Eyfirski safnadagurinn 1. maí

 

Eyfirski safnadagurinn nýtur mikilla vinsælda

Vertu gestur í heimabyggð!

Söfnin í Eyjafirði opna dyr sínar fyrir gestum og gangandi laugardaginn 1. maí. Hin síðari ár hefur þessi dagur notið mikilla vinsælda og hafa fjölskyldur og aðrir gestir nýtt tækifærið til að kynnast söfnunum á Akureyri og nágrenni, fræðast, skemmta sér og hitta mann og annan. Markmiðið með deginum er að vekja athygli á fjölbreyttum, skemmtilegum og áhugaverðum söfnum í Eyjafirði. Þau munu þennan dag kynna starfsemi sína og að þessu sinni verður megin áherslan á hús. Af því tilefni verður leiðsögn um Kirkjuhvol, húsnæði Minjasafnsins á Akureyri, spjall um húsvernd og húsakönnun auk þess sem gengið verður með leiðsögn frá Minjasafninu í Friðbjarnarhús og Gamla spítala. Á Byggðasafninu Hvoli á Dalvík verður fjallað um hús og jarðskjalfta. Í Gamla bænum Laufási verður örsýning á fatnaði í anda hússins, frá u.þ.b. 1900 til 1930 Á Síldarminjasafni Íslands á Siglufirði verða öll þrjú safnahúsin opin auk þess sem stýrishús og lúkar Týs verður opið gestum og gangandi í fyrsta sinn, byggingariðnaður á liðinni öld verður kynntur á Iðnaðarsafninu og á Safnasafninu verður, auk fjölda sýninga, gjörningur Önnu Hallin og Olgu Bergmann. Auk þess bjóða söfnin uppá margt annað áhugavert þar má til dæmis nefna flug, kveðskap, leiðsögn, myndskreytingar og fyrirlestra.

 

Fjölbreytt safnaflóra
Eftirfarandi söfn verða opin frá 11-17 og aðgangur er ókeypis: Davíðshús, Flugsafn Íslands, Friðbjarnarhús, Gamli spítalinn, Iðnaðarsafnið á Akureyri, Minjasafnið á Akureyri, Nonnahús, Sigurhæðir, Byggðasafnið Hvoll á Dalvík, Gamli bærinn Laufás, Holt – hús Öldu Halldórsdóttur í Hrísey, Hús hákarla-Jörundar í Hrísey, Náttúrugripasafn Ólafsfjarðar, Síldarminjasafn Íslands á Siglufirði, Smámunasafn Sverris Hermannssonar, Útgerðarminjasafnið á Grenivík og Þjóðlagasetur sr. Bjarna Þorsteinssonar á Siglufirði. Safnasafnið verður opið frá 14-18.

 

Safnarútur
Safnarúta 1: Frá Upplýsingamiðstöð ferðamanna, Hafnarstræti 82, kl. 11

Fer á Smámunasafn Sverris Hermannssonar. Heimkoma um 13.30.

Safnarúta 2: Frá Upplýsingamiðstöð ferðamanna, Hafnarstræti 82, kl. 13.30.

Fer á Útgerðarminjasafnið á Grenivík og Gamla bæinn Laufás. Leiðsögumaður í ferðinni er Björn Ingólfsson. Heimkoma um 17.30.

Safnastrætó : Frá Nætursölunni kl. 13, 14, 15 og 16 á milli safnanna á Akureyri.

 

Verkefnið er afrakstur samstarfs safnafólks í Eyjafirði sem hefur unnið ötullega að því að styrkja og kynna safnastarf á Akureyri og í nágrenni. Í ár verður eyfirski safnadagurinn haldinn með pompi og prakt í fjórða sinn!

 

Dagskrá eyfirska safnadagsins í heild sinni má finna á slóðinni www.sofn.is

 

Tengiliðir: Arndís Bergsdóttir, Iðnaðarsafninu, s: 462 3600 & 699 0870 og Kristín Sóley Björnsdóttir, Minjasafninu á Akureyri, 846-5338.

Opinn fundur um stefnu í menningarmálum á Akureyri

Myndlistafélagið boðar til fundar með fulltrúum framboðanna til sveitastjórnarkosninga á Akureyri 2010, í Deiglunni miðvikudaginn 28. apríl kl. 20:00.

Hver er stefnan í menningarmálum?
Á að selja Ketilhúsið?
Er 50% niðurskurður á starfslaunum bæjarlistamanns réttlætanlegur?
Hvenær fer Listasafnið á efri hæðina?
Hver er heildarkostnaður við byggingu Hofs?

Fundarstjóri: Birgir Guðmundsson, stjórnmálafræðingur

ALLIR SEM LÁTA SIG GILIÐ OG MENNINGU VARÐA ERU HVATTIR TIL AÐ MÆTA

Stjórn Myndlistafélagsins

13 nýjar sýningar í Safnasafninu

Á Eyfirskum safnadegi, laugardaginn 1. maí kl. 14.00, verða opnaðar 13 nýjar sýningar í Safnasafninu á Svalbarðsströnd

Á bílastæði verður afhjúpuð bifreið sem 5 félagar í Geðlist, Akureyri, hafa umbreytt og kynna undir yfirskriftinni: Inn og út um gluggann. Þessi framsetning er liður í dagskrá hátíðarinnar Listar án landamæra

Í Austursal er haldið upp á 80 ára afmæli Sólheima í Grímsnesi með fjölbreyttri sýningu, sem er framlag til Listar án landamæra og viðleitni safnsins til að halda tengslum við sérstæða listsköpun

Í Miðrými er nýstárleg safnkynning þar sem blandað er saman framsækinni nútímalist, alþýðulist, vöruhönnun, handverki, leikföngum, minnjagripum o.fl.

Í Brúðusafni er endurgerð grunnsýning með þjóðbúningabrúðum, brúðuhúsi, leikföngum og fatnaði

Í Veitingasal eru regnbogamyndir eftir börn í Leikskólanum Álfaborg, Svalbarðseyri, og leikföng sem í sólskini mynda regnboga og upplýsta litafleti

Í Vestursal er samsýning á listaverkum eftir Önnu Hallin og Olgu Bergmann,  Reykjavík. Þær fremja gjörning í garði safnsins á opnunardegi kl. 15.00.

Í Svalbarðsstrandarstofu er haldið upp á aldarafmæli Ungmennafélagsins Æskunnar með sýningu á eldri og yngri gögnum, og er sýningin afrakstur af umfangsmikilli heimildaleit, yfirlestri og frumrannsóknum - sem bíða frekari umfjöllunar og úrvinnslu

Í Verslun Ásgeirs G. Gunnlaugssonar & Co er kynning á útsaumi Þórveigar Sigurðardóttur frá Sleitustöðum, Skagafirði, einnig á öskupokum í eigu safnsins, keyptum úr dánarbúi Halldórs Hansen barnalæknis og tónlistarunnanda, Reykjavík, útsaumaðir og málaðir af móður hans á fyrsta fjórðungi 20. aldar 

Í Bókastofu er safnsýning á málverkum eftir  Jón Ólafsson, Reykjavík, pappaskúlptúrum eftir Söru Vilbergsdóttur, Reykjavík, og sérstæðu skópari eftir Atla Viðar Engilbertsson, Akureyri

Í Langasal er sýning á tálguverkum o.fl. eftir Hálfdán Ármann Björnsson, Hlégarði í Aðaldal, máluðum steinum eftir ekkju hans, Bergljótu Benediktsdóttur, og klippimyndum eftir ömmu hans, Þóreyju Jónsdóttur

Í Norðursölum eru 3 einkasýningar, þrívíð verk eftir Þór Vigfússon, Djúpavogi, ljósmyndir af fossum eftir Rúrí, Reykjavík, og innsetning eftir Níels Hafstein, Þinghúsinu, Svalbarðsströnd

Styttur Ragnars Bjarnasonar taka svo á móti gestum á pöllunum fyrir utan eins og undanfarin ár. Unnið er að viðgerð þeirra og sjá gestir þess glögg merki

Þann 11. júlí, á Íslenskum safnadegi, verða opnaðar 2 nýjar sýningar í Norðursölum, a.v. á 80 teikningum og grafíkmyndum eftir 43 innlenda og erlenda höfunda, og h.v. á fjölfeldinu Listveislu 1, með verkum eftir 23 listakonur í Eyjafirði og á höfuðborgarsvæðinu. Listveisla 1 er gerð að frumkvæði safnsins, styrkt af Menningarsjóði kvenna (Hlaðvarpanum), Menningarráði Eyþings og Rarik

Safnasafnið er opið daglega frá 14.00 - 17.00 í maí, en 10.00 - 18.00 frá byrjun júní fram á haust, sjá nánar á www.safnasafnid.is, en þar eru einnig upplýsingar um inngangseyri, tilboð, veitingar, salaleigu, verslun, verð á íbúð, innra starf safnsins, kort og uppdrættir. Sýningaskráin verður gefin út í júní og færð inn á vefsíðu um leið.

Stjórn Myndlistarfélagsins mótmælir 50% niðurskurði Akureyrarbæjar á starfslaunum listamanna

Á erfiðum tímum sem þessum er menningin mikilvægur þáttur í uppbyggingu þess samfélags sem við viljum skapa. Hún er tæki sem við getum notað til breytinga og vaxtar. Fyrir 20 árum síðan fór hópur áhugafólks um menningu af stað með framsæknar hugmyndir og nýja sókn. Listagilið varð til. Þar var áður mikill iðnrekstur á vegum Kaupfélags Eyfirðinga sem hafði flutt starfsemi sína. Sennilega er þetta eitt mesta framfaraskref í menningarmálum Akureyrarbæjar. Hugmyndir spruttu úr grasrótinni og urðu að veruleika með dyggri aðstoð bæjaryfirvalda. Allir vildu verkefninu vel og lögðu fjölmargir fram krafta sína og byggðu upp Gilið. Síðan hefur margt runnið til sjávar og er nú öflug listastarfsemi í Listagilinu.

En til þess að listin geti þjónað hlutverki sínu í okkar samfélagi sem uppspretta nýrra og frumlegra hugmynda, þarf hún frelsi til að þróast. List á ekki bara að veita ánægju, og vekja aðdáun, það er einnig hlutverk hennar að vera ögrandi, spyrja spurninga, koma á óvart og benda á það sem við hefðum annars ekki komið auga á, eða viljum jafnvel ekki koma auga á. Grundvöllur nýsköpunar og öflugs listalífs er að sem flestir taki þátt í menningarlífinu. Listin á stóran þátt í því að gera bæjarlífið spennandi, áhugavert og skemmtilegt.

Mikilvægt er að styrkveitingar bæjarins til listalífsins taki mið af því að mörkin milli listforma og ólíkra menningarheima eru í sífelldri endurskoðun. Við teljum það lykilatriði og hlutverk bæjaryfirvalda í menningarlífi að vera í góðum tengslum við grasrótina og þá sem stunda hefðbundnari listsköpun. Auk þess að styðja verkefni sem hafa sannað gildi sitt og fundið sinn farveg, þarf bærinn að hlúa að grasrótar- og tilraunastarfsemi, sem oft er vísirinn að því sem koma skal. Til þess að listalíf bæjarins geti blómstrað þarf einnig að vera fyrir hendi hentug vinnu- og sýningaraðstaða á viðráðanlegum kjörum fyrir yngri sem eldri listamenn. Þar þjónar Gilið mikilsverðu hlutverki sem staður viðburða og sköpunar.

Stjórn Myndlistarfélagsins lýsir yfir áhyggjum sínum vegna skerðingar Akureyrarbæjar á starfslaunum listamanna og öðrum styrkjum til menningarmála og listaverkakaupa. Við teljum brýnt á tímum sem þessum að efla frumkvæði og sköpunarkraft með öllum tiltækum ráðum.  Þá er mjög athyglisvert  að skoða sáttmála meirihlutaflokkana í ljósi niðurskurðarins.

Leiðarljós meirihlutaflokkanna í menningarmálum er menningarstefna sem gildir til ársins 2008. Markmiðið er að Akureyri verði fyrirmynd annarra sveitarfélaga í menningarmálum með stuðningi ríkisvaldsins, atvinnumennska listamanna verði efld og fjölbreytni í menningar- og listastarfsemi aukin. Vilji er til að tryggja jafnan aðgang íbúa að menningarstarfsemi og sérstök áhersla lögð á þátttöku barna. Sérstök verkefni á kjörtímabilinu eru:

• Við endurnýjun samnings við ríkið um menningarmál frá áramótum 2006 – 2007  verður lögð áhersla á aukin framlög ríkisins m.a. vegna reksturs menningarhúss og Gásaverkefnisins auk Sinfóníuhljómsveitar Norðurlands, Leikfélags Akureyrar, Amtsbókasafnsins og Listasafnsins.
• Safnastarfsemi í bænum verður efld og söfnin gerð  aðgengilegri, bæði með nútímatækni, margmiðlun og opnunartíma. Jafnframt verður hugað að uppbyggingu safna í Hrísey.
• Framlög í Menningarsjóð verða aukin sem og vægi fastra rekstrarsamninga við einstaklinga og félagasamtök.. Samvinna við frjáls félagasamtök verður aukin, t.d. með umsjón og rekstri skýrt afmarkaðra verkefna, s.s. Listasumars, Akureyrarvöku og annarra viðburða. Framlag bæjarins í Húsverndarsjóð verður aukið til að hvetja til uppbyggingar og endurgerðar gamalla húsa
• Lögð verður aukin áhersla á kynningarmál Akureyrarbæjar og tækifæri nýtt sem gefast þegar stórir viðburðir eru á lista- eða íþróttasviðinu eða í öðrum greinum afþreyingar. Stofnanir sveitarfélagsins og félög, sem eru samningsbundin því á einn eða annan hátt, eiga að nýta sér sameiginlegar kynningarleiðir og fá þannig aukinn slagkraft.
• Vinabæjarsamstarf Akureyrar verður nýtt betur til að auka viðskiptatengsl, koma á fyrirtækjastefnumótum og gera samanburðarrannsóknir á búsetuskilyrðum og lífsgæðum íbúa.
• Árlega verða sett upp  umhverfislistaverk í sveitarfélaginu í samvinnu við skapandi einstaklinga og samtök.
• Samstarf menningarstofnana, listamanna og grunnskóla verður eflt og fé veitt í þróunarstarf á sviði sköpunar í grunnskólum. Kannaðir verða möguleikar á að halda Alþjóðlega barnamenningarviku að vori til, fyrst árið 2008.

Samt og þrátt fyrir þetta hefur komið til skerðingar á starfslaunum listamanna og öðrum styrkjum til myndlistar og listaverkakaupa. Starfslaun listamanna Akureyrarbæjar eru 190.000 þús á mánuði í formi verkatakagreiðslna og hafa verið hingað til greiddir 12 mánuðir til tveggja listamanna. Til samanburðar eru listamannalaun sem eru greidd af ríkinu 266.737 kr.  Nú á að skera þetta niður í 6 mánuði og aðeins einn listamaður hlýtur launin. Við erum öll meðvituð um stöðu mála í dag og skiljum vel að einhversstaðar þurfa að bregða hnífnum á. En við verðum að passa okkur á því að drepa ekki niður frumkvæði og viljan til framkvæmda. Akureyrarbær hefur unnið sér nafnið menningarbær og við viljum öll tryggja að svo verði áfram. En þetta eru því miður skýr skilaboð til þeirra listamanna sem búa á Akureyri. Stjórn Myndlistarfélagsins mótmælir 50% niðurskurði Akureyrarbæjar á starfslaunum listamanna.

Virðingarfyllst

Stjórn Myndlistarfélagsins

Aska í öskju lýkur um helgina

Aska í öskju
SÝNING Á DUFTKERUM Í BOXinu, SAL MYNDLISTARFÉLAGSINS, LISTAGILINU, AKUREYRI.
Tuttugu og einn félagi í Leirlistarfélagi Íslands sýna fjölbreyttar gerðir af duftkerum.

Síðustu sýningardagar verða um páskahelgina, en það eru skírdagur, föstudagurinn langi, laugardagur, páskadagur og annan í páskum og opið er frá kl. 14.00 - 17.00 alla dagana.
Allir velkomnir.

Sýningin sem um ræðir ber heitið Aska Í Öskju og viðfangsefni listamannanna í félaginu eru duftker.
Duftker eru ker með ösku fólks eftir bálför. Einn af hverjum fimm Íslendingum láta brenna sig eftir andlát en erlendis er sú tala mun hærri. Félagsmenn Leirlistarfélagsins hafa gert margvíslegar útgáfur af duftkerum bæði fyrir fólk og gæludýr.
Sýningin Aska í Öskju var í Bókasafni Mosfellsbæjar í mars og apríl 2009 og ennfremur var hluti verkanna á HönnunarMars09, hér og hvar í verslunargluggum við Laugarveginn í Reykjavík. Þessi sýning á Akureyri inniheldur bæði verk frá 2009 og 2010 og er um leið hluti af HönnunarMars 2010. Félagar hafa gefið út myndabækling sem verður dreift á útfararstofur landsins þar sem hægt verður að panta íslensk  duftker gerð af leirlistarfólki.

Sýnendur eru : Anna S. Hróðmarsdóttir, Auður Inga Ingvarsdóttir, Bjarnheiður Jóhannsdóttir, Bjarni Viðar Sigurðsson, Erna Jónsdóttir, Guðrún Indriðadóttir, Hafdís Brandsdóttir, Dóra Árna, Helga (Gegga) Birgisdóttir, Hrefna Harðardóttir, Inga Elín, Katrín Valgerður Karlsdóttir, Kristbjörg Guðmundsdóttir, Margrét Jónsdóttir, Ragnheiður Ingunn Ágústsdóttir, Rannveig Tryggvadóttir, Sigríður Ágústsdóttir, Sigríður Helga Olgeirsdóttir, Steinunn Marteinsdóttir, Svafa Björg Einarsdóttir, Þóra Breiðfjörð.

Nánari upplýsingar á Akureyri : Margrét Jónsdóttir, Sigríður Ágústsdóttir, Hrefna Harðardóttir.

Jónas Viðar sýnir í Jónas Viðar Gallery

Fimmtudaginn 1. apríl (Skírdag) kl. 15.00 opnar Jónas Viðar málverkasýningu
í innri sal (vestursal) í Jónas Viðar Gallery í Listagilinu.

þér og þínum er boðið

Sýningin stendur frá 1. apríl til 5. apríl


Yfirstandandi sýning í fremri sal "Ferðalangur" Þórarinn Blöndal

20. mars - 18. apríl


OPIÐ UM PÁSKA Í JÓNAS VIÐAR GALLERY

skírdag 15.00 - 18.00 föstudaginn langa 13.00 - 18.00
laugardaginn 3 apríl 13.00 - 18.00 páskadag  13.00 - 18.00
annan í páskum 13.00 - 18.00


______________________________________________

Jónas Viðar
sími: 8665021
Heimasíða: http://www.jvs.is
Jónas Viðar Gallery: http://www.jvs.is/jvgallery.htm

Rut Ingólfsdóttir sýnir ljósmyndir í Populus tremula

Á skírdag, fimmtudaginn 2. apríl, kl. 14:00 opnar Rut Ingólfsdóttir ljósmyndasýninguna ANNARS KONAR LANDSLAG í Populus tremula.
Rut hefur fengist við ljósmyndun árum saman, tekið þátt í sýningum og stundar nú nám í grafískri hönnun við Listaháskóla Íslands. Á sýningunni eru þrjár myndraðir sem ganga út frá mismunandi þáttum.

Sýningin verður opin alla páskahelgina frá kl. 14:00-17:00.

Kristján Pétur Sigurðsson opnar sýninguna “Rauðaþögn á ferð og flugi“ á Café Karólínu

 

Kristján Pétur Sigurðsson            

 

Rauðaþögn á ferð og flugi

 

03.04.10 - 30.04.10

 

Café Karólína // Kaupvangsstræti 23 // IS 600 Akureyri // 4612755

 

 

Kristján Pétur Sigurðsson opnar sýninguna “Rauðaþögn á ferð og flugi“ á Café Karólínu laugardaginn 3. apríl klukkan 15.

 

Sýningin samanstendur af ljósmyndum, sem teknar eru af litlum skúlptúr (Rauðaþögn), hér og þar á ferðinni um landið ísa.

Kristján Pétur byrjaði á þessu ljósmyndaverkefni fyrir þremur árum og því lýkur seint.

Þessi sýning er sú fyrsta af nokkrum fyrirhuguðum með sömu yfirskrift og yrkisefni.

Kristján Pétur er að mestu sjálfmenntaður í listinni, en hefur undanfarin ár sýnt oft einn eða með öðrum og einkum í Listagilinu og nágrenni.

Nánari upplýsingar veitir Kristján Pétur í síma 895 9546 eða tölvupósti: strandkp(hjá)simnet.is

 

Sýningin stendur til föstudagsins 30. apríl og allir eru velkomnir.

 

Næstu sýningar á Café Karólínu:

 01.05.10 - 04.06.10          List án landamæra

05.06.10 - 02.07.10           Hanna Hlíf Bjarnadóttir

03.07.10 - 06.08.10           Hrefna Harðardóttir

07.08.10 - 03.09.10           Arnþrúður Dagsdóttir

04.09.10 - 01.10.10           Margrét Buhl

Þórarinn Blöndal sýnir í Jónas Viðar Gallery

Laugardaginn 20. mars kl 15.00 opnar Þórarinn Blöndal myndlistarsýningu í Jónas Viðar Gallery í Listagilinu á Akureyri.

Sýningin ber yfirskriftina "Ferðalangur" (innsetning skúlptúrar teikningar og ljósmyndir) og stendur frá 20. mars til 18. apríl og er opin á laugardögum frá kl 13.00 til 18.00 eða eftir samkomulagi við Þórarinn...

______________________________________________

Jónas Viðar
sími: 8665021
Heimasíða: http://www.jvs.is
Jónas Viðar Gallery: http://www.jvs.is/jvgallery.htm

Umsóknarfrestur um Starfslaun listamanna á Akureyri rennur út 19. mars

Stjórn Akureyrarstofu auglýsir eftir umsóknum listamanna um starfslaun fyrir tímabilið 1. júní 2010 til 31. maí 2011. Starfslaunum verður úthlutað til eins listamanns og hlýtur viðkomandi sex mánaða laun. Ætlast er til að að listamaðurinn helgi sig list sinni eða einstökum verkefnum á vettvangi hennar á starfslaunatímanum og einungis listamenn sem eiga lögheimili á Akureyri koma til greina.
Umsækjendur skili, ásamt umsókn, upplýsingum um listferil sinn og greinargóðum upplýsingum um hvernig starfslaunatíminn skal notaður. Umsóknum skal skilað í þjónustuanddyri ráðhússins að Geislagötu 9. Nánari upplýsingar veitir Hulda Sif Hermannsdóttir verkefnisstjóri viðburða- og menningarmála hjá Akureyrarstofu í netfanginu [e-mail].
Fyrir tímabilið 2009-2010 hlutu Guðný Kristmannsdóttir myndlistarkona og Björn Þórarinsson tónlistarmaður starfslaun til að sinna list sinni í sex mánuði hvort.
Umsóknarfrestur er til og með 19. mars nk.

VARIÐ LAND - Yfirlitssýning á verkum Tryggva Ólafssonar í Listasafninu á Akureyri

TRYGGVI ÓLAFSSON - VARIÐ LAND

yfirlitssýning í Listasafninu á Akureyri 20. mars - 9. maí 2010

Þann 20. mars nk. opnar Listasafnið á Akureyri veglega yfirlitssýningu á verkum Tryggva Ólafssonar listmálara. Sýningin ber nafnið Varið land og spannar 40 ár af feril Tryggva, tímabilið frá 1969 til 2009. 

Tryggvi hefur fyrir löngu skipað sér í framvarðasveit íslenskrar myndlistar með sérstæðum og auðþekkjanlegum stíl sínum og er í hópi þekktustu núlifandi myndlistarmanna Íslands. Hann hóf ungur að mála og nam myndlist bæði hér á landi og Kaupmannahöfn í Danmörku, þar sem hann hefur búið í yfir 40 ár. Tryggvi hefur haldið fjölda einkasýninga á löngum ferli sínum og tekið þátt í samsýningum í fjölmörgum löndum. Verk hans prýða bækur og blöð og hann hefur skreytt byggingar bæði hér á landi og erlendis.

Eitt orð – örlæti – lýsir myndlist Tryggva Ólafssonar betur en flest önnur. Einhverjum kann að þykja auðveldara að heimfæra þetta orð á geðríkan lista- og lífsnautnamanninn sjálfan, sem áratugum saman skaut skjólshúsi yfir umflakkandi Íslendinga í margs konar ásigkomulagi meðan hann bjó í Kaupmannahöfn. En þetta á engu síður við um myndlist hans, enda er varla við öðru að búast af svo heilsteyptum manni. 

Þetta „örlæti“ er að sumu leyti innbyggt í þá myndlistarstefnu sem Tryggvi hefur helgað sig frá því um miðjan sjöunda áratuginn, nefnilega popplistina. Sú list grundvallast ekki á viðteknum módernískum hugmyndum um nýsköpun frá grunni, heldur á meðhöndlun listamannsins á myndrænum ummerkjum nútíma neyslu- og fjölmiðlasamfélags, teiknimyndasögum, ljósmyndum, auglýsingaskiltum, vöruumbúðum, kvikmyndabútum og fleiru í þá veru.

Í myndum Tryggva endurspeglast lífsreynsla hans og skoðanir, veruleiki Íslendings sem hefur orðið fyrir þroskandi áhrifum af langri dvöl erlendis. Hann á sinn eigin myndheim; goðsagnir sem hann hefur ofið úr hugsun sinni, heimþrá, minningum og hugleiðingum um heiminn.

Snemma á ferli sínum málaði Tryggvi mynd sem hann kallaði Varið land, með augljósri tilvísan til umdeilds félagsskapar sem bar sama nafn. Árið 1977 var eflaust litið á þessa mynd sem innlegg í áróðursherferð íslenskra herstöðvarandstæðinga, en í dag, í ljósi þess sögulega yfirlits sem þessi sýning í Listasafninu á Akureyri myndar, öðlast hún aðra og víðtækari merkingu. 

Í myndinni raðar Tryggvi saman minnum sem í sameiningu draga upp mynd af ástandi sem kalla mætti íslenskt „tímaleysi“; við sjáum torfbæ, máf svífa þöndum vængjum, mann við málaratrönur, hægindastól sem gefur fyrirheit um hvíld. En það á sér stað „rof“ í myndinni, þessu „tímaleysi“ er spillt með inngripi pólitískra afla (mynd af Bjarna Benediktssyni), herþotum, hálfum hermanni, handsög, skammbyssu og reykjarkófi. Og myndin spyr: Hvað er til varnar?

Á þessu ári eru fimmtíu ár liðin frá fyrstu sýningu Tryggva hér á landi en listamaðurinn fagnar einnig 70 ára afmæli sínu síðar á árinu. Það má því segja að Tryggvi standi á miklum tímamótum nú.

Thor Vilhjálmsson rithöfundur og Sören Haslund,  sendiherra Danmerkur á Íslandi, opna sýninguna sem haldin er í samstarfi við Málverkasafn Tryggva Ólafssonar í Neskaupstað. Sýningin stendur til 9. maí 2010.

Í tilefni sýningarinnar er gefin út sýningarskrá með umfjöllun um líf og list Tryggva eftir Aðalstein Ingólfsson.

Frekari upplýsingar veitir Hannes Sigurðsson, forstöðumaður Listasafnsins á Akureyri 
í síma 461 2610 eða í tölvupósti á netfanginu [e-mail]

ASKA Í ÖSKJU í sal Myndlistarfélagsins og BOXinu

DUFTKER eru viðfangsefni félaga í Leirlistarfélagi Íslands á sýningu sem opnar næstkomandi laugardag 13. mars klukkan 14.

Sýningin sem kallast “ASKA Í ÖSKJU” verður í BOXinu, sal Myndlistarfélagsins, í Listagilinu, Kaupvangsstræti 10, á Akureyri. Að sama tíma verður fagnað útgáfu á bæklings sem inniheldur ljósmyndir af duftkers-verkum eftir félaga. Sýningin er auk þess liður í HönnunarMars sem haldinn er dagana 18. til 21. mars og er kynning á starfi hönnuða á Íslandi.

Opið verður laugardaga og sunnudaga kl 14-17, og einnig á skírdag og föstudaginn langa en sýningunni lýkur mánudaginn, annan í páskum 5. apríl. Allir velkomnir.

Upplýsingar : 

Margrét Jónsdóttir, Sigríður Ágústsdóttir og Hrefna Harðardóttir

Aðalfundur Myndlistarfélagsins: fundargerð og ný stjórn

Aðalfundur Myndlistarfélagsins haldinn í sal Myndlistarfélagsins, fimmtudaginn 4. mars  kl. 17:00.


Fundarstjóri: Helgi Vilberg

Dagskrá fundar:

1.  Skýrsla stjórnar.
2.  Reikningar.
3.  Stjórnarkosning.
4.  Kosning félagslegs skoðunarmanns og endurskoðanda til eins árs.
5.  Lagabreytingar.
6.  Ákvörðun félagsgjalda.
7.  Önnur mál.



Skýrsla stjórnar og þau mál sem félagið hefur beitt sér fyrir á síðastliðnu ári.

Samskipti félagsins við Akureyrarstofu varðandi sýningu í Margmiðlunarhelli í Hofi,

Menningarhúsið og Listskreytingarsjóður.

Boxið, salur Myndlistarfélagsins

Hugsanlegt samstarf milli Myndlistarfélagsins og Fljótsdalshéraðs.

Umræður um starfshætti félagsins en stjórnarmenn voru sammála um að starfsemi félagsins hefði um tíma snúist of mikið um sýningarsal félagsins Boxið. En félagið er fyrst og fremst hagsmunafélag myndlistarmanna og tilgangur þess:

•    Að efla samtök myndlistarmanna og vera málsvari þeirra.
•    Að bæta kjör og starfsgrundvöll myndlistarmanna og gæta hagsmuna þeirra.
•    Að efla  umræðu, þekkingu og fræðslu um myndlist.
•    Að auka myndlist á Norðurlandi og koma á samstarfi við opinbera aðila á svæðinu.
•    Að standa fyrir sýningum á verkum félagsmanna.
•    Að koma á samstarfi við listamenn erlendis sem og hér á landi.





Helgi Vilberg  fer yfir reikninga félagsins og gerir grein fyrir útgjöldum. Fundurinn samþykkir reikninga.

Stjórnarkosning:

Þorseinn Gíslason gefur kost á sér áfram sem formaður. Þórarinn og Brynhildur gefa kost á sér til eins árs, Guðmundur Ármann hættir, Joris gefur kost á sér og Pálína og Laufey Margrét og Helgi Vilberg gefa kost á sér sem varamenn.

Stjórn Myndlistarfélagsins er því eftirfarandi:

Þorsteinn Gíslason formaður
Joris Rademaker varaformaður
Brynhildur Kristinsdóttir ritari
Þórarinn Blöndal gjaldkeri
Pálína Guðmundsdóttir meðstjórnandi
Laufey Margrét Pálsdóttir varamaður
Helgi Vilberg varamaður



Endurskoðandi félagsins
Lárus H. List  er kosin endurskoðandi félagsins til eins árs.

Lagabreytingar: Engar tillögur borist.

Fundurinn ákveður að árgjaldið 2011 verði 2500 kr.

Önnur mál:

Sigríður Ágústsdóttir talar um störf sýningarnefndar.  Vel hefur gengið að reka salinn með breyttri sýningarstefnu. Sýningaráætlun fyrir 2010 er tiltæk og mun birtast á bloggsíðu félagsins.

Pálína talar um að mikilvægt sé að myndlistarmenn frá Akureyri sýni í sal Myndlistarfélagsins yfir sumartímann.

Guðmundur segir frá væntanlegu málþingi um listsköpun í skólum sem Myndlistarfélagið hyggst standa fyrir næsta haust á Degi myndlistar, 2. október 2010.

Rætt um mikilvægi þess að myndlistarmenn standi saman að gerð stefnumótunar og menningarstefnu fyrir myndlistarfélagið vegna hagsmunamála félagsmanna tengdum Akureyrarbæ og öðrum sveitarfélögum á félagsvæði okkar. Mikilvægt að stefna Myndlistarfélagsins verði tiltæk og við vel undirbúin fyrir væntanlegan kynningarfund í lok apríl þar sem frambjóðendur til sveitastjórnarkosninga kynna stefnu flokkanna í menningarmálum.

Mikilvægt að við bókum Ketilhúsið sem fyrst. Áætlað að fundurinn verði 29. apríl.



Ákveðið að haldin verði stjórnarfundur fimmtudaginn 11.03.10 kl. 17:15.

Fundi slitið 18:45
Fundargerð skrifaði Brynhildur

Sýningar í Sal Myndlistarfélagsins og í BOXinu 2010

Hér er listi yfir sýngarnar Sal Myndlistarfélagsins og í BOXinu fram í janúar 2011:

13. mars – 5. apríl                               LEIRLISTARFÉLAGIÐ, duftker


15. maí – 6. júní                                HLÍF ÁSGRÍMSDÓTTIR / Helene Renard


3. júlí – 25. júlí                                 GRÁLIST


7. ágúst – 22. ágúst                               CLARA DRUMMOND


28. ágúst – 19. september                               GUÐRÚN PÁLÍNA / Kristján Pétur


23. október – 14. nóvember                               KRISTÍN ELVA RÖGNVALDSDÓTTIR / Melkorka Huldudóttir


4. desember – 23. desember                               LIND VÖLUNDARDÓTTIR / MARIJOLIJN van der MEIJ


janúar 2011                               ÞORSTEINN GÍSLASON

 

Sýningarnefnd Myndlistarfélagsins skipa:

Arnþrúður Dagsdóttir

Bryndís Kondrup          

Guðrún Hadda Bjarnadóttir,

Guðrún Lóa Leonardsdóttir

Hjördís Frímann

Sigríður Ágústsdóttir

Guðbjörg Ringsted sýnir á Café Karólínu

 

Guðbjörg Ringsted                 

 

Ísland í blóma

 

06.03.10 - 02.04.10

 

Café Karólína // Kaupvangsstræti 23 // IS 600 Akureyri // 4612755

 

 

Guðbjörg Ringsted opnar sýninguna “Ísland í blóma“ á Café Karólínu laugardaginn 6. mars klukkan 15.

 

Guðbjörg Ringsted er útskrifuð úr MHÍ 1982 og hefur starfað við kennslu og sinnt myndlist síðan þá. Hún hefur haldið á annan tug einkasýninga og tekið þátt í allnokkrum samsýningum. Síðasta einkasýning Guðbjargar var í Grafíksafni Íslands síðastliðið haust.

Hún segir um sýninguna á Café Karólínu: “Landið, fjöllin og fossarnir mynda oft ótrúleg munstur. Í verkum mínum leikur íslenskt blómamunstur um fjöll og fossa, jökla og sprænur. Þar sameinast áhugi minn á landinu og þjóðlegum útsaumi.

Þetta eru akrýlmálverk á striga og eru þau flest máluð á þessu ári.”

 

Meðfylgjandi mynd er af einu verka Guðbjargar.

Nánari upplýsingar veitir Guðbjörg í síma 863 4531 eða tölvupósti: [e-mail]

 

Sýningin stendur til föstudagsins 2. apríl og allir eru velkomnir.

 

Næstu sýningar á Café Karólínu:

03.04.10 - 30.04.10                  Kristján Pétur Sigurðsson

01.05.10 - 04.06.10                  List án landamæra

05.06.10 - 02.07.10                  Hanna Hlíf Bjarnadóttir

03.07.10 - 06.08.10                  Hrefna Harðardóttir

07.08.10 - 03.09.10                  Arnþrúður Dagsdóttir

 

Gústav Geir Bollason með sýningu og fyrirlestur í LHÍ

Frá Opna Listaháskólanum:

Hádegisfyrirlestur Gústavs Geirs Bollasonar við Opna Listaháskólann í  
tilefni sýningarinnar Múgavél í Kubbnum, sýningarsal  
myndlistardeildar LHÍ.

Mánudaginn 1. mars kl 12.30 heldur Gústav Geir Bollason  
hádegisfyrirlestur við Opna Listaháskóla myndlistardeildar í  
Laugarnesi. Sýning Gústavs Geirs, Múgavél,  opnar í sýningarsal  
Myndlistardeildar LHÍ,  Kubbnum, föstudaginn 26. febrúar kl 17. Til  
sýningarinnar bauð hann með sér myndlistarmönnunum Clementine Roy og  
Þórarni Blöndal.
Auk þess að kynna eigin verk á fyrirlestrinum munu þeir Gústav Geir  
og Þórarinn gera grein fyrir sameiginlegu verkefni sínu og annarra  
aðstandenda Verksmiðjunnar á Hjalteyri, mikilsvirks vettvangs  
myndlistar, sem og annarra listviðburða norðan heiða, en Verksmiðjan  
var stofnuð fyrir tveimur árum.
Sýningin Múgavél í Kubbnum í Laugarnesi stendur yfir til 19. mars og  
er opin á skólatíma eða alla virka daga frá kl 9 – 16.

Fimmtudaginn 4. mars kl 12.30  verður boðið upp á hádegisleiðsögn  
listamannsins um sýninguna Múgavél.

Allir velkomnir

Pétur Gautur sýnir í Jónas Viðar Gallery

Laugardaginn 13. febrúar kl. 15 opnar Pétur Gautur málverkasýningu í Jónas
Viðar Gallery í Listagili á Akureyri. Sýningin verður opin á laugardögum til 7. mars
frá kl. 13-18 eða eftir samkomulagin við Jónas í s. 866-5021.

Elizabeth Tubergen með opna gestavinnustofu Gilfélagsins

 

 

Gilfélagið kynnir:

Listamaður mánaðarins í gestavinnustofu Gilfélagsins er Elizabeth Tubergen frá Bandaríkjunum

Elizabeth verður með opna vinnustofu laugardaginn 13. febrúar kl. 15:00-17:00
Heimilisfangið er Kaupvangsstræti 23 (vestast við bílastæðið).


Hi! 

I made a little card with some information and images of my work. 

Best,

Elizabeth

--
What the water wants is hurricanes,
and sailboats to ride on its back.
What the water wants is sun kiss,

http://elizabethtubergen.blogspot.com

Nemendur Listhönnunardeildar Myndlistaskólans á Akureyri sýna í Safnahúsinu á Húsavík

 

MENNINGARRÁÐ EYÞINGS - MYNDLISTASKÓLINN Á AKUREYRI

Sýning á minjagripum og nytjaverkum nemenda í SAFNAHÚSINU Á HÚSAVÍK

Að frumkvæði Ragnheiðar Jónu Ingimarsdóttur, menningarfulltrúa Eyþings, var ákveðið að ráðast í átak, sem stuðlað gæti að atvinnu- og nýsköpun á starfssvæði Eyþings. Afraksturinn var verkefnið „Þingeyskt og þjóðlegt“ samstarf verkefnahópanna, Þingeyskt handverk á Kópaskeri, Þjóðlegum arfi og Svartárkoti-menningu, náttúru/Kiðagili, Menningarmiðstöðvar Þingeyinga og Myndlistaskólans á Akureyri. Verkefnið snerist um að hanna minjagripi og þjóðlega vöru sem dragi fram sérstöðu svæðanna í Þingeyjarsýslu með tilvísun til gripa á Byggðarsafni N. Þingeyinga og til Útilegumanna sýningar í Kiðagili.
Stofnað var til samstarfs við Myndlistaskólann á Akureyri með það að markmiði að fá inn í verkefnið faglega þekkingu á sviði hönnunar og jafnframt gefa nemendum tækifæri til að vinna að raunverulegu verkefni og auka þekkingu þeirra á menningu svæðisins. Leitast var við að nýta þá fagþekkingu sem er á svæðinu og var Brynja Baldursdóttir hönnuður og myndlistamaður fengin til að hafa umsjón fyrir hönd Myndlistaskólans. Hún er búsett á Siglufirði.
Formleg kennsla í grafískri hönnun hófst við Myndlistaskólann á Akureyri árið 1992 en fram að því hafði aðeins verið kennd grafísk hönnun við Myndlista og handíðaskóla Íslands frá 1961. Sú kennsla hélt áfram við Listaháskóla Íslands sem var stofnaður árið 1998. Oft er rætt um íslenska hönnun sem nýtt fyrirbæri en þó hafa íslenskir hönnuðir verið starfandi allt frá þriðja áratugnum. Íslensk hönnun hefur fylgt þróun menningar í landinu sem byggði á grunni sveitamenningar sem hefur þróast í átt að alheimsvæðingu. Íslensk hönnun er orðin útflutningsvara í æ ríkara mæli og stendur jafnfætis því besta sem gerist erlendis á sviði hönnunar. Það er farið að gæta sterkrar þjóðernisvitundar og hönnuðir sækja sér í auknum mæli innblástur í gömul munstur og hefð í handverki. Þegar er komin skemmtileg reynsla á samstarf af þessu tagi sem er vænlegt til árangurs. Má þar nefna samstarfsverkefni LHÍ og „Beint frá Býli“ og áfanga í Listaháskólanum að frumkvæði Lilju Pálmadóttur að byggja framsækna hönnun á gripum í vörslu Þjóðminjasafns Íslands. Það er skemmtileg viðbót að Myndlistaskólinn á Akureyri leggi sitt lóð á vogarskálarnar í vöruhönnun byggðri á þjóðlegum grunni og sérstöðu Þingeyjarsýslna. Útkoman er; fjölbreyttar hugmyndir sem eru vel til þess fallnar að fara í framleiðslu. Þetta samstarf styrkir samkeppnisstöðu og fjölbreytni í verðmætasköpun og bendir á vaxtarbrodda og möguleika svæðisins til nýsköpunar.
Sýningin er opin almenningi laugardaginn 6. febrúar 2010 kl. 13.00-17.00 og frá kl. 13.00-16.00 dagana 7. - 13. febrúar.

MENNINGARRÁÐ EYÞINGS - MYNDLISTASKÓLINN Á AKUREYRI
Vöruhönnun - Þingeyskt og þjóðlegt
Listhönnunardeild Myndlistaskólans á Akureyri - Grafísk hönnun Kennari: Brynja Baldursdóttir, hönnuður og myndlistarmaður
Sýnendur:
Berglind H Helgadóttir Dagrún Íris Sigmundsdóttir Heiða Erlingsdóttir Herdís Björk Þórðardóttir Helgi Vilberg Helgason Karen Lind Árnadóttir Sindri Smárason Unnur Jónsdóttir Bergný Sjöfn Sigurbjörnsdóttir Guðfinna Berg Stefánsdóttir Guðmundur Valur Viðarsson.

Aðkomumaður: fyrirlestur listnámsbrautar VMA í Ketilhúsinu

 

Föstudaginn 5. febrúar kl. 14.50 í Ketilhúsinu mun Guðrún Pálína Guðmundsdóttir flytja fyrirlestur um myndlistamanninn og kennarann Joris Rademaker. Sýning á verkum hans stendur yfir í Listasafninu á Akureyri.

Guðrún Pálína er starfandi myndlistarmaður og kennari á Akureyri. Hún hefur um árabil starfrækt Gallerí+ í Brekkugötu 35 á Akureyri ásamt Joris Rademaker. Hún nam myndlist í Svíþjóð og Hollandi en hefur mestmegnis starfað á Akureyri síðan.

Í fyrirlestrinum verður fjallað um þróun listar hollenska myndlistarmannsins Joris Rademaker og þau áhrif sem flutningur til Íslands hafði á list hans. Fyrirlesturinn er í tengslum við yfirlitssýningu hans „Aðkomumaður“, sem nú stendur yfir í Listasafninu á Akureyri. Joris verður einnig viðstaddur og talar um hugmyndafræði verkanna og vinnuferlið.

Joris vinnur oftast verk sín í seríum og vinnur með mismunandi þema t.d. form púsluspils eða skapalón úr auglýsingum. Hann hefur einnig unnið með matvæli eins og hnetur, spaghetti og kartöflur. Einnig hefur hann notað fundna hluti og notað tannstöngla í sína skúlptúra. Oftast vinnur hann með andstæður ljóss og skugga. Hreyfingin og rýmið er aðal uppistaðan í verkum Joris, óháð efnismeðferð. Hann bæði málar myndir og býr til skúlptúra og innsetningar.

Fyrirlestrarnir eru skipulagðir af kennurum á listnámsbraut Verkmenntaskólans á Akureyri í samvinnu við Listasafnið á Akureyri og Menningarmiðstöðina í Grófargili.