Angela Rawlings með fyrirlestur í Ketilhúsinu

Þriðjudaginn 30. september kl. 17 heldur Angela Rawlings fyrirlestur í Ketilhúsinu undir yfirskriftinni Wild Slumber for Industrial Ecologists (Villtar svefnfarir iðnaðarvistfræðinga). Þar mun hún meðal annars fjalla um samnefnda sýningu sem nú stendur yfir í Verksmiðjunni á Hjalteyri. Sýningin er árangur af samstarfi myndlistarmanna, rithöfunda og tónlistarmanna sem dvalið hafa í alþjóðlegri gestavinnustofu á Hjalteyri undanfarið. Ásamt Rawlings eru þau Elsa Lefebvre (Frakkland/Belgía), Gústav Geir Bollason (Ísland), Maja Jantar (Belgía) og Philip Vormwald (Frakkland/Þýskaland) þátttakendur í sýningunni. Eitt umfjöllunarefni hennar er iðnaðarvistfræði og rannsóknir á flæði efnis og orku í iðnaðarkerfum. Iðnaðarvistfræðingar rannsaka þróun á sjálfbærum og lokuðum kerfum þar sem úrgangur eins iðnaðar getur verið auðlind annars. Fyrirlesturinn fer fram á ensku en hann er öllum opinn og aðgangur er ókeypis.

Fyrirlesturinn er sá fyrsti í röð fyrirlestra sem haldnir verða á hverjum þriðjudegi í Ketilhúsinu kl. 17 í allan vetur. Fyrirlestraröðin er samvinnuverkefni Listasafnsins á Akureyri, Verkmenntaskólans á Akureyri, Háskólans á Akureyri og Myndlistaskólans á Akureyri. Á meðal fyrirlesara vetrarins eru Hlynur Helgason listfræðingur, Íris Ólöf Sigurjónsdóttir sýningarstjóri og myndlistarmennirnir Aðalsteinn Þórsson, Arna Valsdóttir, Stefán Boulter og Guðmundur Ármann Sigurjónsson.

http://listasafn.akureyri.is

https://www.facebook.com/events/1482605935344754/

Leiðarþing Menningarráðs Eyþings

-Leiðarþing-

12. október í Hlíðarbæ Hörgársveit kl. 11-16
 
Viltu taka þátt í að móta áherslur Menningarráðs Eyþings?
Hefur þú skoðun á því hvernig menningarsamningar framtíðarinnar eiga að vera?
Viltu vita hvernig hugmyndir verða að veruleika?
Ertu með hugmynd og vantar samstarfsaðila?
Þá er Leiðarþing eitthvað fyrir þig!
Dagskrá
Ávarp Geir Kristinn Aðalsteinsson formaður Eyþings

Litið um öxl
Sigrún Björk Jakobsdóttir fyrsti formaður Menningarráðs Eyþings

Menningarsamningar framtíðarinnar
Karitas Gunnarsdóttir skrifstofustjóri skrifstofu menningarmála, mennta- og menningarmálaráðuneytinu

Veruleiki hugmynda
Guðmundur Oddur Magnússon (Goddur), prófessor við Listaháskóla Íslands

Hádegisverður

 Út fyrir kassann
Pétur Halldórsson framkvæmdastjóri Barkokksmiðju Hólastiftis

Upplit - Menningarklasi uppsveita Árnessýslu
Skúli Sæland formaður Upplits

Hraðstefnumót hugmynda
                Þórgnýr Dýrfjörð

Vinnustofa
                Menningarráð Eyþings

Samantekt og lokaorð
Arnór Benónýsson formaður Menningarráðs Eyþings
 
Þingið er þátttakendum að kostnaðarlausu en skráningar óskast á netfangið [e-mail]
Nánari upplýsingar veitir Ragnheiður Jóna Ingimarsdóttir menningarfulltrúi Eyþings sími 464 9935
 
 
Ragnheiður Jóna Ingimarsdóttir
Menningarfulltrúi Eyþings
 
Strandgötu 29,
600 Akureyri
Sími: 464 9935
 
www.eything.is
 

Hlynur Hallsson sýnir í Populus tremula

Hlynur Hallsson
Rennandi vatn og fleiri ný verk
09.03. - 10.03. 2013
Populus Tremula, Kaupvangsstræti 12, 600 Akureyri

Hlynur Hallsson opnar sýninguna Rennandi vatn og fleiri ný verk í Populus tremula laugardaginn 9. mars kl. 14. Hann sýnir hér eins og nafnið gefur til kynna nokkur ný verk sem ekki hafa verið sýnd áður. Þetta er myndband, ljósmynd og spreyjaðir textar.

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur verið nokkuð iðinn við að setja upp sýningar og á síðasta ári tók hann þátt í sýningunni Lókal - Glóbal í Listasafninu á Akureyri sem Hlynur Helgason stýrði í tilefni af 150 ára afmæli Akureyrarbæjar og einnig sýningunni Sjálfstætt fólk ásamt Jónu Hlíf Halldórsdóttur á Listahátíð í Reykjavík í Hafnarhúsi Listasafns Reykjavíkur undir stjórn Jonatans Habib Engqvist. Hlynur gaf út bókina MYNDIR - BILDER - PICTURES árið 2011 með 33 ljósmynda- textaverkum. Hann hefur einnig verið sýningarstjóri fjölda sýninga eins og TEXT sem sett var upp hjá Kuckei+Kuckei í Berlín haustið 2011. Hann var einnig meðal stofnenda Verksmiðjunnar á Hjalteyri þar sem settar hafa verið upp sýningar síðustu ár. Hlynur er listrænn ráðgjafi hjá Flóru á Akureyri.
Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2006. Hann hefur nokkrum sinnum hlotið starfslaun myndlistarmanna og var bæjarlistarmaður Akureyrar árið 2005. Hlynur vinnur með aðstæður, texta, innsetningar, ljósmyndir, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, fjallganga eða verslunarleiðangur geta verið efniviður í verkum hans en einnig landmæri, samskipti fólks og viðhorf okkar. Nánari upplýsingar um Hlyn og verk hans er að finna á heimsíðunni hallsson.de og einnig á bloggsíðunni hlynur.is

Populus Tremula hefur verið starfrækt í Listagilinu á Akureyri frá árinu 2004 og hefur staðið fyrir fjölmörgum menningarviðburðum svo sem sýningum, upplestrum og tónleikum í gegnum árin. Nánari upplýsingar um Populus tremula er að finna á poptrem.blogspot.com

Sýningin verður einnig opin sunnudaginn 10. mars frá kl. 14.00-17.00. Aðeins þessi eina helgi.
Menningarráð Eyþings og Ásprent eru styrktaraðilar Populus Temula.

Hádegisheimsóknir myndlistarmanna í fyrirtæki á Akureyri

Í desember og í byrjun janúar hafa félagar í Myndlistarfélaginu farið í hádegisheimsóknir í fyrirtæki á Akureyri og kynnt félagið, Menningarráð Eyþings og eigin listsköpun. Þetta er liður í listfræðslu til almennings og kallast verkefnið "Myndlist milli mála, listfræðsla fyrir almenning" og hlaut verkefnið styrk frá Menningarráði Eyþings.
Sívaxandi eftirspurn hefur verið eftir menningaruppákomum og fræðslu sem þessari og því ánægjulegt fyrir félagsmenn Myndlistarfélagsins að fá tækifæri til að hitta starfsmenn á vinnustað með þessum hætti. Hver heimsókn tók u.þ.b.15-20 mínútur. Farið var í fyrirtæki og í stofnanir eins og á Skattstofuna, Mjólkursamsöluna, á fæðingardeild FSA, í tölvufyrirtækið Þekkingu og í Landsbankann. Þetta er tilraunarverkefni og ef vel tekst til væri jákvætt að geta þróað verkefnið og haldið því áfram.
Nemendum í skólum bæjarins var einnig boðið að koma í Sal Myndlistarfélagsins og skoða sýninguna "Aðventa" sem nemendur Myndlistaskólans sýndu þar. Vonandi geta þessi verkefni haldið áfram að vaxa og dafna og að fyrirtæki og stofnanir sjái sér hag í að auka þekkingu starfsmanna sinna um gildi menningar og lista, kynnast myndlistarmönnum og að starfsfólk fái tækifæri til að spyrja spurninga og ræða um myndlist á breiðum grunni við listamenn.

Gestavinnustofa Gilfélagins er laus í febrúarmánuði 2013 vegna forfalla

Vegna forfalla er gestavinnustofa Gilfélagins á Akureyri laus í febrúarmánuði 2013.


Húsnæði Gestavinnustofunnar er samtals um 60 m2 sem skiptist þannig:
eldhús, svefnherbergi, baðherbergi og u.þ.b. 30 m2 vinnuaðstaða.
Vinnustofan er búin nauðsynlegustu búsáhöldum, svo sem sængurfatnaði,
síma, þvottavél, þurrkara, útvarp, sjónvarpi og málaratrönum. 

Gjald fyrir dvöl í Gestavinnustofu er 30.000 krónur.

Áhugasamir hafi samband sem fyrst með tölvupósti til [e-mail]

Þorbjörg Birgisdóttir og María Jónsdóttir. Supervisors of the studio for visiting artists in Akureyri www.artistsstudio.blogspot.com

 

Íris Ólöf Sigurjónsdóttir í listamannsspjalli í Flóru

Íris Ólöf Sigurjónsdóttir
Drósir og draumar
24. nóvember  2012 - 12. janúar 2013
Sýningarspjall fimmtudaginn 10. janúar kl. 20-21.
Sýningarlok laugardaginn 12. janúar
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Fimmtudagskvöldið 10. janúar kl. 20-21 verður Íris Ólöf Sigurjónsdóttir í listamannsspjalli í Flóru í Hafnarstræti 90 á Akureyri og allir eru velkomnir.

Nú eru einnig síðustu forvöð að sjá sýningu Írisar sem nefnist „Drósir og draumar” í Flóru. Hún sýnir textílverk og skart úr hráefni úr ýmsum áttum sem lifað hefur tímana tvenna og þrenna. Gamlir efnisbútar, perlur og prjál  eru efniviður nýrra drauma og drósir koma við sögu.

Íris Ólöf Sigurjónsdóttir er textílhönnuður og textílforvörður að mennt. Menntuð í Osló og London. Hún er safnstjóri  Byggðasafnsins á Dalvík og samfara safnastarfinu vinnur hún að textílhönnun á vinnustofu sinni í Svarfaðardal þar sem hún hefur búið sl. 10 ár. Íris Ólöf hefur tekið þátt í fjölmörgum samsýningum s.s hjá Handverki og Hönnun en sýningin í Flóru  er þriðja einkasýning Írisar.

Sýningin er öllum opin á opnunartíma Flóru mánudaga til föstudaga kl. 11-13 og 16-18 og laugardaga kl. 13-16 og stendur til laugardagsins 13. janúar 2013.
Nánar um sýninguna á http://www.mynd.blog.is/blog/mynd/entry/1269247

Nánari upplýsingar veitir Íris Ólöf í síma 892 1497 og Kristín í síma 661 0168.

Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður.

Síðustu forvöð að sjá sýningu Unnars Arnar í Flóru

Unnar Örn
Brotabrot úr afrekssögu óeirðar á Íslandi: Fyrsti hluti
Fragments From the Deeds of Unrest in Iceland: Part One
15. september - 20. október 2012
Sýningarlok laugardaginn 20. október
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Nú eru síðustu forvöð að sjá sýningu Unnars Arnar J. Auðarsonar sem nefnist „Brotabrot úr afrekssögu óeirðar á Íslandi: Fyrsti hluti” í Flóru í Hafnarstræti 90 á Akureyri. Sýning er opin alla virka daga kl. 12-18 og lýkur laugardaginn 20. október og þá er opið kl. 12-16.

Á sýningunni í Flóru beinir Unnar Örn sjónum sínum að geymd upplýsinga tengdum viðspyrnu almennings og hvernig átök í sögu þjóðar er eytt úr sameiginlegu minni af ríkjandi valdhöfum.

Unnar Örn J. Auðarson stundaði nám við Myndlista- og handíðaskóla Íslands og framhaldsnám við Listaakademíuna í Malmö. Unnar Örn vinnur í ólíka miðla en verk hans eru yfirleitt hlutar úr stærri innsetningum þar sem hann vinnur á gagnrýninn hátt með umhverfi sitt, samfélagið og hlutverk listamannsins innan þess. Unnar hélt sýna fyrstu einkasýningu í verslunarmiðstöðinni Kringlunni sem hluti af Gallerí Gúlp árið 1996 og síðan þá hefur hann tekið þátt í yfir 50 einka- og samsýningum hérlendis og erlendis.

Heimasíða Unnars Arnar: http://unnarorn.net


Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður.

WATER/VATN dagskrá í Myndlistaskólanum á Akureyri með þátttöku fimm erlendra myndlistarskóla

Í liðinni viku komu 10 kennarar og nemendur frá fimm erlendum myndlistarskólum og tóku þátt í sjö daga námskeiði ásamt nemendum og kennurum í Myndlistaskólanum á Akureyri þar sem umfjöllunarefnið var VATN. Skólarnir sem tóku þátt í þessu verkefni eru Aarhus Art Academy, Turku University of Applied Sciences/Arts Academy, Novia University of Applied Sciences, Fine Arts department, Tartu Art College, Estonia og Myndlistaskólinn á Akureyri.

Hilda Jana hjá N4 kom og tók viðtöl og myndir sem sjá má hér: http://www.n4.is/tube/file/view/2871

Heimildarmyndin STEYPA sýnd í Flóru

Heimildarmyndin STEYPA eftir þau Markús Andrésson og Ragnheiði Gestsdóttur verður sýnd í Flóru fimmtudagskvöldið 11. október 2012 kl. 20
Heimildamyndin STEYPA er mynd um íslenska samtímamyndlist. Í myndinni er fylgst með sjö listamönnum um tveggja ára skeið. Þeir eru að koma undir sig fótunum heima og erlendis og tengjast hvor öðrum á ýmsan hátt. Steypa gefur innsýn í vinnuferli og viðhorf þessarar kynslóðar, sýnir hvernig hugmyndir fæðast og eru útfærðar í listaverk.

Myndin er sýnd í tilefni sýningar Unnars Arnar Auðarsonar í Flóru sem nefnist "Brotabrot úr afrekssögu óeirðar á Íslandi: Fyrsti hluti / Fragments From the Deeds of Unrest in Iceland: Part One". Ásamt Unnari fjallar STEYPA um Ásmund Ásmundsson og Katrínu Sigurðardóttur en þau sýna einmitt um þessar mundir í Listasafninu á Akureyri enda tilnefnd til Sjónlistaverðlaunanna 2012. Auk þeirra þriggja er fjallað um Gjörningaklúbbinn, Margréti H. Blöndal, Huginn Þór Arason og Gabríelu Friðriskdóttur í STEYPU.

Ásmundur hellir Pepsí í Fanta-flöskur og spyr sig „Hvað er list?“ Hann stingur upp á að það sé það sem listamaður geri. Með það til hliðsjónar er áhersla heimildamyndarinnar á það ferli sem listamennirnir ganga í gegnum áður en verk þeirra verða að veruleika. Gabríela hendir í deig og smellir á andlitið á sér, Margrét heillast af hulsum og pakkningum í Mosfellsbæ, Huginn klippir af sér hárið og lætur búa til hárkollu, Unnar stelur afleggjurum á elliheimili, Gjörningaklúbburinn endurskapar stjörnuhiminn Van Goghs úr lakkrísafgöngum, Katrín smíðar lítið hús til þess eins að henda því fram af stærra húsi. Hvað liggur að baki? Á þetta erindi við okkur hin?

STEYPA kom upphaflega út árið 2007 þegar hún ferðaðist á milli kvikmyndahátíða víða um heim, en hún var tekin á árunum 2003-06.

Myndin er með íslensku tali og enskum texta og tekur um klukkutíma í sýningu en á eftir verða umræður um myndina og um íslenska samtímalist.

STEYPA  er sýnd í Flóru í samvinnu við Kvikmyndaklúbbinn KvikYndi og Lofi Productions sem framleiðir myndina. Það er ókeypis aðgangur.

http://vimeo.com/33758581

Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Fræðsludagskrá í Sal Myndlistarfélagsins