Sigurjón Már Svanbergsson opnar ljósmyndasýningu í Flóru

Sigurjón Már Svanbergsson
Girðingar
16. febrúar - 9. mars 2013
Opnun laugardaginn 16. febrúar kl. 14
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri

Laugardaginn 16. febrúar kl. 14 opnar Sigurjón Már Svanbergsson sýningu sem nefnist „Girðingar” í Flóru í Hafnarstræti 90 á Akureyri. Þar sýnir hann ljósmyndir teknar á filmuvélar.

girðing -ar, -ar KVK 1 það að girða 2 það sem girt er (með) kringum e-ð > gaddavírsgirðing / girðingarstaur 3 afgirt svæði > girðingarhólf hólf í girðingu 4 staðbundið klettabelti

Sigurjón segir um sýninguna: “Girðingar hafa alltaf einhvernvegin heillað mig, þessar dæmigerðu íslensku sveitagirðingar, ýmist á kafi í vatni, snjó eða liggjandi á sinu eftir snjóþungan vetur.
Þessar myndir sem hér eru til sýnis eru teknar á haustmánuðum 2012 og er mín fyrsta tilraun til að fanga girðingar á filmu.”

Sigurjón Már Svanbergsson er fæddur, uppalinn og búsettur á Akureyri, hann hefur brennandi áhuga á filmuljósmyndun, tekur að mestu leyti á svart hvítar filmur og framkallar filmurnar sjálfur, ásamt því að framkalla á pappír í myrkraherbergi í kjallara Flóru.
Ef litfilmur fara í myndavélar hans, þá eru þær í langflestum tilfellum útrunnar (heillast af þessum undarlegu litum í þeim).
Hann tekur mest á medium format filmuvélar, Mamiya RZ67 og Hasselblad, einnig aðrar eldri vélar með sál og reynslu.


Sýningin er öllum opin á opnunartíma Flóru mánudaga til föstudaga kl. 11-13 og 16-18 og laugardaga kl. 13-16 og stendur til laugardagsins 9. mars 2013.


Flóra er verslun, vinnustofa og viðburðastaður Kristínar Þóru Kjartansdóttur félagsfræðings og garðyrkjukonu. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður.

Birgir Sigurðsson opnar sýningu á vinnustofu Myndhöggvarafélagsins

Grænt ljós í Myndhöggvarafélaginu

Óvenjulega sýning verður opnuð á vinnustofu Myndhöggvarafélagsins Nýlendugötu 15 í Reykjavík, fimmtudaginn 7. febrúar kl. 18.00. Sýningin nefnist Grænt ljós 2 og er undir merkjum Vetrarhátíðar. Hrá vinnustofan býður upp á fjölbreytt samtal milli verks og áhorfenda, en viðfangsefnið er samspil mannsins og þess umhverfis sem hann lifir í. Það er Birgir Sigurðsson, myndlistarmaður og rafvirki, sem sýnir hér ljósverk og vídeóverk og hefur fengið félaga sinn Odd Garðarsson til að semja tónverk sérstaklega inn í þessar aðstæður.

Birgir Sigurðsson hefur starfað í myndlist síðustu 14 árin, en hann er að mestu sjálfmenntaður. Fyrir tveimur árum stofnaði Birgir 002 Gallerí, sem er 63 fermetra íbúðin hans í Hafnarfirði. Oddur Garðarsson starfar sem þyrluflugvirki en meðfram því hefur hann numið tónsmíðar og samið lög og tónverk. Hann spilar einnig með hljómsveitinni Hrókunum. Grænt ljós 2 er þriðja sýningin sem þeir vinna að í sameiningu. Sýningin stendur til 10. febrúar og er opið frá 18.00 til 22.00 alla dagana.

Opnar vinnustofur í miðbæ Akureyrar

Við ætlum að opna vinnustofur okkar fyrir gestum og gangandi

fimmtudaginn 7. febrúar 2013, kl. 16-20


Kaupvangsstræti 12. Listasafnshúsið / gengið inn úr portinu fyrir ofan, baka til:

Linda Björk Óladóttir myndlistarmaður og Ólafur Sveinsson myndlistarmaður
G. Rúnar Guðnason myndlistarmaður og Hallgrímur Ingólfsson myndlistarmaður


Flóra Hafnarstræti 90

Sigurjón Már og Marta Kusinska áhugaljósmyndarar
Kristín Þóra Kjartansdóttir félagsfræðingur og framkvæmdastýra Flóru
Hlynur Hallsson myndlistarmaður
Elín Hulda - recycled by elinhulda
Auður Helena - Kaí merking
Inga Björk - gullsmíði og myndlist


Ráðhústorg 7

Fótografía, Guðrún Hrönn ljósmyndari.
María Ósk, listamaður
Blek hönnunarstofa
Herdís Björk vinnustofa | Bimbi

Allir eru velkomnir og stefnt er að því að þetta verði mánaðarlegur viðburður þar sem fólk getur gengið á milli og kíkt í heimsókn á vinnustofur og skoðað það sem verið er að framleiða og bjóða uppá í miðbænum.

Kaffi Ilmur, Bautinn og RUB 23 eru með tilboð í gangi og opið fram eftir kvöldi.

Viðburður á facebook https://www.facebook.com/events/520664087978912

Umsókn um styrk úr Menningarsjóði Akureyrarbæjar

Stjórn Akureyrarstofu úthlutar styrkjum úr Menningarsjóði Akureyrarbæjar og er hlutverk sjóðsins að styrkja listastarfsemi og aðra menningarstarfsemi á Akureyri. Umsóknum skal skilað í þjónustuanddyri Ráðhússins, Geislagötu 9, og er hægt að nálgast eyðublöðin þar eða á heimasíðu Akureyrarbæjar. Þess skal vandlega gætt að allar umbeðnar upplýsingar komi fram.

Umsóknarfrestur er til 15. febrúar 2013.

Upplýsingar veitir Hulda Sif Hermannsdóttir, verkefnastjóri á Akureyrarstofu, í netfanginu [e-mail].

Þóra Karlsdóttir opnar málverkasýningu í Mjólkurbúðinni í Listagilinu

Þóra Karlsdóttir opnar málverkasýninguna "Back to the Roots"  í Mjólkurbúðinni í Listagilinu á Akureyri laugardaginn 9. febrúar, klukkan 15:00.

Þóra sýnir málverk sem hún vann í ágúst á síðasta ári meðan hún dvaldist í gestavinnustofunni í Listagilinu á Akureyri. Málverkin eru unnin m.a. með tækninni, image transfer, en þar notast Þóra við ljósmyndir sem faðir hennar Karl Hjaltason tók á bernskuárum hennar á Akureyri. Einnig sýnir Þóra vídeóverkið "Catching the Spirit" sem hún vann á sama tíma.

Þóra stundar nú nám í myndlist við Evrópsku Lista Akademíuna í Trier í Þýskalandi og útskrifast í vor, en hún vinnur að lokaverkefninu um þessar mundir á Akureyri.

Þóra hélt sína fyrstu einkasýningu, ALL ABOUT RUST, í Luxembourg 2007. Einnig hefur hún sýnt víða erlendis, bæði í Luxembourg, Þýskalandi og Austurríki.
  Hún var m.a. valin til þátttöku í virtri samsýningu EVBK. Prum í Þýskalandi þrjú ár í röð, árin 2009, 2010 og 2011.
 
Þóra er fædd á Akureyri 1962 og ólst þar upp, en fluttist þaðan fyrir þrjátíu árum. Hún hefur búið víða erlendis síðastliðin tuttugu ár og er nú búsett í Luxembourg og þar er hún með vinnustofu í gamalli lestarstöð ásamt fleiri listamönnum. 
Þóra hyggst flytja til Akureyrar aftur í vor þegar hún hefur lokið náminu og ætlar að vinna við myndlist. Í myndlistinni finnst henni mikilvægt að leita nýrra leiða og uppgötva nýjar aðferðir til tjáningar í listsköpun.

Sýning Þóru "Back to the Roots" stendur til 24.febrúar og eru allir velkomnir.
Mjólkurbúðin er opin laugardaga og sunnudaga kl. 14-17 og eftir frekara samkomulagi þess utan.

Þóra Karlsdóttir s.6914839 [e-mail] http://karlsdottir.com

Mjólkurbúðin s.8957173

HEILSUBÆTANDI LIST

Um sýningu Jóhönnu Helgu Þorkelsdóttur
eftir G. Pálínu Guðmundsdóttur
fræðslufulltrúa Sjónlistamiðstöðvarinnar

Kveikja, innsetning myndlistarmannsins Jóhönnu Helgu Þorkelsdóttur í Ketilhúsi, er unnin sérstaklega fyrir sýningarsalinn sem á sér ekki hliðstæðu á Íslandi vegna þess hversu hátt  er þar til lofts. Fáir myndlistarmenn hafa nýtt sér þessa sérstöðu, utan Örnu Valsdóttur sem vann innsetningu á Listasumri 2007 þar sem birtan, gluggarnir og speglun þeirra var látið spila saman. Sýning Jóhönnu umbreytir rými hússins og afmáir mörkin milli innri og ytri veruleika byggingarinnar.

Náttúrustaðgenglar og tilfinningar

Jóhanna vinnur einnig með gluggana  og hvernig endurkast sólarljóssins hefur áhrif á arkitektúr hússins og þá sem þangað koma. Hún tók ljósmyndir af sólarljósinu sem flæddi inn í Ketilhúsið á ákveðnum tímapunkti og vann verkið svo áfram í samstarfi við arkitektinn Söru Axelsdóttur. Um innsetninguna segir Ingibjörg Sigurjónsdóttir  í sýningarskrá:  „Í sýningunni Kveikju er meðal annars tekist á við upplifun mannsins í náttúrunni og hvernig hægt sé að líkja eftir þeirri dularfullu vellíðan sem oft fylgir náttúruupplifun, án aðkomu náttúrunnar sjálfrar”.
Þetta er ekki ósvipuð hugmyndafræði og var á bak við verk Ólafs Elíassonar í Tate Modern í London 2003. Sýning Ólafs sló rækilega í gegn en þar sýndi hann m.a. manngerða sól í risastóru rými túrbínusalarins. Í kjölfarið fylgdi fossa-verk hans í New York þar sem hann sýndi endurgerð af fossum, staðsettum í borgarumhverfi, með hjálp stálgrinda og vatnsafls. Verkin vöktu, ekki síður en „sólin“ í London, sterk viðbrögð áhorfenda vegna tengingar þeirra við frummyndir náttúrunnar.

Áhrif stórborga í Ketilhúsinu

Jóhanna nam myndlist við Listaháskóla Íslands og í Chicago. Hægt er að greina sterk áhrif frá Ameríku í verkum hennar og verkin sem staðsett eru á efri hæð Ketilhússins eiga uppruna sinn frá tíma Jóhönnu í Chicago. Næm tilfinning fyrir rými og stærðum er meðal þess sem oft einkennir framsækna, ameríska list, sem og djörfung og drifkraftur. Jóhanna  sýnir ótrúlega natni við að mæla út og líma eftirmyndir sólarljóssins á gólf og veggi hússins. Tilfinningin fyrir amerískri stórborg og himinháum skýjakljúfum býr þarna einhvers staðar á bak við. Í slíku umhverfi er án vafa mikil þörf fyrir náttúruna og það virðist í raun lítið mál að tefla fram manngerðri náttúru til að ýta undir áhrifamátt hennar í þéttbýlinu.  
Akureyri er aftur á móti láreist, umvafin fjöllum, og ekki vantar tengingu við náttúruna þótt sólarljósið sé af skornum skammti yfir veturinn.  Þannig virkar þessi tilfinning fyrir sól og birtu í Ketilhúsinu útvíkkandi og mikilfengleg, akkúrat það sem fólk þarf mest á að halda í svartasta skammdeginu. Gestsauga Jóhönnu er glöggt því sá sem dvelur langdvölum á Akureyri er ekki líklegur til að nálgast Ketilhúsið með þessum hætti. Það er engu líkara en að húsið stækki allt og þenjist út vegna skúlptúrsins við norðurvegginn sem búinn er til úr fjölda af mjög sterkum flúrperum sem mynda einskonar foss.  Dagsljósaperurnar draga að sama skapi betur fram gulu límfilmunnar á gólfinu. Birtan virkar vel á sálarlíf áhorfenda sem oftar en ekki fara glaðari út en inn. Á austurvegg hanga stórar samsettar ljósmyndir af vatni, beint á móti þessum gulu staðgenglum sólarljóssins úr plasti, og tengir það áhorfandann enn frekar við náttúruna því án vatns þrífst ekkert líf.

Þörf fyrir birtu í skammdeginu

Á svölum efri hæðar hússins eru þrjár myndir, upplýstar af dagsbirtulömpum sem gagnlegir eru til að framkalla vellíðan í skammdeginu. Á þessum myndum eru ljósmyndir af hafinu við strendur Spánar, líkt og á myndunum á neðri hæð, en hér hefur Jóhanna hellt að hluta til yfir þær flæðandi hlýjum vatnslitum. Hægt er að setjast fyrir framan þær, horfa í birtuna frá þeim og hlusta á 8 mínútna langa hugleiðslu sem unnin var í samvinnu þeirra Jóhönnu, Mögnu F. Birnir hjúkrunarfræðings og dáleiðanda og Sveins Ólafs Gunnarssonar leikara. Ingibjörg Sigurjónsdóttir hefur skrifað texta með sýningunni sem birtur er í styttri útgáfu í sýningarskrá og í heild sinni á heimasíðu Sjónlistamiðstöðvarinnar (sjá: sjonlist.is). Í grein sinni skrifar Ingibjörg m.a. að „í sýningunni sé meðvitað reynt að flytja eftirlíkingar af náttúrunni inn í manngert umhverfi líkt og landslagsmálverk gera, þótt miðlarnir hér séu örlítið frábrugðnir...” Þá nefnir Ingibjörg að Jóhanna hafi kynnt sér rannsóknir sem sýna að maðurinn hafi meðfædda þörf fyrir návígi við náttúruna. Telur hún að jafnvel náttúrustaðgenglar geti gagnast okkur á svipaðan hátt.
Trúlega gildir þetta einnig um ástvini fólks og gæludýr, þ.e. að eftirlíkingar af þeim í formi myndverka af einhverju tagi geta framkallað vellíðan. Náttúran er endurnærandi sé hennar notið í afslappaðri göngu í góðu veðri en streituvaldandi séu veðurskilyrði mjög slæm, hvort sem um er að ræða, fárviðri og fimbulkulda eða óbærilegan hita. Hér er þó ekki verið að fjalla um það heldur annars vegar hvernig listin eflir andann, víkkar sjóndeildarhringinn og eykur næmi og skynjanir og hins vegar hvernig nota megi náttúrustaðgengla í manngerðu umhverfi, fólki til heilsubótar.

Listin og náttúran

Hugmyndafræði sýningarinnar og öll  framsetning hennar er til fyrirmyndar. Þetta er athyglisverð sýning sem framkallar áhrif í áhorfandanum sem trúlega væri hægt að mæla vísindalega á marga vegu, s.s. breytt flæði vellíðunarhormóna o.fl. Vísindalegar niðurstöður af áhrifum lista á áhorfandann eru þó ekki endilega það mikilvægasta heldur hvernig hver og einn nýtur þess sem hann sér, finnur og heyrir, ásamt því hvaða áhrif það hefur á fagurfræðilega skynjun hans á umhverfinu, heiminum og félagslegum aðstæðum sínum. Þetta er óvenjuleg sýning sem enginn ætti að láta fram hjá sér fara.
Jóhanna er uppalin á Akureyri og er þetta önnur sýning hennar hér fyrir norðan, en á Akureyrarvöku 2004 sýndi hún verk sín í Gallerí+. Verður áhugavert að fylgjast með listrænni þróun hennar. Sýningin stendur til og með 24. febrúar og er opin alla daga nema mánudaga og þriðjudaga, frá kl 13-17. Aðgangur er ókeypis.
Miðvikudaginn 20. febrúar kl. 16.00, verður viðburður í Ketilhúsinu þar sem Magna Birnir býður upp á dáleiðsluslökun unnin upp úr náttúrulýsingum og Páll Jakob Líndal, Dr. nemi í umhverfissálfræði flytur fyrirlestur.

Guðbjörg Ringsted opnar málverkasýningu í Menningarhúsinu Hofi

Guðbjörg Ringsted opnar málverkasýningu í Menningarhúsinu Hofi á Akureyri laugardaginn 2. febrúar 2013. Þar sýnir hún málverk sem flest eru máluð á síðasta ári og er viðfangsefnið íslenskur útsaumur sem fær nýtt hlutverk í meðförum listakonunnar.
Guðbjörg er fædd á Akureyri 1957 og útskrifaðist úr grafíkdeild MHÍ árið 1982. Hún hefur fengist við kennslu og myndlist frá útskrift og þá aðallega unnið með grafíkina. En um 2006 sneri hún sér að málverkinu og sýnir hér akrýlmálverk. Í ár eru liðin 30 ár frá fyrstu einkasýningu hennar og er sýningin í Hofi sú 26. Opnun er frá kl. 15 – 17. Sýningin stendur til 1. maí.
Guðbjörg er bæjarlistamaður Akureyrar 2012 til 2013.

Georg Óskar & Margeir Dire S sýna í Reykjavík Art Gallery

 

Þann 6. október opnaði listamannatvíeykið GÓMS sýningu sína Overdose & Underdose í Sal Myndlistafélagsins á Akureyri og munu nú opna þá sýningu í Reykjavík Art Gallery þann 15.02.2013. Opnun klukkan 17:00 og sýningin stendur til 03.03.2013.

 

GÓMS er samstarf Georgs Óskars & Margeirs Dire S.
"Tveir mjög ólíkir myndlistarmenn sem hafa sömu hugmynd um hvað góð myndlist sé og hvernig hana skal skapa. Við málum ofan í hvorn annan þangað til fullkomið jafnvægi skapast og verkið er eins og eftir einn furðulegan einstakling"

Titillinn Overdose & Underdose fjallar um ferli verkana í gerð, stundum er "Overdose" á ákveðnum svæðum sem þarf að róa niður og stundum er "underdose" sem þarf að hlaða. Hvert verk gengur í gegn um þetta ferli aftur og aftur þar til ákveðið jafnvægi hefur myndast með öfgum í allar áttir.
Overdose & Underdose fjallar á sama tíma um hvernig áhorfandinn meðtekur verkin og gefur rými fyrir þær blendnu tilfinningar sem hann kann að upplifa frá verkinu.

Þessi sýning er framhald af samstarfi þeirra GÓMS félaga sem hófst í sameiginlegri vinnuaðstöðu "Stúdíó Tímavél" frá árinu 2007-2008. Þeir héldu nokkrar sýningar með afrakstrinum sem fékk eintómt lof áhorfenda. Nú mætast þeir aftur á striganum í myndrænni orgíu sem ætti ekki að skilja neinn eftir ófullnægðan. 

Reykjavík Art Gallery

Skúlagata 30

101 Reykjavík

Atburður á facebook http://www.facebook.com/events/463680783681154

 

Kynning um sýninguna á YouTube

Lucy Wilson sýnir í Sæborg í Hrísey

Lucy Wilson

Sæborg, Hrísey

26.1.13-27.1.13

3pm-6pm

 

Ég hef ánægju af fjölva (macro) ljósmyndun þar sem þessi tækni býður upp á mikla skerpu og stækkun. Skuggar sem svona mikil stækkun orsakar leyfa huganum að dikta upp sína eigin hugarsmíð og hefur verið notuð í hryllingsmyndum svo sem „Repulsion“ eftir Roman Polanski. Ég hef nýverið unnið meir og meir í svart hvítu , einfaldleikinn er svo heillandi. Með því að fjarlægja litina og þysja inn á einstakan hlut, missir hann staðsetningu sína og er þess í stað fljótandi í tómarúmi. Ég er mjög heilluð af orðum Paolo Pasolini :“ Fyrir mér er hver hlutur kraftaverk. Sýn mín á heiminn er á ákveðin hátt trúarlegs eðlis , en samt ekki stöðnuð eða ofstækisfull“

Ég er stöðugt knúin til að skapa list þar sem ég set sjálfa mig í persónulega krefjandi og örvandi aðstæður og umhverfi.

Mig langar til að þakka íbúum Hríseyjar fyrir einstakann velvilja og gjafmildi sem ég hef notið á meðan á dvöl minni hefur staðið. Þetta er búin að vera ótrúleg og ógleymanleg  lífsreynsla sem hefur veitt mér mikinn innblástur.  Frá mínum dýpstu hjartarótum: „Takk fyrir mig“

 

ÁLFkonur opna ljósmyndasýningu í Safnaðarheimili Akureyrarkirkju

ÁLFkonur
opna ljósmyndasýninguna LITBRIGÐI
í Safnaðarheimili Akureyrarkirkju
laugardaginn 26. janúar  kl. 14 - 17

ÁLFkonur er félagskapur kvenna á Akureyri og í Eyjafirði
sem eiga ljósmyndun að áhugamáli og hafa starfað saman frá sumrinu 2010.

Þetta er áttunda samsýning hópsins og að þessu sinni leitast þær við að fanga litbrigði haustsins.

Sýningin stendur frá 26. janúar - 17. mars
og er opin á opnunartíma Safnaðarheimilis Akureyrarkirkju við Eyrarlandsveg.

Styrktaraðilar eru: NORÐURORKA, Akureyrarkirkja og Velmerkt ehf.

Ljósmynd: Margrét Elfa Jónsdóttir