Fjölskylduleiðsögn og listasmiðja í Listasafninu

Laugardaginn 14. apríl kl. 11-12 verður boðið upp á fjölskylduleiðsögn í Listasafninu, Ketilhúsi. Heiða Björk Vilhjálmsdóttir, fræðslufulltrúi, segir börnum og fullorðnum frá samsýningunni Sköpun bernskunnar 2018 og sýningu Bergþórs Morthens, Rof.

Að lokinni leiðsögn er gestum boðið að búa til sitt eigið listaverk, innblásið af verkum listamannanna.

Aðgangur er ókeypis í boði Norðurorku sem styrkir sérstaklega safnkennslu og fræðslu fyrir börn og fullorðna í Listasafninu.

Ljóðaboð Sóknarskálda í Deiglunni

Ljóðaboð

Fyrsta ljóðaboð Sóknarskálda

Sóknarskáld í samstarfi við Gilfélagið bjóða í LJÓÐABOÐ í Deiglunni á Akureyri, sunnudagskvöldið 15. apríl klukkan 20:00. Opið ljóðakvöld þar sem allir eru velkomnir að flytja og lesa ljóðin sín. Skúffuskáld, stórskáld, níðvísur og ástarljóð öll velkomin.

Sóknarskáld er félagsskapur tveggja ungra skálda í Eyjafjarðarsókn sem vilja blása lífi í ljóðið og bjóða lýðnum birginn. Markmiðið er að skapa vettvang fyrir fólk til að flytja og bera út eigin skáldskap. Það er mikilvægt að plægja akurinn fyrir fleiri og meiri ljóð í þessum bæ Davíðs Stefánssonar. Hafið augun opin fyrir fleiri viðburðum með hækkandi sól því þetta eru bara fyrstu fersku vindarnir norðan heiða.

Sóknarskáld eru þau Karólína Rós og Sölvi Halldórsson, fædd og uppalin á Akureyri, 20 og 19 ára. Menntaskólagengin og ferðavön. Nánari upplýsingar veitir Karólína í síma 862 9962.

Á döfinni í Deiglunni

15. apríl kl. 20
Ljóðaboð

22. apríl kl 12 - 13
Ætlist - Listasmiðja fyrir smábörn með Marika Tomu Kaipanen á gestavinnustofu Gilfélagsins.

22. apríl kl.  16
Arctic Act - Gjörningur í Deiglunni

28. - 29. apríl 
Marika Tomu Kaipanen sýnir afrakstur dvalar sinnar í Gestavinnustofu Gilfélagsins

5. - 13. maí
Thomas Colbengtson - Myndlistasýning

19. maí
Aðalfundur Gilfélagsins

Hefur þú áhuga á að halda viðburð í Deiglunni? Endilega hafðu samband.