Ásdís Arnardóttir opnar sýningu á Bókasafni Háskólans á Akureyri

Ásdís Arnardóttir opnar myndlistasýningu á Bókasafni Háskólans á Akureyri laugardaginn 2. febrúar kl. 15:00. Sýningin mun standa til 1. mars.
Ásdís nam fyrst við Myndlistaskólann á Akureyri 1995-1996, síðan í Myndlista- og handíðaskóla Íslands og lauk prófi frá málunardeild árið 1999. Auk þess hefur hún tekið ýmis námskeið í steinhöggi m.a. við Accademia di Belle Arti, Bologna og hjá Einari Má Guðvarðarsyni, myndhöggvara.
Hún hefur m.a. starfað við Menningarmiðstöðina Gerðuberg og hjá Listasafni Kópavogs, Gerðarsafni. Að undanförnu hefur hún eingöngu unnið að eigin list.
Á sýningunni á bókasafninu eru myndir málaðar með vatnslitum á hríspappír. Myndefnið sækir Ásdís í ljósmyndir frá miðjum 8. áratug síðustu aldar, sem teknar voru á Kodak Instamatic myndavél af einfaldri gerð. Í verkunum kallast á innileiki ljósmyndarinnar og sú tilfinning sem myndast við samspil pappírs og litar. Um leið segir hver mynd örsögu úr nálægri fortíð.

Bókasafn Háskólans á Akureyri er opið alla virka daga frá 8:00 – 18:00 og á laugardögum frá 12:00 – 15:00. 

Allir eru velkomnir

Athugasemdir

[Erna Bjarnadóttir, 29.1.2008 kl. 14:35]

Til hamingju með sýninguna Ásdís, að sjálfsögðu vek ég athygli á þér á blogginu mínu og vona að allir tíu fastagestirnir skoði þessa frétt.

[Kristjana Bjarnadóttir, 29.1.2008 kl. 14:38]

Glæsilegt og til hamingju, þetta verður tengt með pompi og prakt

[Vilborg Hjartardóttir (IP-tala skráð) 30.1.2008 kl. 10:48]

Frábært Ásdís og til hamingju og gangi þér vel með framhaldið.