Safngestaráð Safnasafnsins á Svalbarðsströnd

SAFNASAFNIÐ - ALÞÝÐULIST ÍSLANDS
 
Safnasafnið á Svalbarðsströnd hefur stofnað Safngestaráð, hið fyrsta sinnar tegundar á Íslandi. Því er ætlað það hlutverk að hafa jákvæð áhrif á starfsemi safnsins, vega það og meta og hugleiða verkefni sem gætu orðið því til framdráttar. Í ráðinu sitja:  Hlynur Hallsson, myndlistarmaður og formaður Sambands íslenskra myndlistarmanna, og Sigríður Ágústsdóttir, leirkerasmiður og leiðsögumaður, Akureyri; Bryndís Símonardóttir, fjölskylduráðgjafi, Háuborg í Eyjafjarðarsveit; Ingibjörg Svafa Siglaugsdóttir, hjúkrunarfræðingur og fyrrum safnstjóri í Laufási, Grenivík; Völundur Jónsson, ljósmyndari, Mógili 1, Svalbarðsströnd; Guðfinna Magnúsdóttir, vöruhönnuður og kennari við Listaháskóla Íslands og Huginn Þór Arason, myndlistarmaður og stjórnarmaður í Nýlistasafninu, Reykjavík.


SAFNGESTARÁÐ
 
Safngestaráð er skipað 7 einstaklingum, 5 búsettum á Norðurlandi eystra, 2 á höfuðborgarsvæðinu, sem eru n.k. fulltrúar fyrir gesti eða markhópa Safnasafnsins; þeir mega hvorki vera skyldir né tengdir fólki í stjórn þess. Ráðið er myndað til 3ja ára, og framlengist tíminn um 1 ár í senn. Það starfar sjálfstætt án afskipta safnstjórnar, en þróar verkefni sín í samræmi við neðangreint - og stendur til boða aðstaða til fundarhalda í safninu hvenær sem er.
 
Safngestaráð Safnasafnsins er hið fyrsta sinnar tegundar á Íslandi, einstaklingar innan þess búa yfir mikilli reynslu og menntun sem gerir þeim kleyft að sinna starfi sínu af faglegri hæfni
Ekki er leitað fyrirmynda erlendis um safngestaráð (Visitor Panel) því verksvið þeirra er of þröngt; í söfnunum eru sérfræðingar á flestum sviðum, sýningar gagnrýndar í fjölmiðlum, og því ekki mikil þörf á utanað komandi aðstoð.
 
Safngestaráð gegnir ábyrgðar- og virðingarstöðu og mun með starfi sínu, að öllum líkindum, hvetja til stofnunar nýrra ráða, og vekja athygli einstaklinga og fyrirtækja á Safnasafninu, og öðrum söfnum og menningarstofnunum þjóðarinnar um leið. Safngestaráð getur því mótað viðhorf almennings til safna í framtíðinni.

Safngestaráði er ætlað það hlutverk að hafa jákvæð áhrif á starfsemi safnsins, gagnrýna það og meta; hugleiða ný verkefni sem þarfnast hugkvæmni og eftirfylgni; koma með uppástungur um kaup á kjörgripum sem safnstjóra er ókunnugt um; og jafnvel taka þátt í umræðum um starfsstefnu safnsins á komandi árum.

Safngestaráð fær vinnumöppu, í henni er: Atriðaorðaskrá(Gátlisti); Flokkun listasafna á Íslandi eins og þau kynna sig og starfa; Hugmyndasmiðja æskunnar; Hugmyndir - Fræðsla - Miðlun; Hringferill myndlistar, 16 þátta greiningarkerfi (útdráttur); Konurnar og safnið; Lán á safngripum samkvæmt gjafabréfum, varðveislusamningum og Safnalögum; Nýmæli - Frumkvæði - Jafnrétti; Siðareglur Alþjóðaráðs Safna, ICOM (útdráttur); Sjóðir; Skipulagsskrá; Starfslýsingar; Starfsstefna 2009-2013 (endurskoðuð árlega); Söfnunarstefna; Sýningastefna; Söfn, safnvísar, setur og einstaklingar sem varðveita íslenska alþýðulist; Umsagnir og ummæli
Safngestaráð fær fréttir af starfsemi safnsins og getur leitað eftir nánari upplýsingum á skrifstofu þess.

Safngestaráð metur m.a. aðgengi inni og úti, þarfir og aðstöðu fatlaðra, merkingar, fylgitexta, orðanotkun, þýðingar, sýningar og sýningaskrár, leiðsögn og skemmtun, bókastofu, sýnileg skólaverkefni, vörulínur, veitingar og verðlag, samspil á milli sýninga og hæða, áherslur, flæði, liti og sjónlínur (sjá nánar í Atriðaorðaskrá/Gátlista).

Safngestaráð getur, ef það vill, skilgreint markhópa safnsins og aldurssamsetningu og kannað hvernig hægt sé að ná til fleiri einstaklinga og hópa, innlendra sem erlendra. Í því samhengi hugar það að félagslegri, hugmynda- og fagurfræðilegri stöðu safnsins, og hvernig megi nýta hana til laða fólk að safninu eða kynna það sem víðast
Ekki er gert ráð fyrir umræðum um hjúskap, kynhneigð, nám, starf, tekjur, trú, fötlun og veikindi (Persónuvernd).

Safngestaráð kynnir niðurstöður sínar fyrir safnstjórn, sem semur spurningarlista á grundvelli þeirra, en að auki verða skráðar hugmyndir gesta um safnið og viðbrögð þeirra við því sem það býður upp á. Listarnir verða látnir liggja frammi í safninu um sumarið og gestir beðnir um að svara þeim. Mat Safngestaráðs og niðurstöður kannana verða strax kynntar á vefsíðu, sendar fjölmiðlum, og birtar í ársskýrslu og sýningaskrá safnsins ári síðar.

Safngestaráð getur - að eigin frumkvæði - lagt fram hugmyndir um öflun viðurkenninga og styrkja fyrir t.d. erlent samstarf, listaverkakaup, upplýsinga- og tölvumál, leikfanga- og tækjakaup, viðgerðir og byggingarframkvæmdir.

Safngestaráð fær afslátt á vörum í Kaupfélagi Svalbarðseyrar (safnverslun), hátíðarkvöldverð í safninu og gjafir í þakklætisskyni fyrir vel unnin störf. Meðlimir ráðsins sem eru búsettir fyrir sunnan njóta uppihalds í Safnasafninu á  meðan þeir starfa nyrðra (Maí/Júní er hentugur tími, því að þá er búið að prufukeyra sýningarnar).

Safngestaráð endurnýjar sig sjálft, ef einhver innan þess lætur af störfum; það getur leitað ráða hjá safnstjóra um nýjan einstakling. Ef ráðið ákveður að hætta starfsemi sinni áður en samningstími rennur út, eða ef safnstjóri telur ekki þörf á því lengur, ganga öll gögn til stjórnar Safnasafnsins, sem getur myndað annað ráð á þeim grunni síðar.

Safngestaráð getur, Safnasafninu að meinalausu, og ef áhugi er fyrir því, víkkað starfssvið sitt og boðið öðrum söfnum á Norðurlandi Eystra þjónustu sína (gegn þóknun), en þá verður líklega að breyta samsetningu þess og ofangreindum ákvæðum verulega til að koma til móts við þarfir jafn margra ólíkra stofnana og þar starfa.

Viktor, Ivar og George Hollanders sem sýna í Populus Tremula

Laugardaginn 24. október kl. 14:00 verður opnuð myndlistarsýningin OPSTRAAT & RESTJES, Japonisma í Populus Tremula. Það eru feðgarnir Viktor, Ivar og George Hollanders sem sýna saman. Sýningin fjallar um endurnýtingu eða gjörnýtingu og kynnir nýja hugmyndafræði eða “public trademark”, Opstraat & Restjes.
Sýningin verður einnig opin sunnudaginn 25. október kl. 14:00 - 17:00

Evudætur í Listasafninu á Akureyri

EVUDÆTUR

TÓTA, TOBBA OG HRAFNHILDUR

Laugardaginn 24. október kl. 15 verður sýningin Evudætur opnuð í Listasafninu á Akureyri, en hér eru á ferðinni þær stöllur Þórunn Elísabet Sveinsdóttir (Tóta), Þorbjörg Halldórsdóttir (Tobba) og Hrafnhildur Arnardóttir. Þessar vinkonur unnu allar um skeið hjá Fríðu frænku þar sem gamlir hlutir ganga í endurnýjum lífdaga og andi hins liðna svífur yfir vötnum. Þær eiga einnig sameiginlegt að vinna með fundna hluti og alls konar lífræn og ólífræn efni og aðferðir.

Þórunn Elísabet Sveinsdóttir (f. 1952) hefur starfað innan leikhússins í hartnær 30 ár og getið sér gott orð fyrir búningahönnun og sviðsmyndir. Þórunn útskrifaðist frá Myndlista- og handíðaskóla Íslands í frjálsri myndlist 1982 en fljótlega eftir að námi lauk tók hún að sér verkefni fyrir leikhúsin. Meðfram fjölbreyttu og krefjandi starfi í leikhúsunum hefur Þórunn unnið að myndlist og haldið einkasýningar ásamt því að taka þátt í ýmsum samsýningum. Fyrsta einkasýning hennar var í gamla Nýlistasafninu vorið 1982. Árið 2001hélt Gerðuberg henni Sjónþing þar sem farið var yfir feril hennar að viðstöddu fjölmenni og sýndi hún þar um leið nýjustu verk sín. Tilfinning og efnismeðferð í myndlist Þórunnar hefur í öllum sínum fjölbreytileika og litadýrð lengst af verið nátengd ástríðu hennar fyrir búningum; áhugi hennar á íslenskri þjóðmenningu hefur einnig verið mikill áhrifavaldur í verkum hennar. Að undanförnu hafa ný efni og önnur sjónarhorn í verkum hennar brotið þann ramma.

Hrafnhildur Arnardóttir (f. 1969) útskrifaðist með MFA-gráðu frá School of Visual Arts í New York árið 1996, þar sem hún hefur búið og starfað allar götur síðan. Listamannsnafn hennar er Shoplifter. Í verkum sínum tekst hún á við fyrirbæri eins og hégóma, sjálfsmynd, fegurð og tísku og kemur með margvíslegum hætti inn á þráhyggju og blæti, afsprengi nútímalifnaðarhátta. Tilraunir Hrafnhildar hafa mótast af straumum alþjóðlegrar myndlistar sem og afþreyingarmenningu, tískuiðnaði, dægurlagakúltúr, leikhúsi og fjölmiðlum. Verk hennar eru samofin gjörningum á ýmsa vegu þar sem hún leikur sér oft með freistingar ofgnóttarinnar. Á undanförnum árum hefur hún unnið mikið með gervihár og náttúrulegt hár og búið til skúlptúra og veggmyndir, sem minna á klifurplöntur á húsgöflum, svo úr verður skreytikennd fegurð sem býr jafnframt yfir ógnvekjandi draugalegum áhrifum. Í verkum sínum glímir Hrafnhildur við sögu þessarar hárugu þráhyggju okkar og hvernig sköpun með hana heldur áfram að birtast í menningu samtímans þar sem tilhugsunin um „slæman hárdag“ (e. bad hair day) vokir yfir okkur eins og bölvun.

Þorbjörg Halldórsdóttir (f. 1968) útskrifaðist frá Menntaskólanum að Laugarvatni 1988. Tveimur árum síðar hélt hún á vegum skiptinemasamtakanna A.U.S til Mexíkó þar sem hún dvaldi næstu tólf mánuði og stundaði tónlistarnám og starfaði sem músiktherapisti. 1993 urðu tímamót í hennar lífi þegar hún kynntist Önnu í versluninni Fríðu frænku þar sem hún starfaði á árunum 1994-2002. Nokkru síðar var stefnan tekin norður til Akureyrar og árið 2004 opnaði hún sjálf, ásamt Guðrúnu Jónsdóttur, búðina Frúin í Hamborg. Það má segja að í gegnum búðina hafi hún þróað sína myndlist. Þorbjörg vinnur mest með innsetningar og gjörninga og þá gjarnan í samvinnu við aðra listamenn. Í Frúnni í Hamborg hannar og saumar Tobba púða, töskur, hálskraga, hárspangir, kjóla og margt fleira undir merkinu „Frúin í Ham“.

Í grein sem Sjón skrifaði í tilefni sýningarinnar segir m.a.: „Það var í svörtum flauelspúða, stungnum með samlitum glersteinum; það var í jörpum, snúnum hárlokki sem bundinn var saman með fölnandi appelsínugulum silkiborða; það var í eldhússvuntu, svo bættri með grænum, rauðum, bláum og gulum bótum að engin leið var að sjá að eitt sinn var hún hvít. Flauelið í einu horni púðans tók að hnoðrast líkt og krafsað væri í það með langri nögl. Eitt hár lokksins tók að vaxa, að spinna sig frá hinum í silkihaftinu, og reyndist hrokkið. Einn saumanna sem hélt fastri bót á vinstra brjósti svuntunnar tók að rekja sig upp, að lengjast og vinda sig niður á gólfið. Og þannig gekk á með kvisi, hvísli og hvískri uns flauelshnoðrinn, hárið staka og saumþráðurinn höfðu magnast svo að stærð og gerð – hnoðri dafnað, hár þykknað, þráður hlaðist upp – að hvert fyrir sig myndaði að lokum fullvaxna og einstaka konu.“

Sýningarstjóri er Hannes Sigurðsson. Rithöfundurinn Sjón skrifar smásögu í sýningarskrána sem er hönnuð af Kviku ehf. Sýningin stendur til 13. desember. Nánari upplýsingar veitir Hannes Sigurðsson, forstöðumaður Listasafnsins á Akureyri, í síma: 461-2610 / 899-3386. Netfang: [e-mail].

Listasafnið á Akureyri er opið alla daga nema mánudaga frá kl. 12-17. Ókeypis aðgangur í boði Akureyrarbæjar.

 
 LISTASAFNIÐ Á AKUREYRI
 AKUREYRI ART MUSEUM

Ani Baronian sýnir í Deiglunni

Ani Baronian er gestalistamaður í gestavinnustofu Gilfélagsins á Akureyri í október.

Ani sem er armenskur Bandaríkjamaður vinnur með teikningar og skúlptúra og ætlar að halda sýningu á verkum sínum í Deiglunni í Listagilinu laugardaginn 24. október kl. 15–17 og sunnudag frá kl. 14-17.

ALLIR VELKOMNIR

Hrefna Harðardóttir opnar sýningu í DaLí Gallery

Hrefna Harðardóttir opnar sýninguna DÍSIR í DaLí Gallery, Brekkugötu 9 á
Akureyri, fyrsta vetrardag laugardaginn 24. október kl. 14-17.

Undanfarin ár hefur Hrefna verið að móta í leir, myndir af fornum gyðjum
og þannig reynt að skilja formæður sínar og heiðra kvenmenningararfinn,
því sagt er; án fortíðar er engin framtíð.
Að þessu sinni hefur hún valið að ljósmynda þrettán dásamlegar nútímakonur
og gert þær að táknmyndum DÍSA. Með því vill hún sýna hvað konur geta
verið fagrar, flottar, duglegar og klárar og hve máttur þeirra er mikill.
Menn kvöddu sumar og heilsuðu vetri með blóti, bæði til goða og vætta og
ekki síst dísa og þannig kveður hún sumar og heilsar vetri á fyrsta
vetrardegi árið 2009.

Sýningin stendur til 8. nóvember og er opin laugardaga og sunnudaga kl.14-17.
Upplýsingar í síma 862-5640 og hrefnah(hjá)simnet.is

Allir velkomnir.
Bestu kveðjur
Dagrún og Lína í DaLí Gallery
s. 8957173/8697872
daligallery.blogspot.com

Íslensk samtímahönnun í Ketilhúsinu

Sýningin Íslensk samtímahönnun
Húsgögn, vöruhönnun og arkitektúr í Ketilhúsinu

Á laugardaginn klukkan 14 opnar í Ketilhúsinu á Akureyri sýningin Íslensk
samtímahönnun - Húsgögn, vöruhönnun og arkitektúr og verður við þetta
tækifæri afhent fyrsta eintak bókarinnar Íslensk samtímahönnun.  Þetta er
fyrsta bókin sem sinnar tegundar sem bregður upp yfirliti yfir störf
íslenskra hönnuða á síðustu árum.  Valin eru verk sem gefa sem
fjölbreyttasta mynd af starfi íslenskra hönnuða samtímans hvort sem það eru
snjóflóðavarnargarðarnir á Siglufirði eða barinnréttingar í Hong Kong.

 Fátt er eins lýsandi fyrir mannlegt samfélag og það umhverfi sem maðurinn
hefur mótað til daglegra athafna. Segja má að í manngerðu umhverfi birtist
spegilmynd hönnunarsögunnar; ólíkar myndir hönnunar, breytilegar eftir
tíðaranda, gildismati, ríkjandi hugmyndafræði, túlkun  og aðstæðum hverju
sinni.

Á sýningunni, sem var hluti af Listahátíð Reykjavíkur og var sett upp á
Kjarvalsstöðum í sumar, er sýnd íslensk samtímahönnun þar sem er unnið með
tengsl þriggja hönnunargreina, húsgagna- og vöruhönnun og arkitektúr sem
eiga stóran þátt í að móta manngert umhverfi með samspili sín á milli. Á
sýningunni er samhengi þeirra skoðað og hvernig þær eru samofnar mannlegri
hegðun allt frá því að eiga þátt í  að skipuleggja tímann, væta kverkarnar
eða  verja okkur fyrir náttúruhamförum. Sýnd eru gríðarstór mannvirki og
fínleg nytjahönnun sem eiga þó það sameiginlegt að tilheyra manngerðu
umhverfi og vera mótandi þáttur í því.

Sýningunni Íslensk samtímahönnun er ætlað að vera spegill þess sem telja má
á einn eða annan hátt gæði í íslenskri hönnun undanfarin ár. Markmiðið er að
árétta gildi góðrar hönnunar og öflugs hugvits fyrir mannlegt samfélag -
verðmæti  til að virkja  til framtíðar.

Sýnd eru verk frá um 20 hönnuðum sem eru valin með það í huga að eiga erindi
ytra til frekari kynningar, sölu eða framleiðslu en frá Akureyri fer
sýningin til Norðurlandanna og svo alla leið til Kína þar sem hún verður
sett upp á Expó í Shanghai á næsta ári.

Samhliða hönnunarsýningunni er kynning á verkum ungra, efnilegra hönnuða í
samvinnu við Hönnunarsjóð Auroru.

Sýningarstjóri er Elísabet V. Ingvarsdóttir og mun hún leiðsegja um
sýninguna sunnudaginn 24. október klukkan 13.30.
Sýningin er samstarf Akureyrarstofu, Menningarmiðstöðvarinnar í Listagili og
Hönnunarmiðstöðvar Íslands og Listahátíðar í Reykjavík.

Nánari upplýsingar veita Halla Helgadóttir framkvæmdastjóri
Hönnunarmiðstöðvar Íslands í síma 699 3600 og Elísabet V. Ingvarsdóttir
sýningarstjóri í síma  860 0830

Styrktarsjóður Svavars Guðnasonar og Ástu Eiríksdóttur óskar eftir umsóknum

STYRKTARSJÓÐUR
Svavars Guðnasonar listmálara
og Ástu Eiríksdóttur


Styrktarsjóður Svavars Guðnasonar og Ástu Eiríksdóttur óskar
hér með eftir umsóknum um styrk úr sjóðnum.
Styrkirnir eru tveir að upphæð kr. 500.000 hvor
og veitist tveimur ungum, efnilegum myndlistarmönnum.

Eftirfarandi upplýsingar og gögn þurfa að fylgja umsóknum:
Nafn umsækjanda, kennitala, heimilisfang og símanúmer,
þrjár til fimm ljósmyndir, litskyggnur eða stafrænar myndir af verkum
umsækjanda ásamt ítarlegum náms- og listferli.

Umsóknir merktar: Styrktarsjóður Svavars Guðnasonar og
Ástu Eiríksdóttur, sendist fyrir 4. nóvember 2009 til
Listasafns Íslands, Laufásvegi 12, 101 Reykjavík.

Í dómnefnd sitja:
Halldór Björn Runólfsson, safnstjóri Listasafns Íslands
Þuríður Sigurðardóttir, myndlistarmaður, SÍM
Hulda Stefánsdóttir, prófessor, LHÍ

Opnun í GalleríBOXi á laugardag

HVAÐ LEYNIST Í SKÚMASKOTUM

24.10.09 klukkan 16:00
Myndlistarsýning félagsmanna Myndlistarfélagsins

Allir velkomnir!

Léttar veitingar
Aðeins opið þessa einu helgi

25.10.09 – opið frá kl. 14:00-17:00

 

GalleríBOX

Salur Myndlistarfélagsins

Kaupvangsstræti 10

600 Akureyri

Kristján Pétur sýnir í Hafnarfirði

Laugardaginn 17.10. kl. 14-17 opnar Kristján Pétur Sigurðsson sýninguna „Þagnarangar úr Brandenburgarkonsert nr. 5 eftir J.S.Bach“ í Gullsmíða og Skartgripaverslun Fríðu Strandgötu 43 í Hafnarfirði. Verkin eru unnin úr krossviði, kopar og maghóní.

Sýningin verður síðan opin í þrjár vikur á opnunartíma verslunarinnar.
Það væri mér sönn ánægja að þú og þínir litu inn við opnun.

Kristján Pétur Sigurðsson

Frestur til að sækja um starfslaun listamanna að renna út

Þeir sem ætla að sækja um starfslaun eru beðnir um að ganga frá sinni umsókn fyrr en seinna til að lenda ekki í mesta álaginu þegar nær dregur.
Athugið að eingöngu er hægt að sækja umsóknareyðublað á heimsíðu sjóðsins www.listamannalaun.is
 
Munið að frestur til að sækja um starfslaun listamanna sem verður úthlutað árið 2010 rennur út mánudaginn 19. október n.k. á miðnætti.
Umsóknargögnum skal skilað rafrænt, hægt  er að nálgast þau á vefsíðunni www.listamannalaun.is.

 

Starfslaun listamanna

Hér með eru auglýst til umsóknar starfslaun listamanna sem úthlutað verður árið 2010, í samræmi við ákvæði laga nr. 57/2009 með áorðnum breytingum.
Starfslaunin eru veitt úr sex sjóðum, þ.e.:
 
1. Launasjóði hönnuða,
2. Launasjóði myndlistarmanna,
3. Launasjóði rithöfunda,
4. Launasjóði sviðslistafólks,
5. Launasjóði tónlistarflytjenda,
6. Launasjóði tónskálda
 
Vakin er sérstök athygli á að umsækjendum er gert að sækja um á rafrænu formi á vef listamannalauna á vefslóðinni www.listamannalaun.is fram til  mánudagsins  19. október 2009.  Þegar komið er inn í umsókn er aðgangur veittur á kennitölu umsækjanda (ekki kennitölu félags eða samtaka) og verður lykilorð sent viðkomandi á netfang sem hann gefur upp við nýskráningu.

Lykilorðinu má breyta eftir innskráningu með því að opna Mínar stillingar. Umsækjendur skrá sig inn með kennitölu og lykilorði og velja Stjórn listamannalauna undir flipanum Umsóknir. Þar eru umsóknareyðublöðin. Svæði merkt rauðri stjörnu verður að fylla út.

Fylgigögnum með umsókn sem ekki er hægt að senda rafrænt skulu berast Skrifstofu Stjórnar listamannalauna, Hallveigarstöðum, Túngötu 14, 101 Reykjavík fyrir kl. 17:00 mánudaginn 19.október 2009.

Með umsókn skal fylgja greinargerð um verkefni það sem liggur til grundvallar umsókninni ásamt upplýsingum um hve langan starfstíma er sótt um og rökstuðningi fyrir tímalengd.  Jafnframt skulu fylgja upplýsingar um náms- og starfsferil, verðlaun og viðurkenningar. Þessir þættir  skulu  að  jafnaði  liggja  til  grundvallar  ákvörðun  um úthlutun starfslauna. 

Athugið að hafi umsækjandi áður hlotið starfslaun verður umsókn hans því aðeins tekin til umfjöllunar að hann hafi skilað Stjórn listamannalauna skýrslu um störf sín í samræmi við ákvæði 4. gr. laga um listamannalaun nr. 57/2009 með áorðnum breytingum.

Nánari upplýsingar og leiðbeiningar fást á vef Stjórnar listamannalauna www.listamannalaun.is eða á skrifstofunni í síma 562 6388.

Umsóknarfrestur rennur út mánudaginn  19. október 2009.

Stjórn listamannalauna 16. ágúst 2009

Möguleg fjármögnun til menningarstarfs

Möguleg fjármögnun til menningarstarfs
Kynning á Akureyri

Skipuleggjandi: Norræna upplýsingaskrifstofan á Akureyri

Flestir þeir sem vinna með menningartengd verkefni þurfa að sækja um styrki til fjármögnunar þeirra.  Til hvaða verkefna, frá hverjum og hvernig er hægt að fá styrki?

Á kynningunni verður lögð sérstök áhersla á Norræna menningarsjóðinn.  Markmið sjóðsins er að efla norrænt menningarsamstarf og er starfssviðið breitt, nær til lista- og menningarsviðsins, jafnt fagfólks sem leikmanna.

Einnig verður farið verður farið yfir aðra sjóði tengda norrænu menningarsamstarfi

Dagskrá

13.00 – 16:00 
Kynntar verða nýjar áherslur Norræna menningarsjóðsins sem taka gildi
                        1. janúar 2010
                       
Kynnt verða sérstök verkefni Norræna menningarsjóðsins
                       
                        Umsóknareyðublað sjóðsins verður skoðað og við förum yfir mikilvæg atriði varðandi umsóknir til sjóðsins.

                        Umsækjandi segir frá reynslu sinni af umsóknarferlinu.

                        Aðrir norrænir sjóðir kynntir.
                       
                        Kaffi, spurningar og umræður

Um kynningu sjá: Stefán Baldursson óperustjóri og stjórnarmeðlimur Norræna menningarsjóðsins, María Jónsdóttir forstöðumaður Norrænu upplýsingaskrifstofunnar og George Hollanders listamaður.                 

Tími og staður

Kynningin verður haldin í Ketilhúsinu á Akureyri föstud. 16. okt. 2009 kl. 13:00 – 16:00 og er þátttakendum að kostnaðarlausu.

Skráningar í síðasta lagi  13. okt. 2009, kl. 12:00  hjá Maríu Jónsdóttur Norrænu upplýsingaskrifstofunni.   Tölvupóstfang [e-mail].  Heimasíða skrifstofunnar er www.akmennt.is/nu

María Jónsdóttir


Forstöðumaður Norrænu upplýsingaskrifstofunnar


Leder Nordisk informationkontor 


Netfang/e-post: [e-mail]


hjemmeside: www.akmennt.is/nu



Norræna upplýsingaskrifstofan/Nordisk informationkontor


Kaupvangsstræti 23


600 Akureyri


Island.


Sími: 462 7000

Fax: [phone]

Aðalheiður S. Eysteinsdóttir opnar sýningu í Kunstraum Wohnraum

AÐALHEIÐUR S. EYSTEINSDÓTTIR 
RÉTTARDAGUR 50. SÝNINGA RÖÐ
04.10. - 06.12.2009 

Opnun sunnudaginn 4. október 2009, klukkan 11-13
Eröffnung am Sonntag 4. Oktober 2009, 11-13 Uhr   
Preview on Sunday October 4th.  2009, at 11-13

Opið samkvæmt samkomulagi • Geöffnet nach Vereinbarung • Open on appointment     

KUNSTRAUM WOHNRAUM             
Hlynur Hallsson • Kristín Kjartansdóttir     
Ásabyggð 2 • IS-600 Akureyri •  [phone] 
hlynur(hjá)gmx.net • www.hallsson.de 

Sunnudaginn 4. október 2009 klukkan 11-13 opnar Aðalheiður S. Eysteinsdóttir sýninguna “Réttardagur 50 sýninga röð” í Kunstraum Wohnraum á Akureyri.

Sýningin er svipmynd af fjölskyldu, sláturgerð og vangaveltur um líðandi stund.

Fyrir rúmu ári lagði Aðalheiður af stað með verkefni sem nefnist "Réttardagur 50 sýninga röð". Settar verða upp 50 ólíkar sýningar víða um heim, á tímabilinu júní 2008 til júní 2013. Sýningarnar fjalla allar á einn eða annan hátt um þá menningu sem skapast um og frá sauðkindinni.

Næstu sýningar verða í Stuttgart, London, Aðventa í Freyjulundi og Berlín.

Myndir af verkum Aðalheiðar og upplýsingar eru á síðunni www.freyjulundur.is

Nánari upplýsingar veitir Aðalheiður í síma 865 5091 og í adalheidur(hjá)freyjulundur.is

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Aðalheiðar S. Eysteinsdóttur stendur til 6. desember 2009 og er opin eftir samkomulagi og hægt er að hringja í síma 462 3744.

Nánari upplýsingar um Kunstraum Wohnraum er að finna hér.

Sýningu Guðbjargar Ringsted í Grafíksafni Íslands lýkur um helgina

Nú um helgina lýkur myndlistasýningu Guðbjargar Ringsted í Grafíksafni Íslands sem staðið hefur yfir síðan 19. sept. Þar sýnir hún 12 akrýlmálverk  sem eru unnin á þessu ári og því síðasta og vísar myndefnið í munstur af íslenska kvenbúningnum. Þannig verða verkin óður til þeirra kvenna sem unnu og vinna við gamla, íslenska handverkið. Þetta er 17. einkasýning Guðbjargar en hún er félagi í SÍM, Íslenskri grafík og Myndlistarfélaginu. Sýningin er opin frá kl. 14:00 til kl. 18:00 frá fimmtudeginum 1. okt. til sunnudagsins 4. okt. og verður Guðbjörg yfir sýningunni alla helgina.

Allir hjartanlega velkomnir!

 

Grafíksafn Íslands

Tryggvagötu 17

101 Reykjavík

Bryndís Kondrup opnar sýningu á Café Karólínu

 

Bryndís Kondrup

Staðsetningar

03.10.09 - 06.11.09

 

Café Karólína // Kaupvangsstræti 23 // IS 600 Akureyri // 4612755

 

Bryndís Kondrup opnar sýninguna “Staðsetningar” á Café Karólínu laugardaginn 3. október klukkan 15.

 

Sýningin Staðsetningar samanstendur af málverkum, landakortum og trjágreinum.

Þetta eru hugleiðingar um staði og staðsetningar, hvar erum við stödd í tíma og rúmi eða hvar vildum við vera stödd?

 

Bryndís Kondrup er menntuð við Myndlista- og handíðaskóla Íslands, Skolen for Brugskunst og myndlistadeild Dansk Lærerhöjskole í Kaupmannahöfn, listfræði við Háskóla Íslands og Listaháskóla Íslands.

Bryndís hefur haldið hátt á annan tug einkasýninga og tekið þátt í fjölda samsýninga hér á landi og erlendis.

  

Meðfylgjandi mynd er af einu verka Bryndísar.

 

Nánari upplýsingar veitir Bryndís í síma 866 7754 eða tölvupósti: [e-mail]

 

Næstu sýningar á Café Karólínu:

07.11.09 - 04.12.09                   Bergþór Morthens                 

05.12.09 - 01.01.10                   Sveinbjörg Ásgeirsdóttir

Gestavinnustofur á Norðurlöndunum og í Eystrasaltslöndunum

Dvalarsetrin á Norðurlöndunum og í Eystrasaltslöndunum bjóða vinnustofur fyrir listamenn.

Norræn-Eystrasalts ferða-og dvalarstyrkjaáætlunin fyrir menningu hefur á þremur árum styrkt 22 dvalarsetur fyrir listamenn. Stjórnendur dvalarsetra sem hafa fengið styrk hittast um þessar mundir í Riga til að ræða eigin reynslu og skiptast á skoðunum.

"Dvalarsetrin eru mikilvæg auðlind fyrir listamannasamfélagið á okkar slóðum. Þau gefa listamönnum færi á að starfa með listamönnum frá öðrum löndum og sækja innblástur í verk sín af svæðinu. Við erum ánægð með og stolt af því að geta styrkt dvalarsetur á svo stóru svæði - frá Grænlandi til Lettlands", segir Ragnheiður Tryggvadóttir formaður sérfræðingahópsins fyrir dvalarsetrin.

Norræn-Eystrasalts ferða-og dvalarstyrkjaáætlunin fyrir menningu veitir dvalarsetrum á Norðurlöndunum og í Eystrasaltslöndunum styrk sem stendur straum af kostnaði við dvöl listamanna og fagfólks á sviði menningarmála. Dvalarsetrin velja sjálf gesti sína, eina skilyrðið er að þeir séu með fasta búsetu á Norðurlöndunum eða í Eystrasaltslöndunum.
Dvalarsetur er hljóta styrk eru valin af fjögurra manna sérfræðingahópi. Árið 2009 fengu dvalarsetrin samanlagt 320 222 evrur í styrk.

Næst verður hægt að sækja um dvalarsetursstyrk árið 2010. Þá geta dvalarsetur staðsett á Norðulöndunum og í Eystrasaltslöndunum sótt um styrk til þriggja ára. Norræna menningargáttin sér um stjórnsýslu fyrir Norræn-Eystrasalts ferða-og dvalarstyrkjaáætlunina fyrir menningu.


Frekari upplýsingar:

Norræna menningargáttin : Mira Banerjee, upplýsingafulltrúi, mb@kknord. org,
[phone] www.kulturkontaktnord.org

Upplýsingaskrifstofa Norrænu ráðherranefndarinnar í Lettlandi : Ginta Tropa, Culture Adviser, [e-mail], phone: [phone], www.norden.lv 

Kulturkontakt Nord
Sveaborg B 28
00190 Helsingfors
Finland

www.kulturkontaktnord.org

 

Samúel Jóhannsson opnar myndlistarsýningu í galleríBOXi

Listamaðurinn Samúel Jóhannsson opnar myndlistarsýningu sína í galleríBOXi - Sal Myndlistarfélagsins laugardaginn 26. september kl. 14.
Sýningin stendur til 18. október.
Allir velkomnir og léttar veitingar í boði á opnun.

Save us! - Bjargið okkur! í DaLí Gallery

Save us! - Bjargið okkur!

Ef ofurhetjur væru til í alvörunni væri heimurinn kannski betri staður.
Ofurhetjur svara ávallt kallinu og hlaupa til þegar hætta steðjar að. Þær
eru hugrakkar fram í fingurgóma og nýta krafta sína til góðs. En við höfum
engar ofurhetjur eins og í bíómyndunum. Við höfum bara venjulegt fólk og
það verður víst að duga. En mikið væri núskemmtilegt ef…

Save us! - Bjargið okkur! - Friðlaugur Jónsson opnar sýningu í DaLí
Gallery laugardag 26. september kl. 14-17. Save us! - Bjargið okkur! er
fyrsta einkasýning Friðlaugs sem er grafískur hönnuður. Verk Friðlaugs eru
prentuð á segl og bylgjupappa og eru bæði stafræn málverk og leturverk.
Sýningin stendur til 11. október og allir velkomnir.

DaLí Gallery
Opið lau-sun kl.14-17
Brekkugata 9, Akureyri
Dagrún Matthíasdóttir og Sigurlín M. Grétarsdóttir
s.8957173 og 8697872
[e-mail]
daligallery.blogspot.com

Friðlaugur Jónsson s.8681343
[e-mail]
www.frilli7.com

Gestavinnustofa Birgis Andréssonar laus til umsóknar

Skaftfell – miðstöð myndlistar á Austurlandi auglýsir eftir umsóknum um dvöl á Hóli – gestavinnustofu Birgis Andréssonar á árinu 2010.
Umsóknarfrestur rennur úr 1. október, póststimpill gildir.
Vinsamlegast farið á heimasíðu Skaftfells; http://skaftfell.is til að nálgast frekari upplýsingar um vinnustofuna og umsóknareiðublað.

Samkeppnin meðal myndlistarmanna um lýsingu í forsal Menningarhússins Hofs

Fasteignir Akureyrarbæjar efna til samkeppni um lýsingu í forsal Menningarhússins Hofs á Akureyri.

Verkið er ljós eða ljósgjafar til uppsetningar í forsal hússins. Samkeppnin er haldin til þess að laða fram lausn á lýsingu sem sameinar í senn listræna útfærslu á rýminu og notagildi og áhersla er lögð á að hugmyndir og keppnistillögur undirstriki arkitektúr hússins og aðra umhverfisþætti.

Gera má ráð fyrir fjölbreyttri notkun á Forsalnum en hann verður m.a. nýttur til móttökuathafna og sýningarhalds. Verkefnið getur hentað vel til samvinnu milli myndlistarmanna og hönnuða úr ólíkum greinum og eru væntanlegir þátttakendur hvattir til þess að huga að möguleikum í þá veru.

Samkeppnin er tvískipt:

A. Opin hugmyndasamkeppni

Þeir myndlistarmenn sem taka þátt í samkeppninni senda inn hugmynd að hönnun lýsingar í forsalnum. Myndræn framsetning hugmyndar þarf að rúmast á tveimur blöðum af stærðinni A4, en einnig á að fylgja með stutt greinargerð á einu A4 blaði um hugmyndina að baki verkinu, efnisval og uppbyggingu. Engin frekari gögn eiga að fylgja tillögunni á þessu stigi.

Hugmyndinni skal skila inn undir dulnefni, eins og nánar er lýst í skilmálum keppninnar. Hugmyndinni þarf að skila til Fasteigna Akureyrar, Geislagötu 9, 600 Akureyri fyrir kl. 16:00 föstudaginn 16. október 2009.

B. Lokuð samkeppni um hönnun og uppsetningu ljósa eða ljósgjafa

Þeir myndlistarmenn sem komast í þennan síðari hluta samkeppninnar eru beðnir um að útfæra hugmynd sína og koma með tillögu að verki. Þeir þurfa að skila tæknilegri lýsingu, gera nauðsynlega uppdrætti og lagnateikningar að verkinu og greina frá stærð þess og umfangi auk nákvæmrar staðsetningar á ljósum eða ljósgjöfum. Sundurliðun á kostnaði vegna uppsetningar verksins skal fylgja tillögunni. Þátttakendur í lokaða hluta samkeppninnar fá greiddar kr. 250.000.- hver, fyrir tillögugerðina. Þessi hluti samkeppninnar tekur tvo mánuði og er miðað við að tillögu að verkunum verði skilað til Akureyrarstofu, Geislagötu 9, 600 Akureyri, þann 8. janúar 2010.

Samið verður við höfund eða höfunda þeirrar tillögu sem verður hlutskörpust að mati dómnefndar um gerð og uppsetningu verksins. Byggingarnefnd ákveður að lokum hvort og þá hvaða tillaga verður keypt.

Samkeppnin fer fram samkvæmt samkeppnisreglum Sambands íslenskra myndlistarmanna (SÍM).

Nafnleyndar keppenda er gætt við mat dómnefnda á innsendum hugmyndum og tillögum.

Nánari upplýsingar, samkeppnislýsing, myndir og teikningar eru að finna hér: http://www.menningarhus.is/samkeppni

Lista-og fræðimannsíbúðin á Húsabakka í Svarfaðardal er laus

Myndlistarmenn!!
Þurfið þið næði og innblástur fjarri heimsins glaumi?  Lista-og fræðimannsíbúðin á Húsabakka í Svarfaðardal er laus. Á Náttúrusetrinu á Húsabakka er einnig kjörin aðstaða fyrir námskeið, ráðstefnur og vinnubúðir fyrir stærri og smærri hópa í æpandi fegurð íslenskrar náttúru.  

"... og fegurri dal getur naumast á þessu landi. Ber það einkum til að fjöllunum er þar skipað niður af fágætri list, eða því líkt sem snillingar hafi verið þar að verki, og á rennur eftir dalnum, sem fellur með sama listrænum hætti inn í landslagið. En auk þess er þarna  að finna hina dásamlegustu liti, rauða bláa og græna, sem skipta landslaginu mjög skemmtilega á milli sín (…) Það er eins og allt í þessum einkennilega dal hafi verið sett á svið fyrir listmálara og var ég mjög heillaður af öllu sem fyrir öllu, sem fyrir augu bar.”
Þannig fórust meistara Ásgrími Jónssyni orð um Skíðadal í æviminningum sínum.

Nánari upplýsingar á http://www.dalvik.is/natturusetrid
eða í síma 8618884.
Hjörleifur Hjartarson