Karólína Baldvinsdóttir sýnir í Geimdósinni

Sumarsýningar Geimdósarinnar í Gilinu halda áfram. Karólína Baldvinsdóttir er næsti geimfari dósarinnar og opnar sýningu þar á morgun, laugardaginn 21. júní, kl. 20. Eins og aðrir dósarar fékk Karólína ljóð eftir Heklu Björt Helgadóttur til að vinna með, en það hljóðar svo:

Árabátur Pípuhattur

Á meðan ég var í burtu, byggði systir mín þetta hús
og hún fyllti það af kuðungum og alls konar málum
og oft lagði hún kuðung að eyranu…
og nokkrum sinnum á dag, hellti hún nýju kaffi í málin
en ég lét aldrei í mér heyra…
og ég kom aldrei til að hlusta
og ég er alltaf á leiðinni, en þokusál í fjöru
marandi í málinu, með barrnálar í vösum
gjafir rekandi skóga, stungur undir nöglum
og ég óska þess að faðmur minn
boði henni meira, en orðin sem ráku á fjöruna
orð sem ég aldrei sagði
orð sem hún aldrei heyrði
oh…. reikula þokusál
lífstyrða hræða
og systir mín er árabátur, hún leitar mín á sjónum
og ég vildi ég væri stór pípuhattur
sem ver hana frá stormum

Karólína er nýútskrifuð af fagurlistadeild Myndlistaskólans á Akureyri. Þar vann hún m.a. stóra innsetningu með skúlptúr, málverki og camera obscura. Karólína heldur auk þess úti síðu þar sem skoða má verk hennar og vinnu nánar.

Léttar veitingar verða í boði við opnunina og eru allir hjartanlega velkomnir – sérstaklega þeir sem mæta með pípuhatt…

Tekið af akv.is

Anna Elionora Olsen Rosing með gjörning og sýningarlok

Nú er síðasta sýningarhelgi á sýningu Önnu Elionoru Olsen Rosing  "Inuit and Masks" í Hvítspóa Brekkugötu 3a, Akureyri.
Laugardaginn 21. júní verður hún með gjörning á sýningunni í tilefni þess að það er þjóðhátíðardagur Grænlendinga.
Þetta er nýr gjörningur sem hún gerir við tónlist sem bróðir hennar samdi en hann er tónlistarmaður og  myndlistarmaður.
Þess má einnig geta að bróðir Önnu, Georg Olsen mun opna sýningu í Hvítspóa þann 28. júní, Nánar auglýst síðar.

Allir eru velkomnir að sjá þennan gjörning sem hefst kl. 14 þann 21. júní.

Hvítspói
Art Studio & Gallerý
Brekkugata 3a
600 Akureyri
Tel. [phone]

Musical juggling í Alþýðuhúsinu á Siglufirði

Fjöllistahópur setur upp sýninguna "Musical juggling" í Alþýðuhúsinu á Siglufirði sunnudaginn 22. júní kl. 15.00.

Sýningin höfðar til allra aldurshópa og er í senn skemmtileg, ljóðræn og listræn.

Aðgangur er ókeypis, en tekið er á móti frjálsum framlögum.

Fjölþjóðleg textílsýning í Populus tremula

Laugardaginn 21. júní kl. 14.00 verður opnuð í Populus tremula sýning sjö listakvenna sem dvalið hafa í mánuð í vinnustofu Textílseturs Íslands á Blönduósi. Á sýningunni, sem ber yfirskriftina Lightly Acquainted, getur að líta afrakstur vinnu þeirra þennan tíma þar sem þræðir þeirra hafa legið saman í samtölum og samveru á framandi slóðum. Sýn­end­ur eru: Maaike Ebbinge, Hollandi; Erika Lynne Han­son, USA; Samantha Hookway, USA/Svíþjóð; Natalie Lauchlan, Kanada; Jessica Self, USA; Karin Thorsteinson, Kanda; Eva Porte­lance, Kanda.

Sýningin er einnig opin sunnudaginn 22. júní kl. 14.00-17.00.
Aðeins þessi eina helgi.

Maaike Ebbinge, The Netherlands www.maaike-ebbinge.nl
Erika Lynne Hanson, USA www.elhanson.com
Samantha Hookway, USA/Sweden www.samanthahookway.com
Natalie Lauchlan, Canada www.natalielauchlan.ca
Jessica Self, USA jesslself.com
Karin Thorsteinson, Canada www.karinthor.tumblr.com
Intern: Eva Portelance, Canada, evaportelance.com

https://www.facebook.com/events/740497156013361

Kristín Gunnlaugsdóttir sýnir í Flóru

Kristín Gunnlaugsdóttir
14. júní - 17. ágúst 2014
Opnun laugardaginn 14. júní kl. 14
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri
https://www.facebook.com/events/477137992432792

Laugardaginn 14. júní kl. 14, opnar sýning á nýjum og nýlegum verkum Kristínar Gunnlaugsdóttur í Flóru á Akureyri.

Kristín er fædd á Akureyri og stundaði nám við Myndlistaskólann á Akureyri, MHÍ í Reykjavík og Accademia delle Belle Arti í Florence á Ítalíu. Hún er ein af okkar fremstu myndlistarmönnum og einkasýning hennar í Listasafni Íslands á síðasta ári hlaut verðskuldaða athygli. Fyrir þá sýningu fékk Kristín menningarverðlaun DV fyrr á þessu ári.

Í bókinni Sköpunarverk sem kom út í tilefni sýningarinnar í Listasafni Íslands skrifar Halldór Björn Runólfsson:
“Styrkur Kristínar sem myndlistarmanns er endurnýjunarkrafturinn, hversu rækilega hún er tilbúin að taka sjálfa sig í gegn og koma þannig sér og öðrum á óvart án þess að slá af þeirri kröfu að nota sama efniviðinn og sömu aðferðirnar og áður; fást með öðrum orðum við þá tegund myndgerðar sem á rætur að rekja til kvennadyngjunnar og klausturlifnaðarins á miðöldum. Ekkert er eins djarft og afgerandi og það að brjóta gegn bannhelgi þessara luktu verkstæða þaðan sem ekkert kom sem ekki naut fullkominnar handleiðslu og blessunar andlegra eftirlitsafla, þeirra sjálfskipuðu siðavarða sem enn vaka yfir stórum hluta kvenna þessa heims, af því að þær eru svo útsettar fyrir óheppilegum refilstigum tilverunnar.
Kristín Gunnlaugsdóttir er með öðrum orðum ein þeirra örfáu listamanna okkar sem tilbúnir eru að hafa endaskipti á sjálfu sér svo þeir megi hitta okkur varnarlausa þegar minnst varir og við þörfnumst þess sem mest að vera slegin út af laginu.”

Kristín verður með listamannsspjall í Flóru föstudaginn 4. júlí kl. 20.
Nánari upplýsingar um verk Kristínar má finna á http://kristing.is

Sýningin er öllum opin á opnunartíma Flóru alla daga kl. 10-18. Sýningin stendur til sunnudagsins 17. ágúst 2014.


Flóra er verslun og viðburðastaður með vinnustofum sem Kristín Þóra Kjartansdóttur félagsfræðingur rekur. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður. Menningardagskrá Flóru hlaut styrk úr Menningarsjóði Akureyrar.

Christa Spencer sýnir í Pop­ul­us tremula

Laugardaginn 14. júní kl. 14.00 opnar þýska listakonan Christa Spencer sýninguna Paperwork í Pop­ul­us tremula.

Christa, sem dvelur í Gestavinnustofu Gilfélagsins um þessar mundir, vinnur verkin á pappír og hafa fjöllin blá og gróðurinn í Lystigarðinum haft áhrif á mótíf og litaval.

Sýningin er einnig opin sunnudaginn 15. júní kl. 14.00-17.00. Aðeins þessi eina helgi.

Margrét H. Blöndal opnar sýningu í Kompunni Alþýðuhúsinu á Siglufirði

Margrét H. Blöndal opnar sýningu í Kompunni Alþýðuhúsinu á Siglufirði þriðjudaginn 10. júní 2014, kl. 17.00.
Boðið er uppá léttar veitingar og allir velkomnir.
Sýningin stendur til 2. júlí.


ÚT er innsetning unnin beint í Kompu Alþýðuhússins á Siglufirði en þar hefur
Margrét dvalið undanfarna viku.  

Setur á varir stút
kytra verður hvelfing
eitt eilífðarinnar æðablik
ÚT

Margrét H. Blöndal er fædd árið 1970 í Reykjavík. Hún lærði í Myndlista- og handíðaskóla Íslands og að auki í Mason Gross School of Arts í Rutgers háskólanum í New Jersey í Bandaríkjunum þaðan sem hún útskrifaðist árið 1997. Hún hefur undanfarin ár haldið einkasýningar í Galerie Thomas Fischer, Berlín, Listasafni Reykjavíkur, Fort Worth Contemporary Arts í Texas í Bandaríkjunum,  Mother´s Tankstation í Dublin á Írlandi og í galleríi Nicolas Krupp í Basel í Sviss. Margrét átti verk á hinni alþjóðlegu stórsýningu Manifesta 7 á Ítalíu árið 2008 og tók þátt í Momentum tvíæringnum í Moss, Noregi árið 2011. Hún var tilnefnd til Sjónlistaverðlaunanna tvisvar sinnum og hefur hlotið viðurkenningar úr sjóði Richards Serra, Guðmundu S. Kristinsdóttur og Laurenz Haus Stiftung í Sviss

Kompan er opin daglega kl. 14.00 – 17.00 eða þegar skiltið er úti.  Einnig eftir samkomulagi við Aðalheiði í  síma 865-5091.

Hlynur Hallsson opnar í Geimdósinni

HLYNUR HALLSSON
SALT

6. - 7. júní 2014
Opnun föstudaginn 6. júní kl. 21

Geimdósin
Kaupvangsstræti 12 (gengið inn að aftan)
600 Akureyri

Hlynur Hallsson opnar sýninguna SALT í Geimdósinni, Kaupvangsstræti 12 á Akureyri, föstudagskvöldið 6. júní kl. 21. Hlynur setur upp verk út frá ljóði Heklu Bjartar Helgadóttur, ljóðskálds og sýningarstjóra Geimdósarinnar. Sýningin er í röð af sýningum sem haldnar hafa verið í Geimósinni af nokkrum myndlistamönnum sem vinna þar með ljóð Heklu. Hlynur gaf á síðasta ári út bókverkið STAFRÓFIÐ og verkið sem hann gerir nú er unnið út frá þessu stafrófi.

Hlynur hefur verið nokkuð iðinn við að setja upp sýningar og hann tók þátt í samsýningum í firstlines gallery og Halle50 í München á síðasta ári og síðasta einkasýning hans var ALÞÝÐUSÝNING Í ALÞÝÐUHÚSINU í Kompunni í Alþýðuhúsinu á Siglufirði í mars á þessu ári.  

Nánari upplýsingar um Hlyn og verk hans er að finna á heimasíðunni hallsson.de og einnig á bloggsíðunni hlynur.is

Sýningin er einnig opin laugardaginn 7. júní kl. 15-17.

Nánari upplýsingar um Geimdósina er að finna á https://www.facebook.com/geimdosin

https://www.facebook.com/events/644651982291782

S a l t

Allt er hafið:
sær
andi
saltið
Þúsundir rauðra landakorta
djöfulriðinna heimsríkja
með sundurskornar slagæðar. 
Í milljónum blóðhúsa
aftökur ferfætlinga
sakleysingja
endanna á milli daglegs brauðs.
Afbökun náttúruvalsins
landseyðingar
barnsserðingar
linnulausrar klámvæðingar.
Allt salt yfir vinstri öxl!
Allt er þetta hafið
hafið fyrir löngu.
Upp úr sænum reis andi
með dýrmætt salt.
Salt sem gat nært
salt sem gat sært 
salt sem fór í sárin
í staðinn fyrir grautinn
Allt salt yfir vinstri öxl!
Því slagur blóðsins
býr í æðunum
en ekki á spjótunum.
 
Allt hef ég hafið
hafið upp á nýtt. 
Eftir höggþungar óöldur
við hjarðlendi heiðingjanna
strandaði hugsjón mín. 
Allt salt yfir vinstri öxl! 
Og megi kveðja mín berast
með brimsleggju, salti
til þeirra sem leita mín
 

Hekla Björt Helgadóttir

 

Guðrún Pálína sýnir í Sal Myndlistarfélagsins

Guðrún Pálína Guðmundsdóttir opnar sýninguna Ferðalag í Sal Myndlistarfélagsins, Kaupvangsstræti 10, Listagilinu á Akureyri.

Opnun 7. júní kl. 14. Opnunartímar föstu-, laugar- og sunnudaga milli kl. 14-17 og aðra daga eftir samkomulagi við Pálínu í síma 894 5818.

https://www.facebook.com/events/1434820856777864

Íslensk samtíðarportrett í Listasafninu á Akureyri

ÍSLENSK SAMTÍÐARPORTRETT – mannlýsingar á 21. öld
 
Sumarsýning Listasafnsins á Akureyri verður opnuð laugardaginn 7. júní kl. 15 og ber hún yfirskriftina Íslensk samtíðarportrett – mannlýsingar á 21. öld. Á sýningunni gefur að líta hvernig 70 listamenn hafa glímt við hugmyndina um portrett frá síðustu aldamótum til dagsins í dag.
 
Hugmyndin um portrett felst í því að draga fram á listilegan hátt það sem öðrum er almennt hulið. Að einskorða sig við portrett er ein leið til að skoða á hvaða hátt íslenskir listamenn fjalla um samtíðina. Á þessari sýningu birtist áhorfendum samtíðarsýn 70 listamanna sem hafa tekist á við hugmyndina í víðum skilningi og í áhugaverðu samspili  ólíkra birtingarmynda fást svör.
 
Verkin eru á þriðja hundrað talsins og á meðal listamanna sem eiga verk á sýningunni má nefna Erró, Ragnar Kjartansson, Kristínu Gunnlaugsdóttur, Hallgrím Helgason, Steinunni Þórarinsdóttur, Hugleik Dagsson, Aðalheiði S. Eysteinsdóttur, Baltasar Samper og Ólöfu Nordal.
 
Sýningin stendur til 17. ágúst og er opin alla daga nema mánudaga kl. 10-17. Aðgangur er ókeypis.

Meðfylgjandi mynd heitir Svín Gogh og er eftir Karl Jóhann Jónsson.

http://listasafn.akureyri.is

https://www.facebook.com/listasafnid.akureyri

https://www.facebook.com/events/632875460132381