Átján útskriftarnemar VMA sýna í sal Myndlistarfélagsins

Föstudaginn 25. apríl kl. 20 opnar sýning á lokaverkefnum átján listnema VMA í sal Myndlistarfélagsins, Boxinu, við Kaupvagnsstræti 10. Verkin verða auk þess til sýnis helgina 26.-27. apríl frá kl. 13-16. Sýningin ber titilinn Endhaf.

„Við erum af bæði textíl- og myndlistarkjörsviði og því verður sýningin mjög fjölþætt – þar verður að finna málverk, hljóðverk, skúlptúr, fatahönnun og textílhönnun,“ segir Harpa Ósk Lárusdóttir sem tilheyrir hópi tilvonandi útskriftarnema. „Heiti sýningarinnar var ákveðið á hópfundi. Margar af þeim tillögum sem nemendur stungu upp á höfðu eitthvað með upphaf eða endi að gera. Það að klára framhaldsskóla táknar ákveðinn endi en mögulega byrjun á einhverju öðru líka. Þá kom upp sú hugmynd að splæsa þessum tveimur hugmyndum saman. Úr orðinu upphaf og endir varð til Endhaf,“ útskýrir Harpa.

Af akv.is