RÉTTARKAFFI OG OPIÐ HÚS Í FREYJULUNDI

OPIÐ HÚS Í FREYJULUNDI VIÐ REISTARÁRRÉTT
RÉTTARKAFFI
KLUKKAN 14:00 - 18:00 LAUGARDAGINN 12. SEPT.
ATH: EKKI TEKIÐ VIÐ KORTUM

Umsóknarfrestur um starfslaun listamanna rennur út 19. október

Hér með eru auglýst til umsóknar starfslaun listamanna sem úthlutað verður árið 2010, í samræmi við ákvæði laga nr. 57/2009 með áorðnum breytingum.

 Starfslaunin eru veitt úr sex sjóðum, þ.e.:

1.   launasjóði hönnuða,
2.   launasjóði myndlistarmanna,
3.   launasjóði rithöfunda,
4.   launasjóði sviðslistafólks,
5.   launasjóði tónlistarflytjenda,
6.   launasjóði tónskálda.

Vakin er sérstök athygli á að umsækjendum er gert að sækja um á rafrænu formi á vef Stjórnarráðsins á vefslóðinni http://umsokn.stjr.is. fram til  mánudagsins  19. október 2009. Aðgangur er veittur á kennitölu umsækjanda (ekki kennitölu félags eða samtaka) og verður lykilorð sent viðkomandi á netfang sem hann gefur upp við nýskráningu.

Lykilorðinu má breyta eftir innskráningu með því að opna Mínar stillingar. Umsækjendur skrá sig inn með kennitölu og lykilorði og velja Stjórn listamannalauna undir flipanum Umsóknir. Þar eru umsóknareyðublöðin. Svæði merkt rauðri stjörnu verður að fylla út.

Fylgigögnum með umsókn sem ekki er hægt að senda rafrænt skulu berast Skrifstofu Stjórnar listamannalauna, Hallveigarstöðum, Túngötu 14, 101 Reykjavík fyrir kl. 17:00 mánudaginn 19.október 2009.

Með umsókn skal fylgja greinargerð um verkefni það sem liggur til grundvallar umsókninni ásamt upplýsingum um hve langan starfstíma er sótt um og rökstuðningi fyrir tímalengd.  Jafnframt skulu fylgja upplýsingar um náms- og starfsferil, verðlaun og viðurkenningar. Þessir þættir  skulu  að  jafnaði  liggja  til  grundvallar  ákvörðun  um úthlutun starfslauna.

Athugið að hafi umsækjandi áður hlotið starfslaun verður umsókn hans því aðeins tekin til umfjöllunar að hann hafi skilað Stjórn listamannalauna skýrslu um störf sín í samræmi við ákvæði 4. gr. laga um listamannalaun nr. 57/2009 með áorðnum breytingum.

Nánari upplýsingar og leiðbeiningar fást á vef Stjórnar listamannalauna www.listamannalaun.is eða á skrifstofunni í síma 562 6388.

Umsóknarfrestur rennur út mánudaginn 19. október 2009.

Stjórn listamannalauna 16. ágúst 2009

Dvalarstaður lista- og fræðimanna í Jensenshúsi í Fjarðarbyggð

Jensenshús sem er í eigu Fjarðabyggðar var byggt  árið 1837 af Jens Peder Jensen.  Jensenshús er elsta íbúðarhús Austurlands og eitt elsta uppistandandi íbúðarhús landsins.  Húsið var friðað 1. janúar 1990. Nýbúið er að gera húsið upp og lagfæra það og nú er það nýtt sem dvalarstaður fyrir lista- og fræðimenn, íslenska og erlenda.   

Ekki er gert ráð fyrir neinni greiðslu vegna dvalar í Jensenhúsi annarri en afnot af síma.  Hins vegar er ætlast til að þeir sem þar dvelja komi á einhvern hátt á framfæri því sem þeir eru að vinna að í sinni list og/eða fræðigrein eða öðrum verkum sínum meðan á dvalartíma stendur.  Gesturinn getur því verið beðinn um að halda sýningu, tónleika, fyrirlestur eða taka þátt í samkomu, skilja eftir listaverk eða eitthvað annað sem um semst milli hans og ferða- og menningarfulltrúa fyrir hönd menningar-, íþrótta- og ferðamálanefndar Fjarðabyggðar.    Verkefni sem efla menningu í Fjarðabyggð munu njóta forgangs í umsóknarferlinu en litið er til fleiri þátta. 

Menningar- íþrótta- og ferðamálanefnd ásamt menningar- og ferðamálafulltrúa og forstöðumanni Safnastofnunar velur úr innsendum umsóknum í samvinnu við forstöðumann Kirkju- og menningarmiðstöðvar Fjarðabyggðar.  

Fyrsti gestur hússins var rithöfundurinn og ljóðskáldið Sigurjón Birgir Sigurðsson betur þekktur sem Sjón.  Hann dvaldi nú nýlega í húsinu ásamt syni sínum Flóka.   Sjón á sterkar rætur til Eskifjarðar en hann dvaldi þar oft á sumrin sem krakki og spilaði fótbolta á lóðinni við hliðina á Jensenshúsi.  Feðgarnir létu vel af dvölinni og sögðu gott að dvelja í húsinu og að þar væri mjög góður andi.  Sjón var með kvöldvöku í Randulfssjóhúsi á Eskifirði í Gönguvikunni Á fætur í Fjarðabyggð, þar  spjallaði hann við gesti og las upp úr bók sinni.  Þeir feðgar eyddu annars miklum tíma í að skoða bæinn, fiska á bryggjunum og láta líða úr sér í sundlauginni.    

Þeir sem hafa áhuga á að dvelja í húsinu er bent á að hafa samband við ferða- og menningarfulltrúa Hildigunni Jörundsdóttur, netfang: [e-mail] , sími: 860-4726.  

Frekari upplýsingar má nálgast á heimasíður Fjarðabyggðar www.fjardabyggd.is undir menning- og tómstundir.

Kreppa og kærleikur - Nýir Íslendingar í nýju landi á Akureyrarvöku

Listasumar í samstarfi við Norrænu upplýsingaskrifstofuna og Alþjóðahús hafa
tekið höndum saman um verkefnið "Kreppa og kærleikur". Varpað er ljósi á
hér búandi listamenn af erlendum uppruna og vakin athygli á því hvernig þeir
hafa auðgað samfélag okkar með sínum störfum á listræna sviðinu í námi og
leik.

Hugmyndin varð til þegar Norræna upplýsingaskrifstofan sóttist eftir að fá
hingað til lands sýningu, danska ljósmyndarans Henrik Saxgren "Krig og
kærlighed", Stríð og ást, en sýningin hefur hlotið mikið lof. Það kynnti
einnig undir hugmyndina að hér er starfandi Alþjóðastofa og að Listasumri
bauðst sýning þeirra Ásthildar Jónsdóttur og Ásthildar Kjartansdóttur
"Lífsmunstur - Líf í nýju landi", en sú sýning fjallar um það, að á bak við
hvert andlit er flókið munstur tilfinninga og upplifana og að alls staðar má
finna sameiginlega þræði.

Sýning Ásthildanna verður sett upp í Deiglunni, en sýning Henrik Saxgren í
sal Ketilhússins. Á sýningunni í Ketilhúsinu verður hægt að skoða sögur 40
einstaklinga og fjölskyldna og ástæður þeirra fyrir flutningi frá
heimalandinu, en Henrik Saxgren ferðaðist um Norðurlöndin í fjögur ár og
myndaði fulltrúa rúmlega hundrað þjóðarbrota.

Alþjóðahús hefur fengið myndlistarmennina George Hollanders, Joris Rademaker
og Véronique Anne Germaine Legros til að setja upp samsýninguna Af hverju er
ég hér? á svölum Ketilhússins og tónlistarmennina Thiago Trinsi, Valmar
Väljaots, Wolfgang Sahr, Kaldo og Margot Kiis, Heimir Ingimarsson og fleiri
til að sjá um tónlistina á opnun sýninganna í Ketilhúsinu og Deiglunni.

Þá munu nokkrir útvaldir nýbúar á Akureyri, bæði af innlendu og erlendu
bergi brotnir, svara spurningunni "Af hverju ert þú hér?". Það fer þannig
fram að hver og einn verður merktur sérstaklega og eiga gestir og gangandi á
sýningunum að geta spurt þá spjörunum úr um tilvist þeirra á Akureyri.



Kreppa og kærleikur er síðasti viðburður á Listasumri 2009 og markar lok
Listasumars og afmæli Akureyrarbæjar á Akureyrarvöku þann 29. ágúst.
Dagskráin stendur frá kl. 14 til 18 og eru nánari upplýsingar um
tímasetningar inn á heimasíðu Listasumars www.listagil.akureyri.is

Stofnendur Verksmiðjunnar á Hjalteyri opna sýningu

Laugardaginn 1. ágúst kl. 15.00 opnar sýningin Kvörn í Verksmiðjunni á Hjalteyri.
Á sýningunni eru verk eftir stofnendur Verksmiðjunnar og einn gest.

Aðalheiður S. Eysteinsdóttir, Arnar Ómarsson, Arna Valsdóttir, A.P.E. , Clémentine Roy, Gústav Geir Bollason, Hlynur Hallsson, Jón Laxdal, Jóna Hlíf Halldórsdóttir, Knut Eckstein, Lene Zachariassen, Véronique Legros, Þórarinn Blöndal.

Átök um yfirráðin standa enn... Á sama tíma og endurmatið á gildum samfélagsins og menningarinnar fer fram í rústum gjaldþrota hlutaveltunnar, bæði andlega og efnislega.

Hlutir sem við sjáum í rými sem geymir þá, geta þeir tilheyrt okkur á okkar stað, ef að einhver annar beinir samtímis athygli sinni að þeim og gerir þannig tilkall til þeirra?   Þetta megum við oft reyna – meðvitað/ómeðvitað – við margvíslegar aðstæður, en ekki er gott að átta sig á því af hverju samkeppni ætti að skapast á milli þeirra sem líta sömu hlutina augum.  Það ber þó gjarnan við þegar mat á gildi þeirra og merkingu bætist við, sem tekur til þess hæfileika að sundurgreina og fella dóma um gildið.  Um gildi hvers sem vera skal og þar með hefst oft ójöfn aðgreining þess sem telst skipta einhverju máli.  Það kann að vera einhver lausn á þessari togstreitu þegar við náum að beina augum okkar að raunveruleikanum eins og hann er.  Það að takast sameiginlega á við hindranir, ekki eingöngu við að sjá þennan raunveruleika, heldur skynja það sem er handan auðkenndra forsenda hans (þess sem blasir við).  Við þurfum því að öðlast einhvern sameiginlegan skilning á því hvernig við hugsum og metum gildi hlutanna.  Til þess þarf einhvern einn hvarfpunkt sem leyfir að út frá honum byggist upp sameiginlegt perspektív.  Það má jafnframt taka með í reikninginn og minnast þá allra þeirra óbugandi huglægu viðhorfa, tilfinninga, skynjana, hugsana og framsetninga sem hvert okkar, sem af sjálfu sér, veit, hefur og þarf að fást við með eigin dómgreind, og um leið, mati á öllu því sem einhverju kann að varða.
Hvernig er best að finna þennan hvarfpunkt?  Hann gæti leitt aftur til grundvallaratriða og orðið upphaf endurmats.  Í bókstaflegri merkingu er hugmyndin sú að finna upp hjólið að nýju.

Um þessar mundir eru liðin tvö ár síðan hópurinn lagði af stað með fyrirætlanir um blómlegt menningarlíf í gömlu Verksmiðjunni á Hjalteyri.
Ekki verður annað sagt en vel hafi tekist til og listáhugafólk verið duglegt að leggja leið sína á fjölbreytilega viðburði.
Verksmiðjan hefur öðlast nýtt líf í hugum fólks og möguleikarnir óendanlegir.

Sýningin stendur til 22. ágúst og er opin um helgar frá kl. 14.00 - 17.00.
www.verksmidjan.blogspot.com
Menningarráð Eyþings, Norðurorka, Kaldi og Ásprent styrkja Verksmiðjuna á Hjalteyri.
Húni II siglir kl. 13:00 frá Torfunefsbryggju á Akureyri á opnun í Verksmiðjunni á Hjalteyri.
Nánari upplýsingar gefur Hlynur Hallsson í síma 659 4744 eða Gústav Geir Bollason í síma 461 1450

KVÖRN

Aðalheiður S. Eysteinsdóttir
Arnar Ómarsson
Arna Valsdóttir
A.P.E.
Clémentine Roy
Gústav Geir Bollason
Hlynur Hallsson
Jón Laxdal
Jóna Hlíf Halldórsdóttir
Knut Eckstein
Lene Zachariassen
Véronique Legros
Þórarinn Blöndal

1. – 22. ágúst 2009
Opnun laugardaginn 1. ágúst kl. 15
Opið um helgar frá kl. 14 - 17
www.verksmidjan.blogspot.com

 

Knut Eckstein opnar í Gallerí + sunnudaginn 2. ágúst

Opnun sýningar Knut Eckstein í Gallerí +, Brekkugötu 35 á Akureyri er frestað um einn dag. Opnunin verður því sunnudaginn 2. ágúst kl. 15 í stað 1. ágúst eins og auglýst er í Listasumarsbæklingnum. Sýningin nefnist "Sommer of Love" og stendur til og með 9. ágúst, opið daglega frá kl. 14-17.

Knut Eckstein er starfandi listamaður í Berlín og er þetta önnur sýning hans í Gallerí+.

List án landamæra, Norræn ráðstefna 28. september 2009

 

 

Líf og list án landamæra

Sýnileiki, réttindi og þátttaka

 

 

NORRÆN RÁÐSTEFNA

28. september 2009

 

 

Ráðstefnan er haldin á vegum Listar án landamæra, sem er árlegur viðburður þar  sem lögð er áhersla á samvinnu fólks með fötlun og almennings í gegnum listir og menningarstarf, í þeim tilgangi að efla vitund og skilning á milli einstaklinga sem búa að ólíkri getu til athafna, til hagsbóta fyrir samfélagið í heild.  

 

Aðstandendur Listar án landamæra eru Landssamtökin Þroskahjálp, Öryrkjabandalag Íslands, Fjölmennt, Átak félag fólks með þroskahömlun og Hitt húsið.

 

Ráðstefnan er skipulögð í samráði við Norrænu nefndina um málefni fólks með fötlun, menntamálaráðuneytið, og með stuðningi Norrænu ráðherranefndarinnar og Norræna menningarsjóðsins. Ráðstefnan er hluti af dagskrá formennskuáætlunar Íslands, sem gegnir formennsku í norrænu ráðherranefndinni árið 2009.

 

Á ráðstefnunni verður m.a fjallað um:

 

·        Sýnileika og kynningu fatlaðra í fjölmiðlum og menningu í norrænum löndum.

·        Mikilvægi 30. greinar samnings Sameinuðu þjóðanna um réttindi fólks með fötlun (Þátttaka í menningarlífi, tómstunda-, frístunda- og íþróttastarfi).

·        Gildi Listar án landamæra og annarrar menningarstarfsemi sem fyrirmynda fyrir grasrótar-hreyfingar og þátttöku fólks með fötlun í listum og menningarstarfi, sem hægt væri að nýta svæðisbundið eða á landsvísu í öðrum norrænum löndum.

 

 

Ráðstefnan fer fram á Grand Hótel í Reykjavík 28. september 2009.

 

Ráðstefnan er opin almenningi og allir eru velkomnir en ætti  sérstaklega að höfða til samtaka fatlaðra á Norðurlöndunum, fræðimanna, þeirra er vinna að málefnum fólks með fötlun og stjórnenda á sviði lista- og menningarmála.

 

Ekkert þátttökugjald er á ráðstefnunni, en þátttakendur þurfa að skrá sig. Það má gera með því að slá inn þessa slóð hér fyrir neðan. Í skráningunni má einnig skrá sig í hádegismat og á leiksýningu Dissimilis í Borgarleikhúsinu.

Skráning:

http://www.eventure-online.com/eventure/welcome.do?type=participant&congress=69_9028&page=index

 

DAGSKRÁ

 

 

Ráðstefnustjóri:

Þuríður Backmann, alþingismaður og formaður Norrænu nefndarinnar um málefni fatlaðra

 

 

9:00   I.           UPPHAF RÁÐSTEFNUNNAR

 

                            Gestir boðnir velkomnir   

                                    Þuríður Backmann, ráðstefnustjóri

 

                            Opnunarávarp

                                    Katrín Jakobsdóttir, menntamálaráðherra

 

                            Upphafsorð

                                    Tone Mørk, stjórnandi Norrænu Velferðarmiðstöðvarinnar, Stokkhólmi            

 

 

9:30   II.          SÝNILEIKI FÓLKS MEÐ FÖTLUN

 

                            Samspilið milli fjölmiðla, menningarlífs og stjórnmála

                                    Lars Grip, blaðamaður, Stokkhólmi

 

                            Rannsóknir á sýnileika í sænskum fjölmiðlum,

                            með áherslu á almannaþjónustu

                                    Karin Ljuslinder, prófessor við háskólann í Umeå í Svíþjóð

 

10:20 – 10:40 KAFFIHLÉ

 

                            Birtingarmynd fötlunar í norrænum kvikmyndum - endurskoðun

                                    Friederike A. Hesselman, rithöfundur

 

                            Hinn ósýnilegi minnihluti

                                    Sigrún Stefánsdóttir, dagskrárstjóri útvarps hjá Ríkisútvarpinu (RÚV)

 

                            Stillt á staðnaðar ímyndir? Sýnileiki fatlaðra í fjölmiðlum

                            Pallborðsumræður: Lars Grip, Karin Ljuslinder, Friederike A. Hesselman og
                            Ingólfur Margeirsson

      

 

12:10 – 13:10 HÁDEGISHLÉ

 

 

13:10   III.      SAMNINGUR SAMEINUÐU ÞJÓÐANNA UM RÉTTINDI

                        FÓLKS MEÐ FÖTLUN

 

                            30. grein samnings Sameinuðu þjóðanna um réttindi fólks með fötlun

                                    Guðmundur Magnússon, varaformaður Öryrkjabandalags Íslands og

                                    fulltrúi í nefnd sem undirbýr staðfestingu Íslands á samningnum   

                           

 

                            Mikilvægi menningarstarfs í nútímaþjóðfélagi

                                    Karitas H. Gunnarsdóttir, skrifstofustjóri menningarmála,

                                    menntamálaráðuneytinu

 

 

13:40   IV.       LIST ÁN LANDAMÆRA OG ÖNNUR DÆMI

 

                            Framkvæmd og þróun Listar án landamæra

                                    Margrét M. Norðdahl, framkvæmdastýra hátíðarinnar

 

                            Þátttakendur og reynslusögur

                                    Flytjendur verða kynntir síðar

 

14:30 – 14:50 KAFFIHLÉ

 

                            Upphaf og hugmyndafræði Listar án landamæra – Eitthvað fyrir aðra?

                                    Friðrik Sigurðsson, framkvæmdastjóri Þroskahjálpar

                                   

                            Dissimilis: Frá eldhúsborðinu til Óperuhússins

                                    Kai Zahl, stofnandi Dissimilis í Noregi

                           

                            Hver eru næstu skref fram á við?

                            Pallborðsumræður: Guðmundur Magnússon, Friðrik Sigurðsson, Kai Zahl

                                                 

 

16:00   V.        RÁÐSTEFNULOK

 

                            Hugleiðing: Hinn fullkomni maður: Staða fatlaðra í menningunni

                                    Ármann Jakobsson, dósent við Háskóla Íslands

 

                            Samanatekt og lokaorð

                                    Þuríður Backmann, alþingismaður og

                                    formaður Norrænu nefndarinnar um málefni fatlaðra

 

 

- Þau erindi sem fram fara á erlendu máli verða þýdd af rittúlkum á íslensku.

 

 

 

KVÖLD DAGSKRÁ

 

 

Gestum ráðstefnunnar sem og öðrum er boðið á stóra svið Borgarleikhúsið að kvöldi 28.september, kl.20:00.

Þá mun norski hópurinn Dissimilis sýna verkið ´´Árstíðirnar fjórar´´ og íslenskir leikhópar sýna einnig verk sín. Hægt er að skrá sig á sýninguna þar sem skráning á ráðstefnuna fer fram ( sjá að ofan).

 

 

Um Dissimilis:   

Fyrir u.þ.b. 30 árum sat Kai Zahl, faðir þroskahefts ung manns, og átti erfitt með að sætta sig við  að stærsti draumur sonar hans um að spila á hljóðfæri og spila í hljómsveit gæti ekki orðið að veruleika því að sonurinn gat ekki lesið nótur. Kai tók að hanna einfalt nótnakerfi með litum sem gerði syni hans kleift  að læra að spila á hljóðfæri og 1981 var fyrsta hljómsveit hans stofnuð. Þetta var upphafið að Dissimilis.

 

Næstu árin fóru fleiri að æfa með Dissimilis og árið 1987 skrifaði Kai Zahl söngleik fyrir hópinn. Fyrsta sýning þeirra var sýnd fyrir fullu húsi í Hljómleikahöllinni í Osló. Þetta var í fyrsta skipti sem eingöngu þroskaheftir einstaklingar komu fram á sýningu í Osló og olli hún afgerandi hugarfarsbreytingu sýningargesta. Áfram var haldið næstu árin, hljómsveitirnar urðu fleiri og fjölbreyttari og danshópar og kórar bættust við. Dissimilishópar spruttu upp í fleiri landshlutum í Noregi og síðan í fjarlægum heimshornum. Hópar voru stofnaðir á Kúbu, Sri Lanka, Rússlandi og í fleiri löndum og þessi hópar uxu og döfnuðu. Í dag eru um 800 meðlimir í Dissimilis í Noregi og um 2500 í öðrum löndum.

 

Um verkið:

 “Árstíðirnar fjórar” er verk leikið af 22 nemendum Dissimilis.

Þau bjóða okkur í ferðalag um árstíðirnar fjórar og fjölbreytileika þeirra.

 

Frekari upplýsingar um Dissimilis má sjá á síðu þeirra:

 

www.dissimilis.no

 

List án landamæra:

 

www.listanlandamaera.blog.is og [e-mail]

 

Myndlistarmenn - Rithöfundar - Tónlistarmenn

 
Menningarmálanefnd Hveragerðisbæjar auglýsir eftir umsóknum um dvöl í húsinu Varmahlíð í Hveragerði.  Íbúðarhúsið er búið öllum húsgögnum og tækjum og Hveragerðisbær mun greiða kostnað vegna rafmagns og hita.  Gestalistamenn fá endurgjaldslaus afnot af húsinu. Engin vinnustofa fylgir húsnæðinu.
Óskað er eftir því að í skriflegum umsóknum, sem senda á til menningarmálanefndar Hveragerðisbæjar, Sunnumörk 2, 810 Hveragerði, komi fram æskilegt dvalartímabil og að hverju listamaðurinn hyggst vinna meðan á dvölinni stendur.

Úthlutun dvalartímabila mun fara fram í september og mun vera úthlutað frá október 2009.
Allar frekari upplýsingar svo og umsóknareyðublöð fást á skrifstofum Sambands íslenskra myndlistarmanna, Hafnarstræti 16, sími 551 1346, Rithöfundasambands Íslands, Gunnarshúsi,  Dyngjuvegi 8, sími 568 3190 og Félagi íslenskra Hljómlistamanna, Rauðagerði 27, sími 588-8255. Einnig er hægt að leita upplýsinga hjá menningar- og frístundafulltrúa Hveragerðisbæjar í síma 483 4000.
Umsóknareyðublöð er hægt að nálgast á heimasíðu Hveragerðisbæjar www.hveragerdi.is
Umsóknarfrestur er til 1. september n.k.

Menningarmálanefnd Hveragerðisbæjar

Sýning Hlyns Hallssonar í Gallerí Víð8ttu601 sett upp aftur og framlengd

Gallerí Víð8tta601

Hlynur Hallsson

Landnám - Ansiedlung - Settlement

16.05. - 23.08. 2009

Verkið sem Hlynur Hallsson setti upp í Gallerí Víð8ttu hefur verið stolið í tvígang en vegna þrjósku listamannsins og sýningarstjóranna hefur það verið sett upp í þriðja skipti og sýningin verið framlengd um mánuð.

Litla Skerið í Tjörninni sem myndaðist þegar Drottningarbraut var lögð árið nítjánhundruð sjötíu og eitthvað er ónumið land. Tunglið var það einnig einu sinni og Norðurpóllinn og Suðurpóllinn líka. Hver verður fyrstur til að stíga á þetta Sker litið persónulegt skref en um leið stórt skref fyrir mannkynið? Ekki Bandaríki Norður Ameríku heldur auðvitað Evrópusambandið. Hið nýja heimsveldi er mætt á staðinn. Þar hefur verið settur upp fáni ESB, sannkallaður landnemafáni.

Hlynur Hallsson er fæddur á Akureyri 1968. Hann stundaði myndlistarnám á Akureyri, í Reykjavík, Hannover, Hamborg og í Düsseldorf. Hann hefur verið iðinn við að setja upp sýningar og síðastliðið haust setti hann upp nokkurskonar yfirlitssýningu á verkum sínum í Nýlistasafninu og í A-sal Hafnarhúss Listasafns Reykjavíkur ásamt verslunum, veitingastöðum og þjónustufyrirtækjum í Miðborginni setti hann upp verkið ÚT/INN.
Hlynur hlaut verðlaun Kunstverein Hannover 1997, verðlaun ungra myndlistarmanna í Neðra-Saxlandi 2001 og verðlaun Sparda Bank árið 2006. Hann hefur hlotið starfslaun myndlistarmanna og var bæjarlistarmaður Akureyrar árið 2005. Hlynur vinnur með aðstæður, texta, innsetningar, ljósmyndir, gjörninga og hvað eina, allt eftir því sem hentar í hverju tilfelli. Hversdagslegir atburðir eins og sundferðir, snjóhúsbygging eða verslunarleiðangur geta verið efniviður í verkum hans en einnig landmæri, samskipti fólks og viðhorf okkar. Nánari upplýsingar um Hlyn og verk hans er að finna á heimsíðunni www.hallsson.de

Anna Bryndís Sigurðardóttir og Þorsteinn Gíslason hafa starfrækt Gallerí Víð8ttu601 frá árinu 2007. Sýningarnar í Hólmanum í tjörninni í Innbænum á Akureyri munu halda áfram fram á næsta ár og þá taka aðrir sýningarstaðir við.

Sýningin hjá Gallerí Víð8ttu601 hefur verið framlengd til 23. ágúst 2009 og vonandi fær fáninn að vera í friði svo lengi. Nánari upplýsingar um Gallerí Við8ttu601 veita Anna Bryndís Sigurðardóttir og Þorsteinn Gíslason í 435 0033 eða 8461314 og í tölvupósti: vid8tta(hjá)simnet.is
Nánari upplýsingar um verkið veitir Hlynur í síma 6594744 og í tölvupósti: hlynur(hjá)gmx.net

Ljóðadagskrá með rokkuðu ívafi og sýningarlok í Verksmiðjunni á Hjalteyri

Laugardaginn 20. júní verður ljóðadagskrá með rokkuðu ívafi í Verksmiðjunni á Hjalteyri. Umsjónarmaður dagskrárinnar er skáldið og rithöfundurinn Einar Már Guðmundsson en sérlegir gestir hans verða söngvaskáldin Kristján Pétur Sigurðsson og Þórarinn Hjartarson.
Dagskráin hefst kl. 21:00 og er enginn aðgangseyrir og allir velkomnir.

Um þessar mundir stendur yfir sýningin "Hertar sultarólar" í Verksmiðjunni, hún  er opin laugardaga og sunnudaga milli kl 14:00-17:00 henni lýkur um næstu helgi og því eru síðustu forvöð að sjá þessa sýningu sem hefur hlotið afar góðar viðtökur og verið vel sótt. Sýningunni lýkur sunnudaginn 21. júní.
Myndir og nánari upplýsingar um viðburði og Verksmiðjuna á Hjalteyri á: http://www.verksmidjan.blogspot.com


Menningarráð Eyþings styrkir dagskrána í Verksmiðjunni á Hjalteyri