Anna Elionora Olsen Rosing sýnir í Hvítspóa

Hjartanlega velkomin á opnun í  Hvítspóa, miðvikudaginn 28. maí kl. 17.00.
Grænlenska listakonan Anna Elionora Olsen Rosing opnar sýningu sína  INUIT & MASKS.
Á opnuninni verður hún með grænlenskan gjörning.


Hvítspói, Art Studio & Gallerý
Anna Gunnarsdóttir
Brekkugata 3a
600 Akureyri
Sími 4662064 / 8976064

Jónína Björg Helgadóttir sýnir í Geimdósinni

Salt Vatn Skömm

Laugardaginn 24. maí heldur Jónína Björg Helgadóttir sýninguna Salt Vatn Skömm í Geimdósinni, Kaupvangsstræti 12. Sýninguna vinnur hún út frá ljóði Heklu Bjartar Helgadóttur, ljóðskálds og sýningarstjóra Geimdósarinnar. Sýningin er ein í röð af sýningum sem haldnar hafa verið í Dósinni af mismunandi myndlistamönnum sem vinna þar með ljóð Heklu. Að þessu sinni eru það formin og jafnframt formleysið sem spila aðalhlutverkið í myndverki Jónínu Bjargar.

Sýningin stendur frá kl. 14-17 laugardaginn 24. maí
Kaupvangsstræti 12, gengið inn að aftan.

Frekari upplýsingar gefur Jónína Björg á netfanginu [e-mail]
www.joninabjorg.com

salt vatn skömm

Þær drukku te í rauðu eldhúsi, Hind og Babúska.
Sandalviður, plastrósir, og þær játuðu margrar syndir.
Hindin sagði Babúskunni: „ég er aldrei nógu falleg… ekkert sem ég geri“
Babúskan leiddi Hindina að speglinum. Kvöldsólin vægðarlaust kastsljós, á meðan hún dróg af henni klæðin við spegilinn.
Hún sagði henni að horfa. Lengi. Stara. Lengur. Á meðan hún renndi niður kjólnum, lét hann falla á gólfið, ýtti hlýrunum niður handleggina og snerti nektina. Hægt en örugglega, krosslagði hún fingur yfir naflann.
„Fegurðin eins og öræfin. Erfið að komast yfir, þó unaðsleg að sjá. En aldrei jafn stórbrotin, eins og eftir að þú klífur þau“
Og Hindin horfði lengi, starði lengur, og hún sá að líkaminn varð formlaus, án lína, óviðráðanlegur eins og flóðbylgja
og hann rann undan höndum Babúskunnar og á brakandi gólffjalirnar, seytlaði í rifurnar og dropaði í smáum skömmtun, undir húsið.
Hún var salt, hún var vatn, hún var skömm
undir fingrum, undir hælum, undir rós
og þegar Babúskan hnýtti á hana fjallaskó og rétti henni skæri
reisti hún síðustu vörðuna á öræfahörundið lausa:
„þú ert salt þú ert vatn…vertu sönn“

Hekla Björt Helgadóttir

https://www.facebook.com/events/663259453721943

https://www.facebook.com/geimdosin

"Gísli B. - Fimm áratugir í grafískri hönnun" opnar í Ketilhúsinu

Laugardaginn 24. maí kl. 15 opnar sumarsýning Ketilhússins, Gísli B. – Fimm áratugir í grafískri hönnun. Þar er á ferð yfirlitssýning Gísla B. Björnssonar sem er einn atkvæðamesti grafíker íslenskrar hönnunarsögu. Hann setti á fót auglýsingastofu Gísla B. Björnssonar eftir nám í Þýskalandi 1961 og ári síðar stofnaði hann sérdeild í auglýsingateiknun við Myndlista- og handíðaskólann sem í dag er braut grafískrar hönnunar í Listaháskóla Íslands. Gísli hefur kennt óslitið í fimm áratugi og verið óþreytandi í því að efla fagmennsku og brýna fyrir nemendum að sýna ábyrgð í verki. Hann hefur komið að markaðs- og ímyndarmálum fjölda fyrirtækja og stofnana á Íslandi og búið til mörg af þekktustu vörumerkjum landsins. Má þar nefna merki Sjónvarpsins, Norræna félagsins og Hjartaverndar. Gísli er undir sterkum áhrifum módernisma 20. aldar með áherslu á einfaldleika, notagildi og hagkvæmni.

Á sýningunni er horft yfir feril Gísla og gefur að líta verk frá námsárum hans, tímarit, bókakápur og umbrot og hönnun bóka. Sýnd eru gömul myndbrot af auglýsingastofu Gísla þar sem tækni þess tíma gefur innsýn í vinnu teiknarans og hugmyndasmiðsins.

Sýningin kemur frá Hönnunarsafni Íslands og er opin alla daga nema mánudaga kl. 12-17 og eftir 1. júní kl. 10-17. Sýningarstjóri er Ármann Agnarsson.

Sunnudaginn 25. maí kl. 14 flytur Gísli sjálfur fyrirlestur í Ketilhúsinu undir yfirskriftinni Góð merki og ekki. Þar leitast hann við að svara spurningum um hvað einkennir góð merki og hvað þarf að hafa í huga við hönnun þeirra. Nokkur merki verða skoðuð og farið yfir hvernig hefur tekist til. 

Aðgangur á sýninguna og fyrirlesturinn er ókeypis.

https://www.facebook.com/events/687606844634766/

http://listasafn.akureyri.is

Markmið XIV - síðustu sýningardagar í Listasafninu á Akureyri

Framundan eru síðustu dagar sýningar Helga Hjaltalín og Péturs Arnar, Markmið XIV, í Listasafninu á Akureyri. Á sýningunni halda þeir áfram að gera tilraunir, sem skila engri afgerandi niðurstöðu, á ferðalagi sem hefur engan sérstakan áfangastað. Tilgangur félaganna er að setja saman mynd þar sem framkvæmd og framsetning sýningarinnar verður að sjónrænni upplifun. Þeir ýta myndmálinu að rökrænum þolmörkum sínum, en bjóða um leið áhorfandanum upp á dúnmjúkan þægindaramma fyrir skilningarvitin.

Hugmyndaferðalög þessara tveggja myndlistamanna hafa leitt til samvinnuverkefna sem skrásett eru í formi afritaðra athafna, meðal annars með ljósmyndum, myndböndum, skúlptúrum og öðrum tjáningarmiðlum myndlistarinnar. Sýningin byggir á samvinnuverkefninu Markmið, sem varð til um síðustu aldamót, og samanstendur af tveimur einkasýningum.

Sýningunni lýkur á næstkomandi sunnudag og er opin alla daga fram að lokun kl. 12-17.

Aðgangur er ókeypis.

http://listasafn.akureyri.is

Phishing the Landscape í Verksmiðjunni á Hjalteyri

Phishing the Landscape

Fred Bigot (FR)
Rhona Byrne (IR)
Christine de la Garenne (DE)
Franziz Denyz (B)
Anna Líndal (IS)
Þorgerður Ólafsdóttir (IS)
Clémentine Roy (FR)
Sami Sänpäkkilä & Goodiepal (FI/DK) Catriona Shaw (UK)

Verksmiðjan á Hjalteyri, / 29.05 – 29.06.2014 / Neðst á Hjalteyri við Eyjafjörð / 601 Akureyri http://www.verksmidjan.blogspot.com                                                                                 

Opnun fimmtudaginn 29. maí kl. 17:00 / Opið um helgar eingöngu til 16 júní, en Þar eftir alla daga vikunnar til 29 júní kl. 14:00 - 17:00

Umsjónarmenn : Catriona Shaw og Clémentine Roy

Phishing the Landscape
Er sýning og tilraunaútgáfa í umsjá Catriona Shaw og Clémentine Roy, en í aðalhlutverkum 10 alþjóðlegir listamenn. Titillinn vísar í “phishing”, blekkingarleik, þar sem upplýsingum er hnuplað og síðar notaðar í sviksamlegum tilgangi. Verkin á sýningunni sýna afstöðu, sem tengja má við “phishing”, en í samhengi landslags, eins og með yfirtöku og nýrri notkun á mannvirkjum áður ætluð til annarra nota, eða samtímalegum uppfærslum á landslagi og umtaki þess. Skynjun á eiginleikum, sögu og notkun þessara staða er oft breytt, ekki einvörðungu með annari notkun heldur einnig með annari gerð notanda. Fyrrum vinnustaðir verða tómstunda og listhús, stríðsminjar verða veiðigræjur fyrir fiskimenn og leikvellir fyrir börn, landslag er endurskapað og lagfært með stafrænum aðferðum eða sérfræðilegum hugtökum.

Sýningin verður opnuð fimmtudaginn 29. maí 2014, kl. 17:00 í Verksmiðjunni á Hjalteyri.

Koma listamannanna og sýningin eru styrkt af, Menningarráði Eyþings, Ásprenti, Byko, Litalandi, Norðurorku, Vlaamse overheid, Myndlistarsjóði, Irish artscouncil.

Bakhjarlar Verksmiðjunnar á Hjalteyri eru CCP­games, Bústólpi og Hörgársveit.

Nánari upplýsingar veitir Gústav Geir Bollason [e-mail] [e-mail] og í síma: 4611450 6927450

https://www.facebook.com/events/246418752227566/

Joris Rademaker sýnir í Populus tremula

Innsetning um eitthvað sem minnir á, sem minnir á. sem …

Joris Rademaker sýnir í Populus tremula 24. og 25. maí 2014


Hugmyndir eru eins og farfuglar sem ferðast á milli mismunandi hluta. Sýningin fjallar m.a. um hvernig lítill hlutur getur sett af stað skriðu hugmynda.

Fyrir nokkrum árum var ég að setja upp sýningu í Populus tremula og þarna voru ennþá spýtur hátt upp á veggnum til að setja öngla á til að hengja myndverk á. Þessar spýtur trufluðu innsetninguna mína og ég fékk leyfi til að fjarlægja þær en það gekk brösuglega. Stórar málningaklessur flögnuðu af. Þessar flögur drógu athygli mína til sín.

Þar voru marglitar málningarumferðir orðnar sýnilegar og gerðu sýningarsögu Populus sýnilega á einhvern hátt. Flögurnar voru í laginu eins og eyjar. Ég gat ekki hent þessu því þarna var kominn efniviður fyrir nýja sýningu.

Nokkrum árum seinna fór ég að safna fjöðrum og núna á öskudaginn keypti ég nokkra flotta kúluhatta (tákn ensku yfirstéttarinnar).

Dag nokkurn voru fjaðrirnar komnar upp á kúluhattinn eins og farfuglar. Þarna gerðist eitthvað skrítið, eitthvað nýtt en samt kunnugt. Eitthvert þrívíddartákn sem tengdist Englandi, nýlendustefnu heimsins, ferðalögum og eyjaklösum. Út frá þessum skúlptúrum þróaðist sýningin áfram.

Þetta er fjórða sýningin mín í Populus Tremula og vil ég þakka stjórn þess fyrir sýningartækifærin. Rýmið er skemmtilegt og ýtir undir tilraunir til að búa til sér-sýningar fyrir þetta rými.

Joris Rademaker

https://www.facebook.com/events/640396022704657/640454959365430

Arnar Ómarsson opnar einkasýninguna Forritað Ástand í Danmörku

Forritað Ástand | Forrit eru líka fólk, fólk!

23. - 26 Maí 2014

Arnar Ómarsson opnar einkasýninguna Forritað Ástand í Danmörku. 

Sýningin markar ákveðin þáttaskil í verkefninu Notendur sem Arnar hefur unnið að rúmt síðastliðið ár. Verkefnið inniheldur m.a. sýningar í Halle50 og Firstlines Gallery í München, Alþýðuhúsinu á Siglufirði, Weekends Gallery í London, DAK og loks í Godsbanen í Danmörku þar sem Forritað Ástand - Forrit eru líka fólk, fólk! opnar á föstudaginn.

Verkefnið fjallar um eðli tölvuhugsunar og varpar fram frumspekilegum spurningum um sköpun og greind. Verkin á sýningunni eiga öll það sameiginlegt að ávarpa þann grundvöll þar sem forritum mistekst að tileinka sér mannlega samskiptahætti, hvort sem það er í myndmáli, tjáningu eða textasmíð. Einlægur bragur yfir verkunum lætur áhorfandann finna til samkenndar, en nálgunin manngerir forritin. Arnar kemur fram við forritin líkt og minnihlutahóp sem verður fyrir aðkasti og fordómum. Verkefnið er styrkt af Myndlistarsjóð.

Frekari upplýsingar um Notendur er að finna á usershandbook.com.

Arnar Ómarsson útskrifaðist frá UAL Listaháskólanum í London 2011 með fyrstu einkunn og hefur dvalið í Danmörku síðan. Arnar starfar á Institut for (X), menningarmiðstöð í gamalli lestastöð í Árósum þar sem hann hefur vinnustofu en rekur einnig gestalistamannadvöl, vikulega fyrirlestraröð og sér um alþjóðatengsl hópsins. Verkefnið Reitir á Siglufirði er einnig í stjórn Arnars hvert sumar ásamt Ara Marteinssyni, samstarfsmanni hans til margra ára og er Arnar stofnmeðlimur í Verksmiðjunni á Hjalteyri.

Frekari upplýsingar um Arnar er að finna á arnaromarsson.com

12 nýjar sýningar opnaðar í Safnasafninu

Laugardaginn 17. maí kl. 14.00 verða opnaðar 12 nýjar sýningar í Safnasafninu í Eyjafirði, og er opnunin sem fyrr í tengslum við Alþjóðlega safnadaginn 18. maí.

Safnasafnið er opið daglega frá kl. 10.00–17.00 alla daga til 31. ágúst, en tekið á móti hópum í september eftir atvikum. Safnið gefur gestum sínum veitingar, glæsilega sýningarskrá og einstaka upplifun í lifandi skemmtitækjakynningu í anddyri. Upplýsingar eru veittar í síma 4614066 og [e-mail]

https://www.facebook.com/events/1398599437093639/

Úlfur Logason sýnir í Kartöflugeymslunni

Laugardaginn 17. maí klukkan 3 opnar Úlfur Logason sína fyrstu einkasýningu í Kartöflugeymslunni á Akureyri.

https://www.facebook.com/events/277443745771917

https://www.facebook.com/kartoflugeymslan

Vorsýning Myndlistaskólans á Akureyri

Árleg vorsýning Myndlistaskólans á Akureyri verður haldin í fertugasta sinn helgina 17. og 18. maí 2014 frá klukkan 13:00-17:00 í húsnæði Myndlistaskólans að Kaupvangsstræti 16. Að venju verður sýningin afar fjölbreytt en til sýnis verða verk nemenda úr þremur deildum auk afraksturs barnanámsskeiða.

http://myndak.is

https://www.facebook.com/events/306091579549809

Halldóra Helgadóttir sýnir í Mjólkurbúðinni

Halldóra Helgadóttir opnar málverkasýninguna AF JÖRÐU í Mjólkurbúðinni í Listagilinu á Akureyri laugardaginn 17. maí kl. 14.

Eins og nafn sýningarinnar gefur til kynna eru verkin unnin út frá áhrifum náttúru landsins
Undanfarin ár hefur Halldóra beint sjónum sínum að því smálega í náttúrunni, stækkað það upp og sett í nýjan búning.
Viðfangsefnin eru hraun, mosi og blóm sem við lítum oft á sem illgresi en eru þó svo sterk ímynd íslenskrar náttúru.

Sýning Halldóru Helgadóttur stendur til 1. júní og verður opin fim. - sun. frá kl. 14 - 17.
Allir velkomnir.

Listamannsspjall og sýningarlok í Flóru

Helga Sigríður Valdemarsdóttir
Þræðir
22. febrúar - 17. maí 2014
Sýningarspjall fimmtudaginn 15. maí kl. 20-21
Sýningarlok laugardaginn 17. maí
Flóra, Hafnarstræti 90, 600 Akureyri, s. 6610168

http://floraflora.is
https://www.facebook.com/flora.akureyri
https://www.facebook.com/events/758529120866678

Fimmtudagskvöldið 15. maí kl. 20-21 verður Helga Sigríður í listamannsspjalli í Flóru í Hafnarstræti 90 á Akureyri og allir eru velkomnir.

Nú eru einnig síðustu forvöð að sjá sýningu Helgu Sigríður “Þræðir” en hún hefur verið framlengd til 17. maí.

Helga Sigríður er fædd á Akureyri árið 1975. Hún útskrifaðist úr VMA af myndlista- og handíðabraut og er með diploma í myndlist frá Myndlistaskólanum á Akureyri. Helga hefur tekið þátt í samsýningum Myndlistarfélagsins og haldið nokkrar einkasýningar og sýningin í Flóru er hennar sjöunda einkasýning.
Á sýningunni gefur að líta málverk sem Helga Sigríður hefur unnið á þessu ári.

Sýningin er öllum opin á opnunartíma Flóru mánudaga til laugardaga kl. 12-16.
Næsta sýning í Flóru er á verkum Kristínar G. Gunnlaugsdóttur og opnar hún 14. júní.

Flóra er verslun og viðburðastaður með vinnustofum sem Kristín Þóra Kjartansdóttur félagsfræðingur rekur. Áherslan er á nýtingu, endurnýtingu, náttúrutengsl og verkmenningu. Listrænn ráðunautur staðarins er Hlynur Hallsson, myndlistarmaður. Menningardagskrá Flóru hlaut styrk úr Menningarsjóði Akureyrar.

Kjólandi í Populus tremula

Laugardaginn 17. maí kl. 14.00 verður opnuð myndlistarsýningin Kjólandi í Populus tremula.

Þar leiða saman kjóla sína listakonurnar Brynhildur Kristinsdóttir, Dagrún Matthíasdóttir, Jónborg Sigurðardóttir og Þóra Karlsdóttir.

Sýningin er einnig opin sunnudaginn 18. maí frá 14.00-17.00.
Aðeins þessi eina helgi. ALLIR VELKOMNIR.

Myndlistakonurnar fjórar hafa unnið saman í listum áður og  eftir að hafa fengið inni í Populus Tremula var ákveðið að viðfangsefni sýningarinnar yrði unnið út frá einu orði. Orðið KJÓLANDI varð fyrir valinu og þær spinna sýninguna út frá því með möguleika rýmisins að leiðarljósi.  Þær Brynhildur, Dagrún, Jónborg og Thora vinna á ólíkan hátt í myndlistinni en eru samstíga í bæði hugmyndaferli og í samvinnu í listum. Sýningin KJÓLANDI samanstendur af þrívíðum verkum sem unnin eru í ólík efni og aðferðir með það í huga að sýningargestir geti mátað sig við verkin og gefið ímyndunaraflinu lausan tauminn.

Um verkin á sýningunni KJÓLANDI:

Brynhildur: „ Svífið hvítu álftir. Fljúgið hátt í mínum kjól. Hér eru hjörtu sem af hamingju sá“.
Dagrún: „Kom fagnandi kjólandi og far dansandi brosandi út lífið“.
Thora: „Kjólandi hversu margir sem þér eruð, fyrirgefandi, hylur og skilur hvaða ástand sem er“.
Jónborg Sigurðardóttir : „Kjóll er kjóll og ekkert annað, endurvinnslukjóll“.

Opnun ljósmyndasýningar á Bókasafni HA

„Mengun í lífkerfi sjávar – Verur í viðjum“

Maribel Longueira

Staður: Bókasafn Háskólans á Akureyri
Stund:  Fimmtudagur 8. maí, kl. 16.00.

„Við erum fólk á krossgötum sögunnar og ögurstundu fyrir framtíð jarðarinnar. Sambúð manna og umhverfis og þáttur þeirra í verndun eða eyðileggingu náttúrunnar er hnattrænt viðfangsefni. Myndunum er ætlað að vekja okkur til umhugsunar um þennan veruleika.“

Á sýningunni er að finna myndir eftir spænsk-galisísku listakonuna og ljósmyndarann Maribel Longueira. Í myndunum er fléttað saman ásýnd barna, kvenna og karla sem tilheyra mismunandi kynþáttum, og hlutum sem standa fyrir sóun sem viðgengst í menningu okkar. Listakonan vinnur með eld og eyðileggingu náttúrunnar og umbreytir slíkum ímyndum í nýjar sjónrænar myndlíkingar. Augu sjáandans opna glugga og birta okkur tálsýnir um möguleika á öðrum og öðruvísi heimi.

Eiginmaður Maribel er galisíska skáldið Francisco X. Fernández Naval  og verður hann með í för. Við opnun sýninganna mun hann flytja nokkur ljóð sem tengjast efni sýningarinnar.

Að sýningunni standa Stofnun Vilhjálms Stefánssonar í samstarfi við  Hugvísindasvið Háskóla Íslands, Stofnun Vigdísar Finnbogadóttur og Bókasafn Háskólans á Akureyri. Sýningin nýtur styrks frá Þróunarsjóði EFTA EEA.


Sýningin verður opin fram eftir sumri á Bókasafni Háskólans á Akureyri. Sýningin er öllum opin.

Bókasafn Háskólans á Akureyri

Sólborg, Norðurslóð 2

IS-600 Akureyri, Ísland

Sími: 460 8050/4608060

KAÞARSIS víxlverkun í Populus tremula

Laugardaginn 10. maí kl. 18.00 til miðnættis opna tíu listamenn sýningu í Populus tremula og túlka verk hvers annars og útfæra í hinum ýmsu miðlum.

Dj Delightfully Delicious þeytir skífum fram eftir kvöldi.

Listamennirnir sem sýna eru: Agnes Ársælsdóttir, Axel Flóvent, Borgný, Dagný Lilja, Halla Lilja, Karólína Rós, Kristófer Páll, Lena Birgisdóttir, Úlfur og Þórður Indriði.

Sýningin er einnig opin sunnudaginn 11. maí frá 14.00-17.00.
Aðeins þessi eina helgi.

https://www.facebook.com/events/791691124176395

Georg Óskar Giannakoudakis sýnir í Geimdósinni

Geimdósin kynnir næstu opnun og geimfara:
Georg Óskar Giannakoudakis (1985) og sýninguna
Svo frjáls.
Óskar hefur hlotið mikið lof og eftirtektir fyrir verk sín og samstarfið GÓMS, ásamt Margeiri Dire. Verk hans er hægt að skoða nánar á heimasíðunni: http://georgoskar.com/home.html
Dósin fékk Óskari eftirfarandi ljóð eftir Heklu Björt, að vinna með og verður afraksturinn til sýnis í Geimdósinni, laugardaginn 3. maí:


Og svo verðum við frjáls

Við stöfluðum nokkrum þúsundum reiðhjóla
á þök visnaðra sovétblokka.
Við kveiktum í hjólunum
og fórum svo á bát út á hafið
til að horfa á hrúgurnar brenna.
Þú leist á mig og spurðir: og verðum við svo frjáls?
ég þagði... og eldhafið litaði nóttina yfir þér.

Hinum meginn í firðinum, voru tveir hvítir hestar.
Hauslausir á ströndinni, á harðahlaupum inn í myrkrið.
Ég leit á þig og sagði: Svo verðum við frjáls.

-Hekla Björt 2013

Ljóðið er lýsing úr draumi, og fæst við þá ógn og eftirvæntingu að æða inn í óvissuna. Hvað tekur við og hvað er þarft að losa sig við áður en haldið er áfram og lengra?
Þegar við hugsum um framtíðina, hugsum við í skáldskap, því framtíðin hefur aldrei átt sér stað. Við búum hana til eins og skáldskap og listaverk. Við vitum aldrei hvað hún ber í skauti sér, en okkur er frjálst að dreyma um hana og skálda hana í eigin hugarfylgsnum.

Dósin spurði Óskar út í vinnu sína og vinnubrögð og hvernig textinn orkar á hann sem efniviður.
Óskar segir:

"Ég vinn mikið með æskuminningar, blanda þeim með nýlegri eða núverandi reynslu, þannig að útkoman verður alltaf sönn saga en með vissum skáldskap, því þar sem fortíð og nútíð mætast, þar er plássið fyrir sköpun.
Ég hef aldrei haldið dagbók, en ég hef lært að lokið listaverk er fullkomin dagbók.

"Mér finnst mjög ánægjulegt að grafa inn í undirvitund okkur með þeim aðferðum sem list hefur uppá að bjóða. Það eru svo margar faldnar hliðar lífsins sem er ekki hægt að ná með öðrum hætti. List er sálgreining á sjálfan sig, aðra menn og samfélagið. Í dag krefst heimurinn stöðugt að við að tökum eftir hvar við erum en ekki hver við erum, hann er hávær, og við erum mörg hver fyrirbæri í auglýsingabransanum. Það eru engin ljóð í slíkum hlutum. Ég leita af nýrrar reynslu af einföldum, daglegum hlutum en galdurinn er auðvitað að taka eftir þeim því þarna hafa þeir alltaf verið. Á daginn safna ég upplýsingum sem flestir myndu varla sjá merkilega og eða mikilvæga, og skrái þessa reynslu á striga. Titlar af einstökum verkum eru oftast fædd á sama hátt."

Dósin býður alla velkomna á opnunina næsta laugardag klukkan 15:00. Léttar veitingar verða í boði. Á sama tíma verður svo opnun Lilýar Erlu, Samtvinnað, í Deiglunni og Gilið mun bjóða upp á sól og svalandi menningu.

GEIMDÓSIN, Kaupvangsstræti 12. Listasafnshúsið/gengið inn úr portinu fyrir ofan, baka til.

https://www.facebook.com/geimdosin

https://www.facebook.com/events/289908191169422/