Sveinbjörg Hallgrímsdóttir opnar sýningu á bókasafni Háskólans á Akureyri

Sveinbjörg Hallgrímsdóttir opnar sýningu á nýjum handþrykktum tréristum á bókasafni Háskólans á Akureyri laugardaginn 12. apríl  kl. 14.00 – 17:00.
Sýningin mun standa til 16. maí næstkomandi

Í verkum sínum fjallar hún um höfuðprýði Íslands, hálendið og jöklanna sem hægt og bítandi bráðna og renna út í sandinn.

Sveinbjörg útskrifaðist frá kennaradeild Myndlista- og handíðaskóla Íslands 1978 og aftur frá málaradeild sama skóla 1992.  Hún var einnig við nám í Myndlistaskóla Reykjavíkur 1986-1990.
Frá árinu 1992 hefur Sveinbjörg verið með eigin vinnustofu.  Í dag rekur hún vinnustofu og sýningaraðstöðu í Svartfugli og Hvítspóa ásamt Önnu Gunnarsdóttur í miðbæ Akureyrar.
Sveinbjörg á að baki 11 einkasýningar og fjölda samsýninga heima og erlendis.
Hún er félagi í grafíkfélaginu Íslensk Grafík og Sambandi íslenskra myndlistarmanna, SÍM.
Sveinbjörg er einnig meðlimur í dönsku grafíksamtökunum Fyns Grafiske Værksted í  Óðinsvéum.
Sveinbjörg var valin bæjarlistamaður Akureyrar 2004 og listamaður Stíls 2007- 2008.

Bókasafn Háskólans á Akureyri er opið alla virka daga frá 8:00 – 18:00 og á laugardögum frá 12:00 – 15:00.  Eftir 10. maí er einungis opið virka daga frá 8:00-16:00

Allir eru velkomnir

Konur í ljósmyndasögunni - Fyrirlestur í Ketilhúsinu

Konur í ljósmyndasögunni

Anna Fjóla Gísladóttir ljósmyndari, mun flytja fyrirlestur um konur í ljósmyndasögunni í Ketilhúsinu í Listagili á Akureyri föstudaginn 28. mars, kl 14.50.  

Dagskráin er hluti af „Fyrirlestrum á vordögum“, sem eru fjórir fyrirlestrar um efni sem tengjast listum og menningu. Þeir eru skipulagðir af kennurum á listnámsbraut Verkmenntaskólans á Akureyri í samvinnu við Listasafnið á Akureyri og Menningarmiðstöðina í Grófargili.

Anna Fjóla mun fjalla um og sýna myndir eftir u.þ.b. 10 konur allt frá 1850- 2007, m.a, Julia Margaret Cameron, Lee Miller, Mary Ellen Mark, Sally Man, og fleiri. 

Dagskráin mun standa í um eina klukkustund.
Aðgangur er ókeypis.
Allir velkomnir

Listnámsbraut Verkmenntaskólans á Akureyri, Listasafnið á Akureyri og Menningarmiðstöðina í Grófargili.

Þórarinn Blöndal með sýninguna Ský á VeggVerki

Laugardaginn 15. mars opnar Þórarinn Blöndal sýninguna Ský á VeggVerki.
 
Ein einfaldasta aðferðin sem notuð er við veðurfræðilegar rannsóknir er að spá í skýin. Skýin eru eins og svífandi veðurstöðvar sem gefa vísbendingar um það sem kann að gerast í veðrinu næstu klukkustundir og jafnvel næstu daga. Frá fornu fari hafa menn notað lögun skýja, breytingar á þeim og hreyfingar á skýjum við veðurspár.
Sýningin stendur til 13 april 2008.
 
www.veggverk.org

Bráðið vatn - Smeltevand

Sýningin Smeltevand sem er samsýning 10 norrænna listakvenna heldur áfram ferð sinni og var hún (ný og endurbætt) sett upp í sýningarsölum Menningarmiðstöðvarinnar Portalen, í Greve í Danmörku. 

Fimm íslenskar listakonur sem allar starfa að listsköpun á Akureyri eru þátttakendur: Ragnheiður Björk Þórsdóttir vefari, Hrefna Harðardóttir og Sigríður Ágústsdóttir leirlistarkonur, Anna Gunnarsdóttir textíl, Sveinbjörg Hallgrímsdóttir grafík og svo eru: Mette Strøm frá Noregi, Anette Andersen, Heidrun Sørensen, Else Marie Gert Nielsen, Inge-Lise Busacke frá Danmörku. 

 

Listsýningin er haldin í tengslum við „Alþjóðlegt heimskautaár“  sem nú stendur yfir í heiminum og reyna listakonurnar að túlka þeirra sýn á hlýnun jarðar, bráðnun jökla hækkandi sjávarstöðu m.a. í grafík, textíl- og leirverkum. Smeltevand var sett upp í Grænlandshúsinu í Kaupmannahöfn í september-nóvember s.l. og fékk bæði mjög góða blaðadóma og mikla aðsókn.  

Sýningin stendur frá 12. janúar til 24. febrúar nk. og opnunartími er:  kl. 14-17 þri-fös og kl. 13-17 lau. og kl. 11-15 sun. 

Greve er í klukkustundar lestarferð fyrir utan Kaupmannahöfn, farið út við Hundige lestarstöðina.

Sýningin í Portalen mun standa í 5 vikur en heldur þá áfram ferðalaginu og kemur til Akureyrar í júní.   Aðgangur er ókeypis.

Nánari upplýsingar : 

http://portalen.dk

skoða Gallerierne - Smeltevand

__________________________________________

Alþjóðlega heimskautaárið, International Polar Year, hófst  1. mars 2007 og lýkur í mars 2009.  Heimskautaárið stendur því í raun í tvö ár.   Þessi viðburður er hluti af sögulegri hefð, en 1/2 öld er liðin frá síðasta alþjóðlega heimskautaári.   Á heimskautaári er lögð áhersla á stór rannsóknarverkefni á öllum sviðum heimskautamála þar sem vísindamenn af ýmsum þjóðernum leggja saman krafta sína.

Fyrir áhugasama er hér tengill á heimasíðu IPY   http://www.ipy.org

Um og yfir 6.500 vísindamenn taka höndum saman frá 60 ríkjum og eru verkefnin um 200 talsins. Stóru áherslurnar eru helst á sviði loftslagsmála og veðurfarsbreytinga og þýðingu þeirra fyrir gróðurfar og dýralíf.  Eitt af því sem hvað mest verður í brennidepli á heimskautaári eru frekari rannsóknir á Grænlandsjökli og viðbrögð hans við veðurfarssveiflum.  Nú á að freista þess að leggja í afkomulíkan jökulsins, sem hlýtur að teljast vera risavaxið verkefni ekki síst þar sem lítið er um beinar mælingar á ákomu og leysingu þessa stærsta ísmassa norðurhvels.

Á fyrsta alþjóðlega heimskautaárinu 1882-1883 var megináherslan lögð á veðurathuganir og rannsóknir á norðurljósum.

Næst, eða 1932-1933 voru vísindamenn afar uppteknir af segulsviði jarðar og mælingum á hafinu.

1957-1958 gekk mikið á í margvíslegum rannsóknum jarðeðlisfræðinnar, en þá var árið reyndar kallað alþjóða jarðeðlisárið og sérstakt sjónarhorn á Suðurskautslandið. 

Einar Sveinbjörnsson Veðurfræðingur

Guðrún Pálína Guðmundsdóttir opnar málverkasýninguna Andlit, í Jónas Viðar Gallerýi

Laugardaginn 19.janúar kl. 14.30 opnar Guðrún Pálína Guðmundsdóttir málverkasýninguna Andlit, í Jónas Viðar Gallerýi. Sýningin stendur til og með 9.febrúar. Galleríið er staðsett í Listagilinu á jarðhæð listasafnsins og er opið á föstu- og laugardögum frá kl. 13.-18 og aðra daga eftir samkomulagi.

Guðrún Pálína er fædd og búsett á Akureyri. Hún nam myndlist í Gautaborg og í Hollandi, og kláraði framhaldsnám frá Jan van Eyck Akademie 1987. Hún hefur sýnt reglulega síðan. Hún fæst mest við andlitsmyndagerð og vinnur innsetningar í rými byggð á persónulýsingum stjörnukorta viðkomandi einstaklinga. Hún starfrækir listagalleríið Gallerí +, í Brekkugötu 35 ásamt eiginmanni sínum Joris
Rademaker. Flest verkin á sýningunni eru unnin 2008.