

ÞÓRUNN E. SVEINSDÓTTIR opnar sýninguna BLÍÐLYNDI

laugardaginn 19.janúar kl.16:00

 

Þórunn Elísabet Sveinsdóttir hefur unnið við leikhús í um tvo áratugi en einnig gert búninga fyrir sjónvarp, tónlistarmyndbönd, auglýsingar og kvikmyndir. Hún  gerði t.d. búninga fyrir kvikmyndirnar 101 Reykjavík, Ikingut og Hafið. Henni voru veitt Grímuverðlaunin 2004 - Íslensku leiklistarverðlaunin fyrir bestu búninga ársins í sýningu Vesturports á Romeó og Júlíu.  Meðal leiksýninga sem Þórunn hefur unnið búninga fyrir við Þjóðleikhúsið eru Gauragangur, Snædrottningin, Taktu lagið Lóa, Sjálfstætt fólk og Krítarhringurinn í Kákasus. Nýleg verkefni Þórunnar við Þjóðleikhúsið eru búningar fyrir Rambó 7 og fyrir Klaufa og kóngsdætur (H.C. Andersen), en fyrir þá búninga var hún tilnefnd til Grímunnar 2005. Nýjustu verk hennar innan Þjóðleikhússins eru Umbreyting, Stórfengleg!, Sitji guðs englar, Leitin að jólunum, Leg og nú er í vinnslu Baðstofan, sem frumsýnd verður í febrúarbyrjun og unnin er af sama hópi og gerði Leg, en fyrir þá sýningu fékk hún Grímuna og kosin Búningahöfundur ársins 2007. Á Listahátíð 2007 var hún einn höfunda leiksýningarinnar Gyðjan í vélinni sem vakti mikla athygli, fékk mjög lofsamlega umfjöllun og var tilnefnd ein besta sýning ársins.

Frá unglingsárum hefur Þórunn fundið útrás listsköpunar í teppasaumi og óhætt að fullyrða að þar hefur hún þróað sérstakan og persónulegan stíl. Eftir hana liggja mörg hundruð teppi hérlendis og erlendis, en hér er eru nú sýnd örfá af nýjustu teppunum hennar.

Sýningin stendur til 3.febrúar.

Opið er laugardaga og sunnudaga frá 14-17.

--
galleriBOX
Kaupvangstræti 10
600 Akureyri
www.galleribox.blogspot.com

Brynhildur 6922959

Gitte 8945431

Jóna Hlíf 6630545

Karen 6699373

Þorvaldur Þorsteinsson: Myndlistarsýning, bók og kvöldskemmtun í Populus tremula

Populus tremula kynnir:
 
Þorvaldur Þorsteinsson

“LEIKMYNDIR”

Myndlistarsýning, bók, kvöldskemmtun

Laugardaginn 19. janúar kl. 14:00 opnar Þorvaldur Þorsteinsson myndlistarsýninguna Leikmyndir í Populus tremula. Um leið kemur út bókin Mónólógar eftir Þorvald.

Sýningin verður einnig opin sunnudaginn 20. jan. kl. 14:00-17:00. Aðeins þessi eina helgi.

Að kvöldi sama dags, kl. 22:00, verður kvöldskemmtun þar sem stórleikarar lesa úr nýútkominni bók ásamt höfundi og Sickbird leikur eigin tónlist með stórsveit, skipaðri þeim Arnari Tryggvasyni, Kristjáni Edelstein, Ingva Rafni Ingvasyni, Pálma Gunnarssyni og Togga skyttu.

Húsið verður opnað kl. 21:30 og malpokar leyfðir.

Aðgangur ókeypis, sem endranær í vinnustofu okkar.

http://poptrem.blogspot.com

Dagrún Matthíasdóttir sýningu sína ,,Lífið er saltfiskur" á Veggverk og í DaLí Gallery á Akureyri

Dagrún Matthíasdóttir

 "Lífið er saltfiskur"

Veggverk - DaLí Gallery

Á laugardaginn 19. janúar opnar Dagrún Matthíasdóttir sýningu sína ,,Lífið er saltfiskur" á Veggverk og í DaLí Gallery á Akureyri. Um ræðir sýningu undir sömu yfirskrift en Dagrún vinnur verk sitt á þessa tvo staði í miðbæ Akureyrar sem kallast á í verki utandyra og innandyra. Opnun sýningarinnar fer fram í DaLí Gallery í Brekkugötu 9 á Akureyri kl. 17 og eru allir velkomnir.

 Dagrún Matthíasdóttir, um sýningu sína:

,,Lífið er saltfiskur"! Mér hefur alltaf þótt þetta snilldarfrasi. Allt frá því ég las bækurnar hans pabba um teiknimyndafígúruna Siggu Viggu og skildi hvorki frasann um saltfiskinn né pólitíska þráðinn í sögunum. En þótti drepfyndið að lífið gæti verið saltfiskur! Síðar á unglingsárunum vann ég í saltfiski inni á Langeyri við Álftafjörð og kynntist af eigin raun bæði saltfiskinum og striti vinnunnar í svuntu og stígvélum frá 66°norður.

Form sólþurrkaða saltfisksins heillar mig á myndrænan hátt – formið vekur upp ljúfar minningar hugans og bragðlauka ásamt því að gleðja augað.  Hvort form Saltfisksins vekur sömu hughrif hjá öðrum veit ég ekki en frasinn ,,Lífið er saltfiskur" lifir enn góðu lífi í málnotkun allra, ungra uppa jafnt sem gamalla hippa, kótelettu karla og mussu kellna. Því finnst mér því tilvalið að nota form saltfisksins í myndsköpun svona rétt eftir neyslubrjálæði jólahátíðarinnar.

Hugmyndin af verkum mínum sem sjá má á Akureyri frá og með 19.janúar undir yfirskriftinni "Lífið er saltfiskur" mótast í raun af huglægu bragði og vinnu.  Til að framkalla saltbragð þeirra sem á horfa, mun formið taka á sig mynd á Veggverk og endurvarpast með nýjum hætti í DaLí Gallery, af einum vegg yfir á annan.

Formleg opnun verður 19. janúar kl.17 og verður tekið á móti listunnendum og skemmtilegu fólki á DaLí Gallerý í Brekkugötu 9 á Akureyri.

Dagrún Matthíasdóttir s. 8957173

http://www.dagrunmatt.blogspot.com

http://daligallery.blogspot.com

http://gralist.wordpress.com

 

Sýningarstjóri Jóna Hlíf Halldórsdóttir

www.veggverk.org

Guðrún Pálína Guðmundsdóttir opnar málverkasýninguna Andlit, í Jónas Viðar Gallerýi

Laugardaginn 19.janúar kl. 14.30 opnar Guðrún Pálína Guðmundsdóttir málverkasýninguna Andlit, í Jónas Viðar Gallerýi. Sýningin stendur til og með 9.febrúar. Galleríið er staðsett í Listagilinu á jarðhæð listasafnsins og er opið á föstu- og laugardögum frá kl. 13.-18 og aðra daga eftir samkomulagi.

Guðrún Pálína er fædd og búsett á Akureyri. Hún nam myndlist í Gautaborg og í Hollandi, og kláraði framhaldsnám frá Jan van Eyck Akademie 1987. Hún hefur sýnt reglulega síðan. Hún fæst mest við andlitsmyndagerð og vinnur innsetningar í rými byggð á persónulýsingum stjörnukorta viðkomandi einstaklinga. Hún starfrækir listagalleríið Gallerí +, í Brekkugötu 35 ásamt eiginmanni sínum Joris
Rademaker. Flest verkin á sýningunni eru unnin 2008.

Amy Rush opnar sýninguna Rainbow Holograms í Deiglunni á laugardag

Laugardaginn 19. febrúar klukkan 14:00  opnar Amy Rush sýninguna Rainbow Holograms í Deiglunni á Akureyri.
Einnig verður Djonam Saltani með opna gestavinnustofu á sama tíma. Hann mun sýna skúlptúra sem hann hefur verið að vinna að.
Allir velkomnir

Kristín G. Gunnlaugsdóttir bæjarlistamaður Seltjarnarness

Við óskum Kristínu G. Gunnlaugsdóttur myndlistarkonu til hamingju með að hafa verið útnefnd bæjarlistamaður Seltjarnarness 2008.

Kristín er fædd á Akureyri þann 15. apríl 1963. Foreldrar hennar voru Gunnlaugur P. Kristinsson fræðslufulltrúi Kaupfélagi Eyfirðinga á Akureyri og Gunborg Kristinsson bókavörður, fædd í Svíþjóð. Kristín hefur verið starfandi myndlistarmaður í 20 ár. Hún hefur búið og unnið að list sinni á Seltjarnarnesi frá vori 2004.

Kristín var útnefnd bæjarlistamaður Akureyrar 1996-1997 og hlaut þá eins árs starfslaun Akureyrarbæjar. Kristín hefur verið einn fremsti myndlistarmaður landsins í mörg ár og ein af mörgum sem koma frá Akureyri.

Hér er heimasíða Kristínar. 

Útnefnd bæjarlistamaður Seltjarnarness

Möguleg fjármögnun til menningarstarfs - Námskeið á Akureyri

Möguleg fjármögnun til menningarstarfs - Námskeið á Akureyri

Skipuleggjandi: Norræna upplýsingaskrifstofan á Akureyri í samstarfi við Gilfélagið

Flestir þeir sem vinna með menningartengd verkefni þurfa að sækja um styrki til fjármögnunar þeirra. Til hvaða verkefna, frá hverjum og hvernig er hægt að fá styrki?
Farið verður yfir helstu sjóði tengda norrænu menningarsamstarfi og innlenda sjóði.

Tími og staður
Námskeiðið verður haldið í Ketilhúsinu á Akureyri fimmtud. 24. janúar 2008 kl. 11:00 – 16:00

Dagskrá

11.00 – 11.45 Norræna menningargáttin/Kulturkontakt Nord
Þuríður Helga Kristjánsdóttir

12.00 – 12.45 Norræni menningarsjóðurinn
María Jónsdóttir, Norrænu upplýsingaskrifstofunni

12.45 – 13.45 Hádegisverður

13.45 – 14.00 Menningarsjóður KEA
Ingibjörg Ösp Stefánsdóttir Markaðs- og kynningarfulltrúi KEA

14.00 – 14.15 Menningarsjóður Eyþings
Ragnheiður Jóna Ingimarsdóttir menningarfulltrúi Eyþings

14:15 - 14:30 Menningarsjóður Akureyrar
Hulda Sif Hermannsdóttir

14:30 - 14:45 Innlendir styrkir og sjóðir
María Jónsdóttir, Norrænu upplýsingaskrifstofunni

14.30 – 16.00 Að hverju ber að huga þegar sótt er um (fyrir þá, sem eru
með spurningar vegna ákveðinna norrænna verkefna og aðra
áhugasama.
María Jónsdóttir og Þuríður Helga Kristjánsdóttir


Námskeiðið kostar 5.000 kr. Innifalið er efniskostnaður, léttur hádegisverður og kaffi.
Gilfélagar og félagar í Norræna félaginu greiða 3.000. krónur

Skráning hjá Maríu Jónsdóttur með tölvupósti til mariajons(hjá)akureyri.is. sem fyrst. Athugið að skráning er bindandi ef ekki er afboðað fyrir kl. 12:00 22/1 2008
Heimasíða skrifstofunnar er www.akmennt.is/nu

María Jónsdóttir
Forstöðumaður Norrænu upplýsingaskrifstofunnar

Norræna upplýsingaskrifstofan/Nordisk informationkontor
Kaupvangsstræti 23
600 Akureyri
Island.
Sími: 462 7000 Fax: [phone]

Joris Rademaker sýnir í Kunstraum Wohnraum á Akureyri.

JORIS RADEMAKER

MANNLEG TILVIST

06.01. - 02.03.2008

Opið samkvæmt samkomulagi    

KUNSTRAUM WOHNRAUM           
Hlynur Hallsson • Kristín Kjartansdóttir   
Ásabyggð 2 • IS-600 Akureyri •  [phone]
hlynur(hjá)gmx.net • www.hallsson.de


Sunnudaginn 6. janúar 2008 opnaði Joris Rademaker sýninguna Mannleg tilvist í Kunstraum Wohnraum á Akureyri. Joris er Hollendingur en hefur fengist við myndlist síðan 1983. Hann var útnefndur bæjarlistamaður Akureyrar árið 2006.
Joris vinnur með blandaða tækni og oft með mismunandi þema í lengri tíma í senn. Þetta er einhverskonar yfirlitssýning inni á heimili þar sem verkin samræmast alvöru og leik heimilisfólksins. Þau eru unnin út frá pússluspilskubbi, og í mismunandi tækni, vatnsliti, veggfóður, sprey, þrykk, málverk, ljósrit, klippimynd og sem objekt eða hlutir.

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Jorisar Rademakers stendur til 2. mars 2008 og er opin eftir samkomulagi og hægt er að hringja í síma 4623744. Nánari upplýsingar um Kunstraum Wohnraum er að finna hér.

Joris Rademaker
1977-1983 Myndmenntakennaranám í Tilburg í Hollandi
1983-1986 AKI: Myndlistaskólinn í Enschede í Hollandi
2006 Bæjarlistamaður Akureyrar

Sýningar
1987 Gallery Hooghuis, Arnhem, Holland
1988 Markt 17, Enschede, Noordkunst, Holland
1995 Listasafnið á Akureyri
1995 Slunkaríki, Ísafjörður
1997 Nýlistasafnið í Reykjavík
1997 Deiglan Akureyri, Listasumar 95 á Akureyri
1998 Gallerí+, Akureyri
2002 Slunkaríki, Ísafjörður
2002 Gallerí Skuggi, Reykjavík
2004 Safnasafnið, Svalbarðsströnd
2005 Bókasafn Háskólans á Akureyri
2005 Gallarí gangur, Reykjavík
2005 Gallerí+, Akureyri
2006 Populus Tremula, Akureyri
2006 Karólína Restaurant

Guðrún Vaka opnar sýninguna "Uppgjör", á Café Karólínu á laugardag

Guðrún Vaka

Uppgjör

05.01.08 - 02.02.08

Velkomin á opnun laugardaginn 5. janúar 2008, klukkan 14

Café Karólína // www.karolina.is
Kaupvangsstræti 23 // IS 600 Akureyri // 4612755
---

Laugardaginn 5. janúar 2008, klukkan 14 opnar Guðrún Vaka sýninguna "Uppgjör", á Café Karólínu á Akureyri.

Guðrún Vaka útskrifaðist frá Myndlistaskólanum á Akureyri 2006 var þar áður eitt ár á myndlistabraut VMA. Hún er meðlimur í Grálistahópnum og hefur tekið þátt í samsýningum en þetta er hennar fyrsta einkasýning. Hún segir um sýninguna á Café Karólínu:

"Tónlist! Hvar værum við án hennar? Það eiga sér örugglega flestir einhverja góða sögu um þeirra upplifun á góðri tónlist, svo ekki sé minnst á lélegri tónlist, lag sem minnir á fyrstu ástina, lag til að gráta yfir, lag sem kemur manni í gott skap eða vont skap og svona mætti lengi telja.

Með þessari sýningu má segja að ég sé að gera upp tónlistasmekk minn frá æsku en hann þótti með eindæmum lélegur, það er hvað jafnaldra mína varðar, og það var ekki oft að ég viðurkenndi hvernig tónlist ég hlustaði á þegar enginn heyrði til.

Þetta byrjaði allt á því að ég komst í plötusafnið hans pabba, en hann átti ógrynni af vínilplötum, litlum, stórum, 45 snúninga og 75 snúninga svo ekki sé minnst á valið á tónlistinni sjálfri, þarna var hægt að finna alla helstu söngvarana frá árunum “60-“80.

Ég kolféll fyrir köllum á borð við Elvis Prestley, Cat Stevens, Simon and Garfunkel og Creedings Clearwater Revivel, ég verð nú að viðurkenna að ég hlusta ekki mikið á Elvis í dag en hinir eldast assi vel. Þegar ég var um 14-15 ára voru strákarnir í Wham og Duran Duran aðalmálið, mér þótti ekki mikið til þeirra koma en reyndi að taka þátt í herleg heitunum. Einhvern tíman þegar umræða opnaðist í bekknum mínum um tónlist var ég spurð með hverjum ég “héldi” þá asnaðist ég til að segja Wham en allur bekkurinn “hélt” með Duran Duran.

Ég hefði alveg eins getað sagt Cat Stevens miðað við umræðuna sem fór af stað í kjölfarið á þessu svari mínu og dauðsá eftir því að hafa ekki gert það því ég var alveg viss um að allavega kennarinn hefði staðið með mér ef ég hefði nefnt hann. Tónlist í dag á það til að fara dálitíð í taugarnar á mér og þá helst textarnir, allt þetta...jejejeje, oooooo og sexsexsex, hvað varð um alla ástina, pólitíkina og áróðurinn sem lituðu tónlistina á hippaárunum?

Í dag hlusta ég enn á þessa kalla mína og þrátt fyrir að tónlista smekkur minn sé talinn vafasamur þá læt ég engan stoppa og mig og hlusta á þá í botni inni í bílskúr eða í Ipodinum mínum. "

Fyrri sýningar:
Samsýning, DaLí, Grálist með smálist              2007
Einkasýning, Staðurinn Akureyri                    2006
Samsýning, Óðinshúsi Eyrarbakka                 2006
Vorsýning Myndlistaskólans á Akureyri             2004, 2005 og 2006
Samsýning, Langi Mangi Ísafirði                    2005-2006
Samsýning, Strikið Akureyri                          2005
Nemendasýning útskriftanema, Deiglan          2005
Nemendasýning útskriftanema, Deiglan          2005
Samsýning, Rex og Pex vinnustofa                2005
Samsýning, Geimstofan                                 2004
Samsýning, Pönk, Deiglan                              2004

Nánari upplýsingar veitir Guðrún Vaka í gvaka(hjá)simnet.is og í síma 8962987

Sýningin á Café Karólínu stendur til 2. febrúar, 2008. Allir eru velkomnir á opnun laugardaginn 5. janúar, klukkan 14.

Á sama tíma stendur yfir sýning Brynhildar Kristinsdóttur á Karólínu Restaurant.

Næstu sýningar á Café Karólínu:

03.02.08-02.03.08     Steinn Kristjánsson
03.03.08-04.04.08     Unnur Óttarsdóttir
05.04.08-02.05.08     Guðmundur R Lúðvíksson
03.05.08-06.06.08     Kjartan Sigtryggsson
07.06.08-04.07.08     Arnar Ómarsson
05.07.08-01.08.08     Vilhelm Jónsson
02.08.08-05.09.08     Margeir Sigurðsson
06.09.08-03.10.08     Sigurlín M. Grétarsdóttir
04.10.08-31.10.08     Ingunn St. Svavarsdóttir Yst 
01.11.08-05.12.08     Þorsteinn Gíslason

Umsjónarmaður sýninganna er Hlynur Hallsson

Sýningu Steinunnar Helgu á Café Karólínu lýkur á föstudag

Nú eru síðustu forvöð að sjá sýningu Steinunnar Helgu Sigurðardóttur "að snertast í augnablikinu" á Café Karólínu en henni lýkur á föstudaginn 4. janúar 2008.

Steinunn Helga Sigurðardóttir

að snertast í augnablikinu

01.12.07 - 04.01.08

Café Karólína // www.karolina.is
Kaupvangsstræti 23 // IS 600 Akureyri // 4612755

Steinunn Helga Sigurðardóttir útskrifaðist úr MHÍ 1993 og stundaði framhaldsnám í myndlist hjá Jannis Kounellis í Kunstakademie Düsseldorf. Hún hefur verið búsett í Danmörku frá árinu 1993. Hún hefur haldið fjölda sýninga og  einnig skipulagt sýningar undanfarin ár.

Steinunn Helga segir um sýninguna "Sýningin er tilraun til að setja í form þær pælingar sem ég hef verið upptekin af. Hugsanir, drauma, raunveruleikann og myndunarheiminn.
Hvað er raunverulegt? Er lífið í hinum ytra heimi meira raunverulegt en lífið í hinum innra heimi?
Hvort er meira abstrakt, þar sem ég sit meðvituð og skrifa þennan texta og hlusta á þvottavélina mala í bakgrunninum, hundarnir mínir hrjóta við tærnar á mér, eða það sem gerist inni í höfðinu á mér. Þar sem ég bæði hugsa um þennan texta sem ég er að skrifa, og ýmislegt annað, sem er eins og smá myndir og hugsanir sem koma við og vilja láta hugsa sig?
Myndir sem vilja láta sjá sig, og vilja að ég gefi þeim tíma, en ég ýti þeim burtu því ég þarf að vera í hinum ytra heima þessa stundina, eða er ég það?
Ég hef engin svör, enda er það í raun ekki það sem ég hef áhuga á, en ég geri þessar pælingar að leik, þar sem ég leik mér með þessum báðum tilverum og leyfi þeim að koma fram og stjórna því sem kemur, án þess að dæma til eða frá.

Lejre. 10 nóv. 2007
Steinunn Helga Sigurðardóttir"

Nánari upplýsingar um verk Steinunnar Helgu er að finna á síðunni www.steinunn.eu og nánari upplýsingar veitir hún í steinunnhelga(hjá)gmail(punktur)com og hún bloggar á http://steina.blog.is

Næstu sýningar á Café Karólínu:

05.01.08-02.02.08               Guðrún Vaka
03.02.08-02.03.08               Steinn Kristjánsson
03.03.08-04.04.08               Unnur Óttarsdóttir
05.04.08-02.05.08               Guðmundur R Lúðvíksson
03.05.08-06.06.08               Kjartan Sigtryggsson
07.06.08-04.07.08               Arnar Ómarsson
05.07.08-01.08.08               Vilhelm Jónsson
02.08.08-05.09.08               Margeir Sigurðsson
06.09.08-03.10.08               Sigurlín M. Grétarsdóttir

Umsjónarmaður sýninganna er Hlynur Hallsson 

Gestavinnustofa Gilfélagsins kynnir

Amy Rush myndlistamaður frá Syndney, Ástralíu dvelur í gestavinnustofu Gilfélagsins í Janúar 2008.
Amy útskrifaðist 2007 með Master of Fine Arts frá COFA.

“my work is focused in the medium of rainbow holography which I use to create instillation and performance bades art."

Hægt er að sjá feril Amy á eftirfarandi síðu:
www.holonet.khm.de/holographiclove/documents/AmysCV.pdf


Febrúar        Peter Alexander              UK               

Mars            Paul Fortin                 Kanada

            Robert Malinowski         Kanada

Apríl            Manuela Gernedel         Skotland   

Maí            Miyuki Tsushima            USA

Júní            Hannah Kasper             USA

Júlí            Anna-K Mields             Þýskaland

Ágúst            Raquel Mendes            Portúgal

September        Anna McCarthy             Þýskaland

Október        Kazuko Kizanna             Japan

Nóvember        Michelle Oosterbaan         USA

Desember        Van der Bie, Esther         Sviss

Jóna Hlíf Halldórsdóttir  jonahlif(hjá)gmail.com
Steinn Kristjánsson  steinn52(hjá)visir.is

GESTAVINNUSTOFA GILFÉLAGSINS
gestavinnustofaak(hjá)hotmail.com
Kaupvangsstræti 23
600 Akureyri

Gleðilegt myndlistarár og dagskrá VeggVerks 2008

Gleðilegt ár 2008 öllsömul. Það er búið að ákveða formlegan stofnfund Myndlistarfélagsins. Hann verður laugardaginn 26. janúar 2008 klukkan 16 í Deiglunni á Akureyri. Og hér er dagskráin hjá VeggVerki.org 2008.