Jóna Hlíf Halldórsdóttir opnar sýningu á D-sal Hafnarhúss Listasafns Reykjavíkur

D9   JÓNA HLÍF HALLDÓRSDÓTTIR
LAUGARDAGINN 27. SEPTEMBER KL. 16:00

Næstkomandi laugardag hefst annar hluti sýningaraðar D-salar Hafnarhússins með sýningu Jónu Hlífar Halldórsdóttur.
Fyrsta hluta sýningaraðarinnar lauk í maí síðastliðnum en þá höfðu átta listamenn kynnt verk sín í salnum. D-sýningaröðinni er ætlað að efla unga og efnilega listamenn og gefa þeim tækifæri til að kynna verk sín á einkasýningu í opinberu safni. Fyrri sýningaröðinni lauk með útgáfu sýningarskrár með verkum sýnendanna auk þess sem Listasafn Reykjavíkur stóð fyrir málþingi um stöðu yngri
listamanna í samtímanum.

JÓNA HLÍF HALLDÓRSDÓTTIR
Í innsetningum sínum vinnur Jóna Hlíf með skúlptúra, myndbönd, málverk og texta en innsetning hennar í D-salnum nefnist Plenty of Nothing. Jóna Hlíf er fædd í Reykjavík 1978 og lauk diploma prófi árið 2005 og MFA árið 2007 frá Glasgow School of Art. Hún er sýningarstjóri VeggVerk og Gallerí Ráðhús og hefur rekið GalleriBOX á Akureyri frá árinu 2005.
Sýningarstjóri er Yean Fee Quay.

Sýningin verður opnuð á sama tíma og ID-LAB, sem áður hefur verið kynnt, og stendur til 9. nóvember.

Nánar um sýninguna hér.

Aðalheiður S. Eysteinsdóttir sýnir í nýju Galleríi, M3 á Glerártorgi

Aðalheiður S. Eysteinsdóttir opnaði sýningu/innsetningu í Gallerí M3 á Glerártorgi föstudaginn 19. sept.

Aðalheiður  er fædd og uppalin á Siglufirði en fluttist til Akureyrar og bjó þar í 20 ár. Hún hefur fengist við myndlist síðan 1993, sett upp fjölda einkasýninga í 14 löndum og tekið þátt í samsýningum, listasmiðjum og Dieter Roth Akademíunni. Aðalheiður hefur starfað við ýmislegt tengt listum og hlotið tvívegis starfslaun frá ríki og bæ. Var þátttakandi í uppbyggingu Listagilsins á Akureyri og er í stjórn Myndlistafélagsins og Verksmiðjunnar á Hjalteyri. Undanfarin fjögur ár hefur Aðalheiður búið og starfað í Freyjulundi 601, Akureyri.  www.freyjulundur.is

Sýningin  er sú þriðja sýning af fimmtíu sem Aðalheiður setur upp víða um heim á næstu fimm árum.  Sýningarnar eru allar undir yfirskriftinni “ Réttardagur “ og fjalla á fjölbreyttan hátt um þá menningu sem skapast hefur í kringum  íslensku sauðkindina. Hver sýning tekur mið af rýminu sem í boði er og verður öðrum listamönnum eða aðilum sem fjalla um sauðkindina,  boðin þátttaka.  Einnig eru bókaðar sýningar  á næsta ári í Hollandi, Þýskalandi og Afríku.

Gallerí M3  er sett saman úr  einingum sem framleiddar eru af Montana fyrirtækinu og er gjöf  Peters J. Lassens forstjóra og aðaleiganda danska húsgagnafyrirtækisins og Eyjólfs Pálssonar eiganda húsgagnaverslunarinnar Epal til Akureyrarbæjar.   Montana einingarnar voru hannaðar og framleiddar í þeim tilgangi að fá listamenn til að raða þeim saman og skapa með þeim innsetningar og er Ólafur Elíasson td. einn þeirra sem hefur unnið með einingarnar.   Árið 2005 vann Finnur Arnar myndlistarmaður verkið "Stígur" sem sýnt var í versluninni Epal. Það verk var gefið Akureyrarbæ en síðan ákveðið að setja einingarnar, sem upphaflega voru hluti af verki Finns, saman en leyfa fleiri listamönnum að vinna inn í þær sín myndlistarverk.   
Gallerí M3 verður staðsett á Glerártorgi um hríð  en rýmið er hinsvegar þess eðlis að auðvelt er að flytja það milli staða.
Það er mikill heiður fyrir bæinn að þiggja slíka gjöf en þess má geta að Lassen hefur í þrjú ár veitt verðlaunafé í flokki hönnunar í Íslensku Sjónlistaverðlaununum. 

Meðfylgjandi er mynd af verki Aðalheiðar Eysteinsdóttur sem verður inni í Gallerí M3

Anna McCarthy og Heimir Björgúlfsson sýna í GalleríBOXi

 

Laugardaginn  20. September opnuðu Anna McCarthy og Heimir Björgúlfsson opna sýningar sínar í GalleríBOXi.

Sýning Önnu McCarthy ber heitið ,,Where have all the heroes gone?". Hún er gestalistamaður Gilfélagsins, bresk að uppruna en starfar og býr í bæði München og Glasgow.

Sýning Heimis Björgúlfssonar ber heitið ,,Silfur er að tala". Hann hefur sýnt víða í Evrópu en býr og starfar nú í Los Angeles, Kaliforníu.
Sýningar í GalleríBOXi eru opnar Laugardaga og Sunnudaga, frá 14:00 til 17:00.

Arna Valsdóttir opnar sýningu í Kunstraum Wohnraum á sunnudag

ARNA VALSDÓTTIR 

BROT ÚR VERKUM 

21.09. - 14.12.2008 

Opnun sunnudaginn 21. september 2008, klukkan 11-13

Opið samkvæmt samkomulagi      

 

KUNSTRAUM WOHNRAUM             

Hlynur Hallsson • Kristín Kjartansdóttir     

Ásabyggð 2 • IS-600 Akureyri •  [phone] • hlynur(hjá)gmx.net • www.hallsson.de 

 

Sunnudaginn 21. september 2008 klukkan 11-13 opnar Arna Valsdóttir sýninguna “Brot úr verkum” í Kunstraum Wohnraum á Akureyri. Hún sýnir að þessu sinni vídeómálverk, kyrrmyndir úr hreyfimyndum og innsetningum, teikningar, ljósmyndir og fleiri brot úr fyrri verkum.

Arna er fædd á Akureyri 1963 og nam myndlist við grafíkdeild MHÍ og lauk framhaldsnámi frá fjöltæknideild Jan van Eyck Academie í Maastricht árið 1989. Á þeim tíma fór hún að gera tilraunir með það að tengja saman fleiri þætti í myndlistinni og vann gjarnan verk þar sem saman fór hljóð, rými, mynd og hreyfing.

Arna hefur tekið þátt í fjölda samsýninga og unnið einkasýningar þar sem hún vinnur verk beint inn í það rými sem hún velur hverju sinni.

Hún hefur meðal annars sett upp gagnvirk innsetningarverk í Garðskagavita, í Austurbæ, í Hafnarfjarðarleikhúsinu,í Nýlistasafninu, Í kjallara Kirsuberjatrésins, í Populus Tremula, í Ketilhúsinu, í Epal og nú síðast í Verksmiðjunni á Hjalteyri.

Arna hefur einnig sett verk sín upp á ráðstefnum um skólamál, í leikskólum, grunnskólum, framhaldsskólum og í Háskólanum á Akureyri.

Sýninguna í Kunstraum Wohnraum hugsar hún sem einskonar yfirlitssýningu þar sem litið er yfir farinn veg og það skoðað sem hennar fyrri sýningar hafa skilið eftir sig.

Nánari upplýsingar um verk Örnu Valsdóttur er að finna á http://www.arnavals.net

Meðfylgjandi mynd er af verki sem Arna setti upp á opnunarsýningu Verksmiðjunnar á Hjalteyri.

Kunstraum Wohnraum hefur verið starfrækt frá árinu 1994, fyrst í Hannover og nú á Akureyri. Það er til húsa á heimili Hlyns Hallssonar og Kristínar Kjartansdóttur í Ásabyggð 2. Sýning Örnu Valsdóttur stendur til 14. desember 2008 og er opin eftir samkomulagi og hægt er að hringja í síma 462  3744.

Nánari upplýsingar um Kunstraum Wohnraum er að finna hér.

Ragnheiður Þórsdóttir opnar nýja vinnustofu og gallerí

Laugardaginn 20. september opnar Ragnheiður Þórsdóttir nýja vinnustofu og gallerí á neðri hæð í Kaupvangsstræti 19  á Akureyri .  Vinnustofan/galleríið hefur hlotið nafnið Stóllinn og verður opnunin frá kl 14:00 ­- 17:00 n.k. laugardag.

Georg Óskar Manúelsson sýnir í Cafe Valny á Egilstöðum

Georg Óskar Manúelsson 23ára, lokaárs nemi við Myndlistarskólann á Akureyri, sýnir málverk og teikningar í Cafe Valny á Egilstöðum, þann 4. okt. og mun sýningin standa yfir í rúman mánuð. Allar myndirnar voru gerðar á bilinu 2007-2008.  "Nafn sýningarinnar valdi litli 4 ára bróðir minn eftir að hann var að skoða myndefnið og sagði (Boom boom og byssó) þannig mér þykir það nafn henta sýningunni vel, myndefnið tek ég  einfaldlega úr mínu lífi,  sem þjónn á Eiðum í sumar, fjöldskyldulífinu, til næturlífsins"

Starfslaun listamanna 2009

 

 

 

Hér með eru auglýst til umsóknar starfslaun listamanna sem úthlutað verður árið 2009, í samræmi við ákvæði laga nr. 35/1991 með áorðnum breytingum.
 
 Starfslaunin eru veitt úr fjórum sjóðum, þ.e.:
1.   Launasjóði rithöfunda
2.   Launasjóði myndlistarmanna
3.   Tónskáldasjóði
4.   Listasjóði
 
Umsóknir einstaklinga, ásamt fylgigögnum, skulu berast Skrifstofu Stjórnar listamannalauna, Hallveigarstöðum, Túngötu 14, 101 Reykjavík, á þar til gerðum eyðublöðum fyrir  kl. 17:00 fimmtudaginn 2. október 2008.  Ef umsókn er send í pósti gildir dagstimpill pósthúss.
Umsóknir skulu auðkenndar "Starfslaun listamanna 2009" og tilgreindur sá sjóður sem sótt er um laun til.
 
Heimilt er að veita starfslaun úr Listasjóði til stuðnings leikhópum enda verði þeim varið til greiðslu starfslauna til einstakra leikhúslistamanna. Umsóknir leikhópa til Listasjóðs fyrir einstaka leikhúslistamenn, ásamt fylgigögnum, skulu berast Skrifstofu Stjórnar listamannalauna, Hallveigarstöðum, Túngötu 14, 101 Reykjavík, á þar til gerðum eyðublöðum fyrir  kl. 17.00 fimmtudaginn 2. október 2008.  Ef umsókn er send í pósti gildir póststimpill. Umsóknir skulu auðkenndar "Starfslaun listamanna 2009 - leikhópar".
 
Með umsókn skal fylgja greinargerð um verkefni það sem liggur til grundvallar umsókninni ásamt upplýsingum um hve langan starfstíma er sótt um og rökstuðningi fyrir tímalengd.  Jafnframt skulu fylgja upplýsingar um náms- og starfsferil, verðlaun og viðurkenningar. Þessir þættir  skulu  að  jafnaði  liggja  til  grundvallar  ákvörðun  um úthlutun starfslauna
 
Athugið að hafi umsækjandi áður hlotið starfslaun verður umsókn hans því aðeins tekin til umfjöllunar að hann hafi skilað Stjórn listamannalauna skýrslu um störf sín í samræmi við ákvæði 4. gr. laga um listamannalaun nr. 35/1991 með áorðnum breytingum.
 
Umsóknareyðublöð fást á vef Stjórnar listamannalauna www.listamannalaun.is og á  skrifstofu  stjórnarinnar  að  Hallveigarstöðum, Túngötu 14, 2. hæð.
 
 
Umsóknarfrestur rennur út  fimmtudaginn 2. október 2008.
 
 
Stjórn listamannalauna 25. júlí 2008
Skrifstofa Stjórnar listamannalauna
Túngötu 14, 101 Reykjavík
S. 562 6388, [e-mail]
www.listamannalaun.is

Kristinn Már Pálmason opnar sýninguna Gæðaplánetan X í DaLí Gallery

Kristinn Már og Gæðaplánetan X

Kristinn Már Pálmason opnar sýninguna Gæðaplánetan X í DaLí Gallery laugardaginn 20. september kl. 14-17. Sýningin Gæðaplánetan X samanstendur af nýrri sex málverka seríu. Verkin eru unnin með olíu á þykkan birkikrossvið.

Í G.P.X. sækir Kristinn M.P. innblástur í pólitík og merkingarfræði, tímahugtakið og áberandi fortíðardýrkun samtímans (retro) sem endurspeglast svo skemmtilega í nostalgískri hönnun armbandsúra vorra daga en listamaðurinn safnar sjálfur úrum af töluverðri ástríðu. Ástríða fyrir fylgihlutum, þrá eftir meiri gæðum og völdum sem og þráin sjálf (þráhyggja og ást) eru undirtónn sýningarinnar en myndmál verkanna er þó margrætt og opið til túlkunar.

Sýningin er til 5. október
http://www.kmp.is
http://daligallery.blogspot.com

Grasrót 08 opnar í Verksmiðjunni á Hjalteyri laugardaginn 20. september kl. 17-19

GRASRÓT 08

Björk Viggósdóttir
Guðmundur Vignir Karlsson (Kippi Kaninus)
Halldór Ragnarsson
Jeannette Castioni
Jóna Hlíf Halldórsdóttir

20. september - 11. október 2008
Opnun laugardaginn 20. september klukkan 17-19.
Verksmiðjan á Hjalteyri

Sigling með Húna II frá Torfunefsbryggju á Akureyri til Hjalteyrar klukkan 16.
Ben Frost, Kippi Kaninus og Steingrímur Guðmundsson spila á tölvur og tannhjól á opnuninni.

Sýningin er opin laugardaga og sunnudaga klukkan 14-17.

Verksmiðjan á Hjalteyri í samvinnu við Nýlistasafnið og Sjónlist
Sýningarstjóri: Þórarinn Blöndal

Norðurorka, SagaCapital og Menningarráð Eyþings styrkja Grasrót 08 og Verksmiðjuna á Hjalteyri.


GRASRÓT 08
Grasrótarsýningar Nýlistasafnsins hafa unnið sér sess sem sýnishorn af því sem ungir og upprennandi myndlistarmenn eru að fást við. Framtíðin í íslenskri myndlist! Í fyrsta skipti er sýningin sett upp utan höfuðborgarsvæðisins, í Verksmiðjunni á Hjalteyri. Fimm myndlistarmenn voru valdir til að taka þátt í sýningunni og þau komu öll í ágústmánuði og skoðuðu aðstæður og lögðu línurnar fyrir uppsetningu verkanna. Þetta eru listamenn sem vinna með fjölbreytta miðla og ólíkar aðferðir. Bakgrunnur þeirra er einnig nokkuð margslunginn. Það verður því spennandi að sjá útkomuna í hinni risastóru og hráu Verksmiðju og enn meira spennandi að fylgjast með þeim í framtíðinni. Það fer vel á því að sömu helgi og Grasrótarsýningin er opnuð verða Sjónlistaverðlaunin afhent á Akureyri. Þannig gefst kostur á því að sjá það ferskasta og hressasta í íslenskri myndlist ásamt því besta og framsæknasta!

Hlynur Hallsson

Verksmiðjan: http://www.verksmidjan.blogspot.com
Nýlistasafnið: http://www.nylo.is
Sjónlist: http://www.listasafn.akureyri.is




Björk Viggósdóttir sýnir verkið “Fyrir sólsetur / Nákvæm stund”. “Ég vinn með ljóðrænar myndir og tákn, þar sem ég tek raunveruleikann úr samhengi og brýt hann upp í einingar sem ég að lokum raða saman í heildræna mynd. Ég notast við liti og ljós og fæ að láni hluti úr hversdagsleikanum sem fléttast inn í myndbönd  og hljóðverk til að ná fram þeim hughrifum hverju sinni. Orð eru oft upphafið að verkum mínum. Veröld sjónrænna ljóða, nákvæm samstilling rýmis, myndbyggingar, litla, tóna og sjónmyndar.”

Björk Viggósdóttir er fædd á Akureyri 1982. Hún útskrifaðist frá Listaháskóla Íslands árið 2006. Björk var einn af Dungal verðlaunahöfum 2008. Hún var ein af sex myndlistarmönnum til að hljóta dvöl í Millay Colony for the arts í New York 2008 og hún dvaldi í 1. international open art residency í júní 2008 á Grikklandi. Björk gerði 12 videoverk fyrir leikritið „Bakkynjur" í Þjóðleikhúsinu. Hún hefur gert video fyrir nútíma klassísk tónskáld frá Ítalíu, Íslandi og Bandaríkjunum. Meðal næstu verkefna eru Sequenses í Norrænahúsinu, Monkey Town - New York, Chelsea Museum Brooklyn og á Listahátíð 2009 í Reykjavík.

www.bjorkbjork.blogspot.com
-

Guðmundur Vignir Karlsson (Kippi Kaninus) sýnir verkið Seagull sem samanstendur af blikkplötu á álramma, tveimur rafseglum, sterku ljósi og vídeói og snýst um pælingar um síld, smelti, sjó, gull, silfur, segla og blóð.

Guðmundur Vignir Karlsson er fæddur 1978 í Reykjavík og er stúdent frá Laugarvatni og kláraði BA í guðfræði við HÍ, hélt svo utan til Hollands og lauk MA gráðu í Image and Sound frá Konunglega konservatóríinu í Haag.  Hann hefur sýnt verk sín úti í Hollandi og Ítalíu og hér heima. Auk myndlistar  fæst hann við tónlist og vinnur þá gjarnan undir nafninu Kippi Kaninus.  Þá hefur hann farið í tónleikaferðir með m.a. Mugison, Múm og Kiru Kiru.  Hann er meðlimur í tónleikasveit hljómsveitarinnar Steintryggs, þar sem hann spilar á kjálkahörpu, syngur yfirtónasöng, tölvast og gerir videó.  Hann kemur til með að taka þátt í Sequences hátíðinni í Reykjavík í október.

www.kippikaninus.com
-

Halldór Ragnarsson sýnir verkið Irdó í Verksmiðjunni á Hjalteyri. Verkið samanstendur af teikningum, málverkum og textum Halldórs og er beint framhald af vinnu hans með orðum, sem hefur skipað stóran sess í myndlist hans undanfarin tvö ár.

Halldór Ragnarsson er fæddur í Reykjavík 1981 og stundaði hann nám í heimspeki við Háskóla Íslands áður en hann fór í myndlist í Listaháskóla Íslands þar sem hann útskrifaðist vorið 2007. Hann hefur haldið einkasýningar, bæði hér heima og erlendis, ásamt því að hafa tekið þátt í nokkrum samsýningum. Halldór var meðlimur og einn af stofnendum hljómsveitarinnar Kimono (2001-2007) sem gaf út þrjár plötur hjá Smekkleysu en í dag er hann meðlimur í hljómsveitinni Seabear sem er gefin út af þýska útgáfufyrirtækinu MORR music. Hann hefur einnig hannað plötuumslög fyrir hljómsveitir og listamenn og má þar nefna Curver, Kimono, Borko og Hudson Wayne. Einnig gaf Halldór út ljóðabókina Öreindir af lúsinni vorið 2004.

www.hragnarsson.com
-

Jeannette Castioni sýnir verkið „the law of dialectic“ sem er vídeó-hljóðverk í innsetningu sem blandast  umhverfinu, samræður á milli einstaklinga sem hittast aldrei í umræðunni og einmannaleiki sem partur af okkar tilveru. Vídeóið er staðsett á ákveðnu svæði og heyrnatól dreifð um svæðið. Mögulegt er að hlusta á umræður sem verða í gangi allan tímann. Á milli heyrnatólanna er einskonar tómarúm, eintal, þar sem hver rödd fær aldrei svar og ekki heldur samhljóm.

Jeannette Castioni er fædd í Verona á Ítalíu 1968. Hún útskrifaðist frá LHÍ árið 2006 en áður stundaði hún nám við Akademíuna í Bologna og einnig nám í forvörslu í Flórens. Hún stundar nú Ma.Phil. nám í listasögu við Háskólann í Verona og er auk þess stundakennari við LHÍ. Frá árinu 1999 hefur Jeannette haldið sýningar á Ítalíu og frá 2004 hér á Íslandi, Bandaríkjunum, Þýskalandi og Rússlandi. Ásamt tímabundnum innsetningum hefur hún unnið með ljósmyndarannsóknir og vídeóviðtöl um ástand unglinga í Nuuk, Grænlandi þar sem hún dvaldi og hélt vinnustofu. Tæknin sem Jeannette notar er oft blönduð og innihaldið tengist hugsuninni og skilaboðunum sem eru gefin í hvert skipti, frá ljósmyndum, innsetningum, lífrænum efnum og líðandi tíma.

www.hivenet.is/terra/jeannette
-

Jóna Hlíf Halldórsdóttir sýnir verkið ALLS STAÐAR ANNARS STAÐAR. Hvernig stendur á því að við getum hugsað svona afstrakt um allt sem er annars staðar, en verðum á sama tíma að ríghalda í miðjuna? Að við getum hugsað um það hvernig allt tengist og tvístrast, orsakast og afleiðist―en ýtum því frá okkur um leið með því að aðgreina miðjuna (sem öllu skiptir) frá „öllu hinu“.

Jóna Hlíf Halldórsdóttir er fædd 1978 í Reykjavík og býr og starfar á Akureyri. Hún útskrifaðist með Diploma frá Myndlistarskólanum á Akureyri árið 2005 og með Mastersgráðu í myndlist frá Glasgow School of Art árið 2007. Jóna Hlíf vinnur með ýmsa miðla, s.s. vídeó, skúlptúr, bókverk og ljósmyndir. Verk Jónu Hlífar eru persónuleg úrvinnsla hennar á upplifunum úr daglega lífinu, sem hún útfærir gjarnan í formi myndmáls. Verkin eru gjarnan óræð og hafa yfir sér hráan blæ, sum unnin úr fjöldaframleiddum efnum, önnur handgerð af listamanninum. Það sem sameinar þau er tenging við mannslíkamann og sálina, sem talið er að hvíli þar í einhverju hólfi sem sést þó ekki á röntgenmynd.

www.jonahlif.com

Sýningunni "Staðfugl - Farfugl" lýkur með kveðjuhófi og lokagjörningi

The exhibtion will close on the 15th of september with a performance and a little gathering to say goodbye to the summer exhibtion and the birds that fly off to warmer climates...

"THE BIRD HAS FLOWN"
goodbye ceremony and final performance brought to you by Kristjan Ingimarsson and GOGGI
On the 15th of september at 20.00hrs ...  on the border of Akureyri and Eyjafjardarsveit (on the Akureyri side of the fjord).
The decoration is a variation on an idea (egg) that was layed by "LÍNA" and hatched out under "GOGGI"
Everybody is welcome - no entrance fee and light refreshments - let's lift our spirits upp...
Thanks for a great summer! George, Steini & Dísa
To celebrate this event LINA became a sea-bird and drifts somewhere in the Mediterranean Sea.

Meira á http://fugl.blog.is

Sjónlistarhelgin 19.-21. september á Akureyri

 
FÖSTUDAGINN 19. SEPTEMBER                                    
Listasafnið á Akureyri: kl. 10-12  Spjallað við tilnefnda listamenn um verk þeirra á sýningu Sjónlistar í Listasafninu á Akureyri.     

Brekkuskóli: kl. 13-15.30 Málþing Sjónlistar: (Un)Making of Public Space / (Af)myndun almenningsrýmis. Aðalfyrirlesari er bandaríski rithöfundurinn Jeff Byles, en einnig taka til máls heimspekingurinn Haukur Már Helgason og myndlistarkona Berglind Jóna Hlynsdóttir.
Stjórnandi málþings er Páll Björnsson sagnfræðingur. Málþingið fer fram á ensku og er öllum opið. 

Glerártorg: Kl. 16.30 Opnun á nýju galleríi.  
Flugsafn Íslands: KL 19.40  bein útsending í Ríkissjónvarpinu frá afhendingu Sjónlistarverðlaunanna.

LAUGARDAGINN 20. SEPTEMBER    
Listasafnið á Akureyri: kl. 14-16  Spjallað við tilnefnda listamenn um verk þeirra á sýningu
Sjónlistar í Listasafninu. 
List í byggingalist- arkitektar og listnemar leiða saman hesta sína í völdum byggingum.

Verksmiðjan Hjalteyri: Kl. 16. Siglt með Húna II til Hjalteyrar á sýninguna Grasrót 2008 sem opnar kl. 17. Björk Viggósdóttir, Guðmundur Vignir Karlsson (Kippi Kaninus), Halldór Ragnarsson, Jeanenette Castoni og Jóna Hlíf Halldórsdóttir.  Á leiðinni vídeóverk, gjörningar ,tónlist, söngur og ýmsar uppákomur.  
 

Galleríin opin: Gallerí Jónas Viðar – Sigtryggur Baldvinsson, Ketilhúsið – Anna Gunnarsdóttir, Dali - gallerí – Kristinn Már Pétursson, Gallerí svartfugl og hvítspói – sveinbjörg Hallgrímsdóttir, Café Karólína
- Sigurlín m. Grétarsdóttir, Safnasafnið. gullsmiðir með opið hús og kynningu á
verkum sínum.
Íslensk hönnun og gjörningar í verslunum og margt, margt fleira. 
Deginum lýkur með glaum og gleði á veitinga- og skemmtistöðum bæjarins þar sem grímubúningar, náttföt og ýmiskonar furðufatnaður verður í hávegum hafður.

SUNNUDAGINN 21. SEPTEMBER
Kunstraum Wohnraum kl. 11.00  Arna Valsdóttir. 
Gallerí Box  Anna  McCarthy og Heimir Björgúlfsson.
                                                                                                   
Gullkorn í byggingarlistasögu Akureyrar.
Göngukort Loga Más Einarssonar arkitekts á milli merkra bygginga bæjarins. Kortið  liggur frammi á kaffihúsum í bókabúðum og víðar. 
Gisting á Akureyri kostar frá 2000,- 

www.visitakureyri.is

www.flugfelag.is  

www.trex.is 
 
Sjónlist er á Facebook og www.sjonlist.is 

Joris Rademaker sýnir verk á Kartöfluþingi AkureyrarAkademíunnar

Jarðepli í íslenskri menningu í 250 ár 
– afmælismálþing um ræktun og neyslu kartaflna

Laugardaginn 13. September nk. stendur AkureyrarAkademían fyrir allsherjar afmælismálþingi til heiðurs kartöflum. Tilefnið er ekki eingöngu alþjóðlegt ár kartöflunnar í ár, heldur einnig 250 ára ræktunarafmæli kartaflna á Íslandi og það að 200 ár eru liðin síðan ræktun þeirra hófst í Búðargilinu á Akureyri.
Málþingið var styrkt af Menningarráði Eyþings og er hugsað sem væn blanda af fræðum, listum, ræktun og matargerð með erindum, uppákomum, veisluhaldi og dansi - fræðandi og nærandi. Þau sem að þinginu koma eru þau Hildur Hákonardóttir, myndlistakona og rithöfundur, og Bergvin Jóhannsson, formaður Samtaka kartöfluræktenda, Anna Richardsdóttir, dansari, Brynhildur Þórarinsdóttir hjá Neytendasamtökunum, Björn Teitsson, sagnfræðingur, Joris Rademaker, myndlistamaður, Guðrún H. Bjarnadóttir, vefnaðarkona, Sigríður Bergvinsdóttir, verkefnisstjóri Kartöfluárs, Jóhann Thorarensen, garðyrkjufræðingur, Helgi Þórsson, listamaður og umhverfisfræðingur, Friðrik Vagn Karlsson, matreiðslumeistari. Páll Björnsson stýrir umræðum. Matargerðarsnillingarnir á veitingastaðnum Friðrik V töfra fram kartöflutertur og kartöflurétti og Helgi og hljóðfæraleikararnir sjá um tónlistarveislu um kvöldið.
Málþingið er öllum opið og er aðgangur ókeypis. Garðyrkjufólki, fræðifólki, bændum, heimaræktendum og áhugafólki um ræktun, neyslu og matarmenningu sérstaklega bent á að sækja þingið sem haldið er í húsakynnum Akademíunnar í Húsmæðraskólanum við Þórunnarstræti 99 á Akureyri. Þingið hefst klukkan 13 á laugardaginn og stendur fram eftir kvöldi. Nánari upplýsingar eða fyrirspurnir á www.akureyrarakademian.is.
(Kristín Þóra Kjartansdóttir  6610168)



Dagskrá málþingsins

13:00 Setning þingsins: Kristín Þóra Kjartansdóttir
Fundarstjóri: Páll Björnsson

13:15-14:45:  Jarðepli festa rætur í íslenskri menningu
-    Hildur Hákonardóttir, myndlista- og garðyrkjukona: “Saga kartöflunnar í alþjóðlegu samhengi: Hvernig kartöflurnar bárust milli landa og heimsálfa."
-    Björn Teitsson, sagnfræðingur, og Jóhann Thorarensen, garðyrkjufræðingur: “Kartöfluræktun í Búðargili og almennt á landinu á 19. öld.”
-    Bergvin Jóhannsson, bóndi og Sigríður Bergvinsdóttir, verkefnisstjóri kartöfluárs: “Stórræktun kartaflna: Þróunin síðustu hálfa öld útfrá sjónarhorni eyfirsks bónda.”

14:45-16:00: Kaffiveitingar og uppákomur: kartöflutertur og kaffi, kartöfluupptaka, listgjörningur, kartöflusýning. Atriði á vegum Friðriks V, Önnu Richardsdóttur, Jorisar Rademaker, Guðrúnar H. Bjarnadóttur (Höddu), Helga Þórssonar og Jóhanns Thorarensen.

16:00-17:00:  Jarðepli í íslenskri matargerð: Neysla og nýting kartaflna
-    Brynhildur Pétursdóttir, Neytendasamtökunum: "Barátta fyrir betri kartöflum."
-    Friðrik Valur Karlsson, matreiðslumeistari: “Staðbundin matarmenning og kartöflukúnstir í matargerð.”

17:00-17:45:  Umræður og samantekt

17:45-19:00:  Matarveisla: Kartöfluréttir frá Veitingastaðnum Friðrik V
Hlé
21:00-23:00 Tónlistarveisla til heiðurs kartöflum: Helgi og hljóðfæraleikararnir

Gestavinnustofa Skaftfells á Seyðisfirði laus til umsóknar

   

Skaftfell
Miðstöð myndlistar á Austurlandi

Skaftfell auglýsir eftir umsóknum um gestavinnustofu fyrir árið 2009.
Allar frekari upplýsingar um gestavinnustofuna er að finna á vefsíðu Skaftfells
www.skaftfell.is

Skaftfell auglýsir einnig eftir umsóknum um sýningar fyrir árið 2009.
Umsóknareyðublöð er hægt að nálgast á forsíðu www.skaftfell.is
Leiðbeiningar er að finna á umsóknareyðublöðunum.

Frestur til að skila inn umsóknum er til 1. október. Póststimpill gildir.
Allar frekari upplýsingar fást á skrifstofu Skaftfells í síma 472 1632

---
Skaftfell
Center for Visual Art in East Iceland
Call for applications

Application deadline for the Skaftfell residency in the year 2009 is the coming 1st October. All further information on the artist residency can be found on www.skaftfell.is
Applications for exhibitions in 2009 ends on the same date, 1st October.

Application forms can be found on the front page of www.skaftfell.is. Instructions are included in the application forms. Call for applications ends on 1st October, postal-stamp applies.
For further information call  [phone]

 
Þórunn Eymundardóttir, framkvæmdastjóri/manager
-Skaftfell- Miðstöð myndlistar á Austurlandi / Center for Visual Art
Austurvegi 42, 710 Seyðisfirði, Iceland
Tel/Fax: [phone]
skaftfell(hjá)skaftfell.is
www.skaftfell.is
 

Réttarkaffi í Freyjulundi á laugardag

Réttarkaffi
opið hús í Freyjulundi
við Reistarárrétt
klukkan 14:00 - 18:00
laugardaginn 13. sep.

ath:  ekki tekið við kortum

Lína opnar sýninguna "Tilbrigði - Variation" á Café Karólínu laugardaginn 6. september 2008 klukkan 17

Sigurlín M. Grétarsdóttir

Tilbrigði - Variation 

06.09.08 - 03.10.08   
 

Café Karólína // Kaupvangsstræti 23 // IS 600 Akureyri // 4612755

Sigurlín M. Grétarsdóttir (Lína) opnar sýninguna "Tilbrigði - Variation" á Café Karólínu laugardaginn 6. september 2008 klukkan 17.

Lína notar blandaða tækni í verkunum, aðferð sem hún hefur verið að þróa í rúm 2 ár. Í verkunum á sýningunni á Café Karólínu notar hún acryl, lakk, pappír, hrosshár og fleira.

Sigurlín M. Grétarsdóttir (Lína) stundaði nám við Iðnskólann í Hafnarfirði í 3 ár, á hönnunarbraut og útskrifaðist sem tækniteiknari. Hún útskrifaðist frá Myndlistarskólanum á Akureyri árið 2007 eftir fjögurra ára nám þar. Hún er nú í Háskólanum á Akureyri í kennsluréttindanámi. Þessi sýning er 5. einkasýningin hennar en hún hefur tekið þátt í nokkrum af samsýningum.
Sýningin á Café Karólínu stendur til 3. október 2008.

Nánari upplýsingar veitir Lína í lina(hjá)nett.is og í síma 8697872
Meðfylgjandi er mynd af einu verkanna sem hún sýnir á Café Karólínu.

Næstu sýningar á Café Karólínu:

04.10.08 - 31.10.08    Ingunn St. Svavarsdóttir Yst
01.11.08 - 05.12.08    Þorsteinn Gíslason
06.12.08 - 02.01.09    Jóna Bergdal Jakobsdóttir
03.01.09 - 06.02.09    Herdís Björk Þórðardóttir

Fimm listamenn taka þátt í Grasrót 2008

Sýningin Grasrót 2008 verður þetta árið sett upp í Verksmiðjunni á Hjalteyri. Grasrótarsýningarnar hafa nú þegar unnið sér sess sem sýnishorn af því áhugaverðasta sem ungir og upprennandi listamenn eru að fást við. Hingað til hafa grasrótarsýningarnar verið í Nýlistasafninu að þessu sinni verður breyting þar á. Verkefnið unnið í samvinnu Verksmiðjunnar við Nýlistasafnið og Sjónlist. Sýningin Grasrót 2008 opnar laugardaginn 20. september 2008 en um þá helgi verða Sjónlistarverðlaunin afhent á Akureyri.

Fimm listamenn hafa verið valdir til að taka þátt í Grasrót 2008 og þau eru Björk Viggósdóttir, Guðmundur Vignir Karlsson (Kippi Kaninus), Halldór Ragnarsson, Jeannette Castioni og Jóna Hlíf Halldórsdóttir.

Þau komu öll í Verksmiðjuna á Hjalteyri í síðustu viku til að skoða aðstæður og leggja drög að spennandi verkum sem þau munu setja upp.  Þórarinn Blöndal er sýningarstjóri Grasrótar 2008.

Björk Viggósdóttir er fædd 1982 á Akureyri og býr og starfar í Reykjavík. Hún útskrifaðist af myndlistarbraut Listaháskóla Íslands 2006.
Nánari upplýsingar á:
http://bjorkbjork.blogspot.com
http://www.myspace.com/bjorkbjork

Guðmundur Vignir Karlsson (Kippi Kaninus) er fæddur 1978 í Reykjavík og býr og starfar þar. Hann nam myndlist og tónlist við Het Koninklijk Conservatorium í Haag og lauk þaðan námi 2007.
Nánari upplýsingar á:
http://www.kippikaninus.com

Halldór Ragnarsson er fæddur í Reykjavik 1981. Hann býr og starfar í Reykjavík. Hann lærði heimspeki við Háskóla Íslands og nam myndlist við Listaháskóla Íslands og lauk þaðan námi 2007. Hann var gestanemi við Hochschule der Künste í Berlín 2005-2006.
Nánari upplýsingar á:
http://hragnarsson.com
http://www.myspace.com/mariomuskat

Jeannette Castioni er fædd í Verona á Ítalíu 1968 og býr og starfar þar og í Reykjavík. Hún útskrifaðist úr málaradeild listaakademíunnar í Bologna 2002 og frá myndlistardeild Listaháskóla Íslands 2006.
Nánari upplýsingar á:
http://www.hivenet.is/terra/jeannette

Jóna Hlíf Halldórsdóttir  er fædd í Reykjavík 1978 en býr og starfar á Akureyri. Hún útskrifaðist af myndlistardeild Myndlistarskólans á Akureyri 2005 og stundaði framhaldsnám í Glasgow School of Art 2005-2007.
Nánari upplýsingar á:
http://www.jonahlif.com


Verksmiðjan: http://www.verksmidjan.blogspot.com
Nýlistasafnið: http://www.nylo.is
Sjónlist: http://www.listasafn.akureyri.is

Hanna Hlíf Bjarnadóttir og Þórarinn Blöndal sýna hjá Gallerí Víð8ttu601

Gallerí Víð8tta601: Hanna Hlíf Bjarnadóttir og Þórarinn Blöndal.
29.08.-30.09.2008

Hanna Hlíf og Þórarinn sýna verkið Stuðlar í hólmanum í Leirutjörn. Þetta er fyrsta samsýning þeirra hjóna en verkið samanstendur af 8 speglum og er heiti þess  vísun í endurtekningu á ákveðinni formfestu speglanna en sjónræn upplifun ræðst af staðsetningu áhorfandans. 

Þórarinn Blöndal er fæddur á Akureyri 25. október 1966, hann stundaði nám við Myndlistaskólann á Akureyri, Myndlista- og Handíðaskólann og í Academie van Beldende Kunsten í Rotterdam, Hollandi.  Ásamt því að halda sýningar sjálfur hefur Þórarinn staðið fyrir ýmsum listviðburðum og tekið virkan þátt í félagsstarfsemi á Akureyri.  Stofnaði gallerí02 og rak það ásamt Jónasi Viðari, var í stjórn Gilfélagsins um árabil, var einn af stofnendum Myndlistarfélagsins og situr í stjórn þess og er einn af stofnfélögum Verksmiðjunnar á Hjalteyri.  Þórarinn hefur komið að ýmsum verkefnum tengdum söfnum víða um land, bæði sem hönnuður og að uppsetningu sýninga og sem sýningarstjóri. Undanfarna vetur hefur Þórarinn kennt myndlist við Myndlistaskólann á Akureyri.

Hanna Hlíf Bjarnadóttir er fædd í Reykjavík 1. nóvember 1965,  fór 17 ára til London og lærði þar snyrtifræði, fór síðan í Húsgagnasmíði í Iðnskólanum í Reykjavík, lauk síðan prófi frá Myndlistaskólanum á Akureyri 2006.   Hefur hún haldið nokkrar sýningar eftir útskrift og staðið að ýmislegri menningarstarfsemi á Akureyri.  Stofnaði galleríBOX 2005 ásamt öðrum og rak það til 2007 en það er staðsett í Kaupvangsstræti 10, Akureyri. Auk þess hefur hún hannað ýmsar verslanir og starfar sem innkaupastjóri Rexín á Akureyri.

Styrkir Menningaráætlunar Evrópusambandsins

Minnum á að næsti skilafrestur fyrir umsóknir til Menningaráætlunar Evrópusambandsins er 1.október.
Menningaráætlun Evrópusambandsins veitir styrki til verkefna í öllum listgreinum  og á sviði menningararfleifðar auk þess að styrkja starfsemi evrópskra tengslaneta og menningarstofnana. Áætluninni er ekki skipt milli menningarsviða. Samstarfsverkefni geta verið innan einnar listgreinar eða menningarsviðs, s.s. leiklistar, tónlistar, myndlistar, menningararfs o.s.frv. eða verið þverfagleg í samstarfi ólíkra greina.
 
Hægt er að sækja um:
- Styttri samstarfsverkefni (Strand 1.2.1)
  Meðal skilyrða er að verkefnið sé samstarfsverkefni a.m.k 3 landi og standi yfir í mesta 2 ár.Styrkfjárhæð 50 – 200 þúsund evrur.
  Umsóknarfrestur 1. október
- Samstarf til lengri tíma (Strand 1.1.) 
  Meðal skilyrða er að verkefnið sé samstarfsverkefni a.m.k 6 landa og standi yfir í 3-5 ár. Styrkfjárhæð 200 – 500 þúsund evrur á ári.
  Umsóknarfrestur 1. október

Nánari upplýsingar og tengingar á umsóknareyðublöð ofl. eru á vefsíðu Upplýsingaþjónustu Menningaráætlunar ESB www.evropumenning.is
 
Menningaráætlunin styrkir einnig starfsemi evrópskra menningarstofnana, samstarfsnet og evrópska menningarviðburði. og menningarborgir Evrópu. Einnig eru veitt evrópsk menningarverðlaun á vegum áætlunarinnar s.s á sviði menningararfs og byggingarlistar. Fljótlega verður einnig komið á laggirnar evrópskum bókmenntaverðlaununum og dægurtónlistarverðlaunum.
Umsókn þarfnast töluverðs undirbúnings. Starfsmenn upplýsingaþjónustu Menningaráætlunarinnar veita ráðgjöf á öllum stigum umsóknarferlis.

Með kveðju
 
Menningaráætlun ESB / The European Union's Culture Programme
Upplýsingaþjónusta menningaráætlunar ESB / Cultural Contact Point Iceland
Túngata 14, 101 Reykjavik, Iceland
[phone]
email: info(hjá)evropumenning.is
www.evropumenning.is